ᑐᖁᔪᖃᕐᑎᓗᒍ ᐅᑭᐅᕐᑕᑐᒥ

ᓄᓇᓕᓕᒫᖅ ᐊᑦᑐᑕᐅᒪᔪᖅ, ᐊᑖᑕᒋᔭᐅᔪᖅ ᐊᓯᑦᔨᖁᔨᒧᑦ ᐊᔪᐃᓐᓇᑐᖅ

ᐴᓂ ᐋᑕᒥ ᐃᕐᓂᖓ ᕌᐳᑦ 19-ᓂᒃ ᐅᑭᐅᓕᒃ ᑲᐱᔭᐅᑎᓪᓗᒍ ᑐᖁᑕᐅᑦᓱᓂ ᐃᓄᐃᑦ ᓄᓇᓕᖓᓂ ᑲᖏᕐᓱᔪᐊᖅ ᑯᐯᒻᒥ ᒫᑦᔨ 2018-ᒍᑎᓪᓗᒍ ᐃᓱᒪᓚᐅᕐᕐᑯᖅ ᐊᓯᐊᓂᒃ ᐋᓐᓂᓇᕐᑐᖃᕆᐊᓪᓚᖃᔭᖕᖏᓂᖓᓂᒃ. 

ᑭᓯᐊᓂ ᐃᓅᑦᓱᓂ ᑐᑭᓯᒐᓱᐊᕐᓱᓂ ᕿᑐᕐᖓᕆᔭᐅᑉ ᐱᔮᕐᓱᑕᐅᓂᒻᒪᕆᑦᓱᓂ ᑐᖁᓂᖓᓂᒃ ᑯᐯᒻᒥ ᐊᖏᓪᓕᑎᕆᒋᐊᓪᓚᑐᐃᓐᓇᑐᖅ ᐊᕐᓱᕈᓐᓂᖓᓂᒃ, ᐅᖃᕐᑐᖅ ᐋᑕᒥ. 

Viens ᖃᐅᔨᓴᕐᓂᕆᓚᐅᔪᔭᖓ ᖃᓄᐃᓕᖓᐅᑎᒻᒪᖔᑕ ᓄᓇᕐᖄᓯᒪᔪᑦ ᑯᐯᒃᑯᓗ ᓇᐅᓕᒫᓂᒃ ᐱᒍᑦᔨᕕᖓ ᐃᓱᓕᓚᐅᔫ ᑎᓯᒻᐱᕆ 2018-ᒥ ᑐᓴᕐᑎᓯᐅᑎᖏᑦ ᑭᖑᓪᓕᐹᑦ ᐊᑐᐃᓐᓇᕈᓛᕐᓂᖏᑦ ᓂᕆᐅᒋᔭᐅᓯᒪᑦᓱᑎᒃ ᓯᑉᑎᒻᐱᕆᐅᓕᑉᐸᑦ ᐊᕐᕌᒎᑉ ᐁᑉᐹᓂ.

ᑭᓯᐊᓂ ᐴᓂ ᐋᑕᒥ ᐅᖃᕐᑐᖅ ᓄᓇᖃᕐᖄᓯᒪᔪᐃᑦ ᒥᑦᓵᓄᑦ ᐊᓪᓚᑕᐅᖃᑦᑕᓯᒪᔪᑦ ᑯᐯᒃᑯᓄᑦ ᑲᕙᒪᑐᖃᒃᑯᓄᓪᓗ ᐊᕐᕌᒍᐃᑦ 20-ᐅᓕᕐᑐᖅ ᐃᓗᐊᓂ ᖃᓪᓗᓈᑦ ᓄᓇᖓᓂ ᐱᒻᒪᕆᐊᓘᑎᑕᐅᓲᑦ ᓱᕙᓪᓖᓯᒪᓪᓗᐊᔭᒐᑎᒃ ᐃᓄᐃᑦ ᓄᓇᓕᖏᓐᓂ ᐃᓅᓯᕆᔭᐅᔪᓂᒃ ᓄᓇᓕᖓ ᐆᑦᑑᑎᒋᓗᒍ. 

ᒫᓐᓇ ᑖᓐᓇ ᐊᑖᑕᒋᔭᐅᔪᖅ ᑭᐅᔭᐅᒍᒪᓕᕐᐳᖅ. 

ᐴᕐᓂ ᐋᑕᒥ ᑲᖏᕐᓱᔪᐊᖅ ᑲᓇᑕᒥ. (ᐁᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᑕᕐᕿᓂᑦ ᓯᑕᒪᐅᔪᕐᑐᓂᑦ ᑕᕐᕋᒥ ᑕᑯᓐᓈᑐᖅ ᒪᓕᓚᐅᔪᕗᖅ ᐋᑕᒥᒃᑯᓂᒃ ᐃᓚᒌᓂᒃ ᐊᔪᐃᓐᓇᖃᑦᑕᑎᓗᒋᑦ ᕿᓂᕐᓱᑎᒃ ᐱᔨᑦᓯᐅᑎᓂᑦ ᐃᓱᒪᓕᕆᓂᕐᒧᑦ, ᑐᖁᔪᕕᓃᑦ ᖃᐅᔨᓴᕐᑎᖓᑦᑕ ᐊᓪᓚᕕᖓᓄᑦ ᐊᒻᒪᓗ ᐃᕐᖃᑐᐃᕕᓕᕆᓂᕐᓄᑦ ᕌᐳᑦ ᐃᓅᒍᓐᓀᓂᕕᓂᖓᑕ ᑭᖑᓂᖓᓂ.

ᐅᓂᒃᑳᑦ ᐱᓯᒪᔪᑦ ᑲᖏᕐᓱᔪᐊᒥᑦ, ᒪᑦᑐᔨᐊᓪᒥᑦ ᐊᒻᒪᓗ ᑰᑦᔪᐊᒥᑦ, ᐊᓪᓚᕕᒻᒪᕆᖃᕐᕕᐅᔪᖅ ᓄᓇᕕᒻᒥ, ᐃᓄᐃᑦ ᓄᓇᖏᓐᓂ ᑯᐯᒃ ᑕᕐᕋᖓᓂ.

ᑖᒃᑯᐊᑕᒐ ᓴᕐᕿᑕᕗᑦ ᐅᓂᒃᑳᑦ.

 

ᑐᓴᕋᑦᓴᓕᕆᔨ : ᐊᐃᓕᔅ ᑯᐃᓐ

ᖃᕆᑕᐅᔭᒥ ᑲᒪᔨ : ᑲᑉᕆᐊᓪ ᓯᑭᖕ

ᐋᕐᕿᓱᐃᔨ ᐊᐅᓚᔫᒥᑦ : ᑕᓂᐊᓪ ᐆᑎᐊ

ᐋᕐᕿᓱᐃᔨ ᓂᐱᖏᓐᓂᒃᑦ : ᒫᒃ ᔨᓪᐱᐊ


ᐃᓄᐊᕐᓂᖅ

ᑲᖏᕐᓱᔪᐊᖅ ᑯᐯᒃ, ᐊᓪᓕᕇᕐᑐᑦ ᓇᑦᓯᐊᓕᐅᑦ (ᒫᑦᔨ) 19-ᒥ ᑕᕝᕙᓂ ᐊᕐᕌᒍᒥ, ᐴᓂ ᐋᑕᒥ, ᓯᑕᒪᑕᐅᔪᕐᑐᓂᑦ ᕿᑐᕐᖓᓕᒃ, ᐊᐅᓚᔫᓚᐅᕐᑐᖅ Sopranos-ᑯᓂᒃ ᐳᓛᕐᕕᒥ. ᐃᕐᓂᖓ 19-ᓂᒃ ᐅᑭᐅᓕᒃ, ᕌᐳᑦ, ᖁᕐᕕᑯᕕᒻᒦᓚᐅᕐᑐᖅ ᐴᓂᐅᑉ ᐊᑭᓪᓗᐊᖓᓂ, ᓄᔭᓂᑦᓴᓱᓂ ᐃᓚᓐᓈᒥᓂᒃ ᐊᓃᖃᑎᖃᓚᐅᖕᖏᓂᕐᒥᓂ ᐊᖓᔪᒥᓂᓪᓗ ᒫᑯᓯᒥᒃ.

“ᐃᒻᒥᓂᒃ ᐱᐅᓴᕐᑐᖅ ᑎᐸᐅᓯᕐᑐᓱᓂᓗ”, ᐋᑕᒥ ᐅᓂᒃᑳᑐᖅ ᐊᐅᓚᔨᔭᒥᓂᒃ ᐃᔪᕈᑎᖃᕐᓱᓂ. 

ᐊᓯᐊᓂᒃ ᐊᐅᓚᔨᔭᖃᓗᐊᖕᖏᑐᖅ ᐋᑕᒥ ᐃᕐᓂᒥᓂᒃ ᐅᐱᒋᔭᖃᕐᓂᒥᑕ ᐊᓯᐊᓂᒃ ᐃᕐᓂᖓ ᐱᐅᓯᕐᓱᓯᐊᓕᕐᒪᑦ : ᐱᓱᒍᓐᓇᓯᐊᕐᓱᓂ, ᐊᓕᐊᑦᓱᓂ ᖃᓄᐃᖕᖏᓯᐊᓕᕐᓱᓂᓗ. 

ᑎᕆᓪᓗᓕᐅᑦ (ᐊᐃᕆᓕ) 2017-ᒥ, ᕌᐳᑦ ᐊᐳᕐᑕᕕᓂᖅ ᓄᓇᒃᑰᔫᒧᑦ ᒥᕝᕕᐅᑉ ᐊᕐᖁᑎᖓᓂ ᓄᓇᓕᐅᑉ ᓯᓚᑖᓂ. ᐅᐃᒪᓇᕐᑐᑯᑦ ᐊᐅᓪᓚᓚᕿᑦᓱᓂ ᖃᓪᓗᓈᑦ ᓄᓇᖓᓄᑦ, ᐋᓐᓂᐊᕕᒻᒥ General Hospital-ᒥ ᒪᓐᑐᔨᐊᓪᒥ ᓯᓂᑦᑎᑕᐅᒋᐊᖃᓚᕿᑦᓱᓂ ᐅᓪᓗᓂ 16-ᓂ.  ᐱᒻᒪᕆᐊᓗᓐᓂᒃ ᐊᕐᕐᑯᓇᕐᓯᒪᒍᑎᖃᓚᐅᔫᖅ: ᓂᐊᖁᖓ ᒥᓛᕐᓯᒪᑦᓱᓂ, ᐊᐅᓈᕐᓱᓂ ᖃᕆᑕᒃᑯᑦ, ᑐᓕᒫᖏᑦ ᓇᐱᓯᒪᑦᓱᑎᒃ, ᐳᕙᖓ ᑭᓚᑦᓯᒪᒐᓚᑦᓱᓂ ᐸᒥᐊᓪᓗᖓᓗ ᓯᖁᒻᒪᖃᕐᓱᓂ,  ᐴᓂᓗ ᐊᕐᓇᖓᓗ ᒥᐊᔨ ᐃᓱᒫᓗᕐᕈᐊᓚᐅᔫᒃ ᓂᐊᕐᕐᑯᐊᓯᒪᓂᖓᓂᒃ ᐃᕐᓂᖓᑕᓗ ᓯᕗᓂᑦᓴᕆᓂᐊᕐᑕᖓᓂᒃ ᐃᓱᒫᓗᒍᑎᖃᕐᓱᑎᒃ.

ᑕᕐᕐᑭᓂ ᐱᖓᓲᔪᕐᑐᑦ ᓄᒃᑭᓴᕐᑕᐅᓚᐅᑯᑦᓱᓂ, ᕌᐳᑦ ᐊᓂᕐᕋᓕᕐᓂᖁᖅ. ᐃᓚᖏᑦ ᐃᓄᐃᑦ ᖃᐅᔨᒻᒫᖏᑦ ᓱᒃᑯᐊᕿᓂᕕᓂᕐᒥᓄᑦ ᑐᐹᕐᑕᐅᓯᒪᔪᕆᑦᓯᕋᑕᓚᐅᔪᑦ ᑖᓐᓇ ᐅᕕᒐᕐᑐᖅ ᐅᐃᕖᑦᑑᖑᓱᖃᑦᑕᓚᐅᔪᒻᒪᑦ ᐳᕐᑐᓃᓐᓂᒃ ᒪᕐᕉᓂᒃ ᐃᓕᓐᓂᐊᓱᓂ ᐊᓃᒍᐃᖕᖏᑑᓯᒪᓕᕇᕐᓱᓂ ᓱᒐᓚᖕᖑᐊᕆᐊᒥᒃ ᐊᓕᐊᓐᓂᓴᐅᔮᕐᓱᓂ ᓯᕗᓂᑦᓴᒥᓂᒃ ᐃᓱᒫᓗᓪᓗᐊᕋᓂ. 

ᕌᐳᑦ ᐊᖓᔪᕐᖄᒋᒃ ᐅᓂᒃᑳᑑᒃ ᐊᔪᐃᓐᓇᖃᑦᑕᓚᐅᔪᓂᖓᓂᒃ ᓱᒃᑯᐊᕿᑦᓱᓂ ᖁᐊᕐᓵᓇᕐᑐᑰᕐᓂᕕᓂᕐᒥᓂᒃ ᐊᓂᒍᐃᒐᓱᐊᕐᓱᓂ ᐅᐱᒍᓱᓚᐅᔪᑦᓱᓂᓗ ᐋᓐᓂᐊᕕᒻᒪᕆᐅᑉ ᐱᓇᓱᑦᑎᖏᓐᓂᒃ ᐋᕐᕿᑕᐅᓚᕿᓯᒪᒐᒥ. Facebook-ᒥ ᕌᐳᑦ ᐊᓪᓚᓯᒪᔪᖅ ᐋᓐᓂᐊᕕᐅᑉ ᐱᓇᓱᑦᑎᖏᓐᓂᒃ ᓇᑯᕐᓴᓱᓂ ᐃᑲᔪᕐᑕᐅᖃᑦᑕᓚᐅᔪᒐᒥ ᖃᐅᑕᒫᑦ. (Facebook-ᖓᓂ ᕌᐳᑦ ᐋᑕᒥ).

ᑭᓯᐊᓂ ᕌᐳᑦ ᐊᓂᕐᕋᓯᒪᓕᕐᓱᓂ ᐃᓕᑦᓯᒐᓱᐊᕆᐊᖃᓚᐅᕐᑐᖅ ᐃᓅᒋᐊᒥᒃ ᖃᕆᑕᖓ ᓱᕐᕋᑕᐅᓯᒪᑎᓪᓗᒍ. ᐊᕐᓱᕈᓐᓇᖃᑦᑕᓚᐅᕐᑐᖅ ᐃᓚᖓᓂ ᐃᑉᐱᒍᓱᑦᓯᐊᕋᓱᐊᕆᐊᒥᒃ. ᐊᐅᓚᔨᒍᑎᖓ ᖃᒻᒥᓂᑕᕐᓂᒃ ᐱᓀᓗᑕᕆᖃᑦᑕᓱᒍ. ᑌᒣᒐᓗᐊᕐᑎᓗᒍ, ᐃᓕᓴᕐᕕᒧᑦ ᐅᑎᓕᓚᐅᕐᑐᖅ ᐱᔭᕇᒍᓯᒍᓐᓇᓯᒐᓱᐊᓯᑦᓱᓂ. ᐊᒻᒪᓗᓗᐊᖕᖑᐊᖅ basket-ball-ᖃᑦᑕᓕᕐᓱᓂ ᓱᖃᑦᓯᓂᐅᑎᓪᓗᒍ ᐊᓕᐊᒋᓂᕐᐹᒥᓂᒃ,  ᐃᑦᔭᓯᒐᓱᐊᕐᓱᓂ ᐱᓯᑐᖁᑎᒥᓂᒃ LeBron James-ᒥᒃ ᖃᓄᓕᒫᖅ.

ᐴᓂ ᐋᑕᒥᐅᑉ ᑕᑯᓐᓇᑕᖓᒍᑦ, ᕌᐳᑦ ᐊᔪᐃᓐᓇᓯᑎᐅᓯᒪᔪᖅ.  ᐊᕐᕐᑯᓈᕐᑎᓯᒪᔪᕕᓂᒻᒪᕆᐅᑦᓱᓂ ᐃᕐᓂᖓ ᐱᖓᓲᔪᕐᑐᓂᒃ ᐃᑎᒐᓂᒃ ᑕᑭᓂᓕᒃ, ᓄᒃᑭᓴᕐᑎᐅᓱᓂᓗ ᐊᑦᑕᓇᕐᑐᒦᑦᓵᓛᕈᓐᓀᓂᖓ ᐃᓱᒪᓇᖕᖑᐊᖃᑦᑕᓚᐅᔫᖅ. 

ᕌᐳᑦ ᖁᕝᕕᑯᕕᒻᒥᑦ ᐊᓂᔪᖅ ᓄᔭᖏᑦ ᐋᕐᕿᓯᒪᑦᓯᐊᓕᕐᓱᑎᒃ, ᐊᑖᑕᒻᒥᓄᑦ ᐊᐃᔪᖅ.

ᐴᓂ ᐋᑕᒥ ᐊᐅᓚᔨᔪᖅ ᐅᖃᐅᑏᑦᓱᓂ : “ᐃᑉᐱᒍᓱᑦᓯᐊᓚᖓᕗᑎᑦ”.

“ᐃᑉᐱᒍᓱᑦᓯᐊᓚᖓᕗᖓ”, ᕌᐳᑦ ᐅᖃᕐᑐᖅ, ᐅᑯᑦᓱᓂ ᐊᑖᑕᒥᓂᒃ ᑯᓂᑦᓱᓂ ᖃᐅᖓᒍᑦ ᐊᓂᓚᐅᕋᓂ.

“ᓇᓪᓕᒋᕙᒋᑦ ᐊᑖᑖᖅ. ᑕᑰᑎᓂᐊᕐᖁᒍᒃ.”

ᐴᓂ ᐋᑕᒥ ᖃᐅᔨᒪᓐᓂᖏᑦᑐᖅ ᓱᓇᐅᕝᕙ ᐃᓅᖏᓐᓈᑎᓪᓗᒍ ᐃᕐᓂᒥᒃ ᑕᑯᓱᖓᓕᕐᓱᓂ. 

ᐃᓚᒌᑦ 2017-ᒥ. (ᓴᐅᒥᐊᓂᑦ ᑕᓕᕐᐱᐊᓄᑦ) ᑐᓄᐊᓃᑦᑐᑦ : ᕌᐳᑦ ᐋᑕᒥ, ᐊᖓᔪᖓ ᓇᐃᑦᔪᓪ. ᕿᑎᖓᓂ : ᓲᓴᓐ ᐊᒻᒪᓗ ᕕᐅᓇ, ᕌᐳᑦ ᓇᔭᒋᒃ, ᐊᓈᓇᖓ ᒥᐊᔨ, ᓇᔭᖓ ᔨᐊᓂᕗ, ᐊᑖᑕᖓ ᐴᓂ
ᐋᑕᒥ, ᕌᐳᑦ ᓇᔭᖓ Zoe ᐊᒻᒪᓗ ᐊᖓᔪᖓ ᒫᑯᓯ. ᓯᕗᕌᓂ : Zoe-ᐅᑉ ᐃᕐᓂᖓ ᑌᕕᒃᑦ ᕌᐳᑦᓗ ᓇᔭᖓ ᓄᖃᕐᓯᐹᖅ ᐃᓕᓴᐱ (ᐴᓂ ᐋᑕᒥᐅᑉ ᐊᑦᔨᖑᐊᖁᑎᖓ).

ᐴᓂ ᐋᑕᒥ ᐊᐅᓚᔨᔪᖅ ᐅᖄᓚᐅᑎᒃ ᓯᕙᓂᕐᑎᓗᒍ ᑌᑲᓂ ᐅᓐᓄᐊᒥ 11-ᖕᖑᒥ. ᓱᓇᐅᕝᕙ ᐊᖓᔪᑦᓯᐹᖁᑎᖓ ᐸᓂᖓ Zoe.

ᓱᓇᐅᕝᕙᒎᖅ ᕌᐳᑦ ᐋᓐᓂᐊᕕᒻᒦᑐᖅ ᐱᒻᒪᕆᐊᓗᒻᒥᒃ ᐋᓐᓂᐊᕕᒻᒦᒍᑎᖃᕐᓱᓂ.

(ᖃᓄᖅ ᑐᖁᓐᓂᒪᖔᑦ ᕌᐳᑦ ᖃᐅᔨᒪᔭᐅᑦᓯᐊᑐᖅ ᓄᓇᓕᒻᒥᐅᓄᑦ, ᑭᓯᐊᓂ ᐳᓖᓯᖏᑦ ᑯᐯᒃᑯᑦ (Sûreté du Québec), ᑯᐯᓕᒫᒥ ᐳᓖᓰᑦ, ᐅᖃᕐᓯᒪᔪᑦ ᓱᕐᕐᑯᐃᑐᒥᒃ ᐅᖃᕈᓐᓇᖏᓐᓂᕋᕐᓱᑎᒃ ᐃᕐᕐᑲᑐᐃᕕᒻᒥ ᓱᕐᕐᑯᐃᓯᒍᑎᑦᓭᑦ ᓄᐃᑕᐅᖕᖏᓂᓕᒫᖏᓐᓂ). 

Zoe ᐅᐃᒪᓇᕐᑐᓕᕆᔨ ᐃᑯᐊᓪᓚᑐᕐᓂᐊᑎᐅᑦᓱᓂᓗ, ᐊᓂᕐᕋᖃᓚᐅᕐᑐᖅ ᑲᐱᓐᓂᕕᐅᔪᕕᓂᐅᑉ ᓴᓂᐊᓂ. ᐊᕐᐸᖏᕐᓱᓂ ᐊᓂᐊᐱᒻᒥᓄᑦ ᐁᔪᕕᓂᖅ ᑲᒪᖃᑕᐅᒋᐊᕐᑐᓱᓂ. ᐊᕐᓱᕈᕐᓇᓯᒪᒐᒥ ᐋᓐᓂᓇᓗᐊᕐᒪᑦ ᓱᓕ ᑕᒪᓐᓇ ᐅᖄᒍᒪᖕᖏᑕᖓ ᓇᐅᑐᐃᓐᓇᓄᑦ.

ᐴᓂᓗ ᒥᐊᔨᓗ ᐋᓐᓂᐊᕕᒻᒨᕋᒥᒃ ᐊᐅᓚᔨᔫᒃ ᐁᑉᐸᕆᔭᐅᑎᓪᓗᒋᒃ ᓄᓇᓕᒻᒥ ᐅᐃᒪᓇᕐᑐᓕᕆᔨᓄᑦ ᐃᓗᒪᔭᐅᑦᓱᑎᒃ. ᑌᒪ ᐋᓐᓂᐊᓯᐅᕐᑎ ᓄᐃᓂᐊᓕᕐᒪᑦ. ᐃᓛᓂᐅᖕᖏᑑᕐᑐᖅ, ᖃᓄᓕᒫᖅ ᐊᔪᐃᓐᓇᑐᕕᓂᐅᒐᓗᐊᑦ, ᑭᓯᐊᓂ ᕌᐳᑦ ᐃᓅᒍᓐᓀᑐᖅ.

ᐴᓂᓗ ᒥᐊᔨᓗ ᑕᑯᒍᒪᓂᕋᕐᑑᒃ ᐃᕐᓂᒥᓂᒃ. ᐊᐅᓚᔨᔫᒃ ᖃᐅᖓᒍᑦ ᑯᓂᒍᒪᒋᐊᒥᒃ ᐊᒡᒐᖓᓂᓗ ᑐᒍᒥᐊᕐᓗᑎᒃ ᑭᖑᓪᓕᐹᒥ, ᑭᓯᐊᓂ ᖃᔭᖕᖏᓂᕋᕐᑕᐅᓱᑎᒃ.  ᕌᐳᑦ ᑎᒥᖓ ᓱᕐᖁᐃᓯᒐᓱᐊᕈᑎᑦᓴᐅᓂᐊᓕᕐᒪᑦ ᐊᐅᓪᓚᑎᑕᐅᒋᐊᖃᓕᕐᓱᓂᓗ ᒪᓐᑐᔨᐊᒧᑦ, ᑌᒫᒃ ᐅᖃᐅᑎᔭᐅᑐᐃᓐᓇᑑᒃ.   

ᑐᖁᖓᔪᓂᒃ ᖃᐅᔨᓴᕐᑎᐅᑉ ᑭᓯᐊᓂ ᐊᑦᑐᕈᓐᓇᓂᐊᓕᕐᑕᖓ. 

ᒫᒃ ᐋᑕᒥ, ᕌᐳᑦᑕᐅᑉ ᐊᖓᔪᖓ, ᑲᖏᕐᓱᔪᐊᒥ, ᑳᓇᑕ (ᐊᐃᓕᔅ ᑯᐃᓐ/ᐅᑭᐅᕐᑕᑐᒥ ᑕᑯᓐᓈᑐᖅ).

ᐴᓂ ᐋᑕᒥ ᑭᖑᒧᑦ ᑕᑯᒋᐊᕋᒥ ᐃᕐᓂᖓᑕ ᑐᖁᓂᕕᓂᖓᑕ ᑭᖑᓂᐊᐱᐊᓂ, ᐃᓚᑯᓂᒃ ᐊᐅᓚᔨᔪᖅ: ᐃᓚᑦᓱᒍᓱᓐᓂᕕᓂᖏᓐᓂᒃ ᓲᓱᑦᓴᓂᕕᓂᖏᓐᓂᓗ ᑯᐯᒃᑯᑦ ᐳᓖᓯᖏᑦᑕ ᖃᓪᓗᓈᓂᑦ ᑎᑭᑎᑕᕕᓃᑦ ᖃᐅᔨᓴᕆᐊᕐᑐᑎᑕᐅᑦᓱᑎᒃ, ᑲᒪᑦᓯᐊᓂᖏᓐᓂᒃ ᓯᓚᕐᕐᑲᑎᒥᑕ ᓂᕿᓂᒃ ᐃᑎᕐᓯᖃᑦᑕᓱᑎᒃ, ᐃᓄᓕᕆᔩᓪᓗ ᑎᑭᑎᑕᕕᓃᑦ ᓄᓇᕕᒻᒥ ᐃᓗᓯᓕᕆᔨᒃᑯᓄᑦ (NRBHSS) ᐃᓄᐃᑦ ᐃᓪᓕᕆᔭᖏᓐᓂᒃ ᐱᓇᓱᐊᕈᓯᖏᓐᓂᓗ ᐱᒍᑦᔨᕕᒻᒥᑦ ᐱᓯᒪᑦᓱᑎᒃ ᑰᑦᔪᐊᒥᑦ, ᐃᓄᒃᑎᑐᑦ ᐅᖄᕕᖃᕈᓐᓇᓯᐊᕐᓱᑎᒃ ᐃᓚᒌᓂᒃ. 

ᐃᑉᐱᓂᐊᕐᓇᓚᐅᔪᒻᒥᔪᖅ ᐃᓕᓐᓂᐊᕕᒃ ᐃᕐᕐᑲᐅᒪᓂᖃᕐᑎᓗᒍ ᐃᓕᓵᑦ ᐊᑎᓕᐅᕐᕕᖃᕐᑎᓗᒋᑦ  ᐸᑦᑕᒥᒃ (basketball-ᒥᒃ) ᐃᓱᒪᒍᑎᒋᑦᓱᒍ ᕌᐳᑦᒥᒃ ᐊᓂᕐᕋᐅᔨᑎᑦᓯᓱᑎᓪᓗ ᐃᓚᖏᓐᓂᒃ.  

ᑭᓯᐊᓂ ᑯᐯᒃ ᐳᓖᓯᖏᑦ ᐅᑎᕆᐊᖃᓕᓚᐅᔪᒋᕗᑦ ᖃᓪᓗᓈᑦ ᓄᓇᖓᓄᑦ, ᐃᓄᓕᕆᔩᑦ ᑰᑦᔪᐊᒧᑦ ᐅᑎᕆᐊᖃᓯᒻᒥᓱᑎᒃ, ᓯᓚᕐᕐᑲᑎᖏᓪᓗ ᐳᓛᕆᐊᑲᑕᒍᓐᓀᓱᑎᒃ.  

ᐴᓂ ᐋᑕᒥ ᐱᓇᓱᒐᕐᒥᓄᑦ ᐅᑎᓕᓚᐅᕐᑐᖅ ᑲᒪᔨᒋᔭᐅᑦᓱᓂ ᑲᒡᒋᒥ ᐃᙯᓕᓴᕐᕕᖓᓂ ᑲᖏᕐᓱᔪᐊᑉ ᐃᕐᓂᖓᑕ ᐃᓅᒍᓐᓀᓯᒪᓂᖓᑕ ᐊᓯᐊᓂᒃ ᐃᓱᒪᖔᕈᒪᑦᓱᓂ.

ᑭᓯᐊᓂ ᓲᕐᓗ ᓄᓇᓕᓕᒫᖅ ᑭᑦᓴᓂᕐᒦᓚᐅᕐᑐᖅ, ᐅᖃᕐᑐᖅ ᐋᑕᒥ: ᕌᐳᑦ ᐃᓚᖏᑦ ᐱᖃᑎᖏᓪᓗ, ᒫᑎᐅᓯ ᖃᒧᒑᓘᑉ ᐃᓚᖏᑦ ᐱᖃᑎᖏᓪᓗ, ᑌᓐᓇ ᐊᖑᑎᖅ 32-ᓂᒃ ᐅᑭᐅᓕᖅ ᐸᓯᔭᐅᒍᑎᓕᒃ ᕌᐳᑦᒥᒃ ᐃᓄᐊᕐᑐᕕᓂᐅᓂᕋᕐᑕᐅᓱᓂ; ᐊᒻᒪᓗ ᐊᓯᖏᑦ ᑲᑉᐱᐊᓇᕐᑐᑰᕐᒥᔪᑦ : ᐃᓚᒋᔭᐅᔪᑦ ᐱᖃᑎᒋᔭᐅᔪᓪᓗ ᐊᖑᑎᒧᑦ 30-ᓚᑳᓂᑦ ᐅᑭᐅᓕᒻᒧᑦ ᐃᒻᒥᓂᐊᕐᓯᒪᔪᒧ ᑌᑲᓂ ᐱᓇᓱᐊᕈᓯᐅᑉ ᓄᖕᖑᐊᓂ, ᑎᒥᖓ ᑕᑯᔭᐅᕚᓪᓗᑐᕕᓂᕐᒧᑦ ᒫᑦᔨ 20-ᒥ ᑭᓯᐊᓂ ᐊᖃᒍᐊᓂ ᑕᒐ ᕌᐳᑦ ᐃᓅᒍᓐᓀᑐᕕᓂᐅᑎᓪᓗᒍ. ᑌᒪᓕ ᑕᒐ ᐃᓄᐊᕐᑐᖃᕋᓱᓕᕐᒥᓱᓂ ᒫᑦᔨ 22-ᖑᓕᕐᑎᓗᒍ, ᑎᒍᔭᐅᓂᐊᓕᕐᒥᓱᓂ. 

ᓄᓇᓕᐊᕈᐊᐱᒻᒥ ᐃᓄᓕᒻᒥ 750-ᓂᒃ, ᑕᒪᒃᑯᐊ ᑲᑉᐱᐊᓇᕐᑐᐃᑦ ᖃᓕᕇᑐᐃᓐᓇᓕᕐᑎᓗᒋᑦ ᓲᕐᓗ ᐃᓘᓐᓇᑕ  ᐄᔭᐅᓯᒪᑐᐃᓐᓇᑑᔮᓕᓚᐅᕐᑐᒍᑦ, ᐋᑕᒥ ᐅᖃᕐᑐᖅ.

ᐊᑯᓂᖕᖑᐸᓪᓕᐊᒪᑦ ᐊᕐᓱᕈᓐᓇᓕᕐᐸᓕᐊᑐᐃᓐᓇᓕᓚᐅᕐᑐᖅ ᐋᑕᒥ ᐅᖃᕐᑐᖅ.  ᐃᑉᐱᓂᐊᕐᑐᖅ ᖁᐊᕐᓵᓂᕐᒥᑦ ᓭᒪᕐᖃᔭᐃᕐᓂᒧᑦ, ᑌᒪ ᓂᖕᖓᐅᒪᓂᕐᒧᑦ ᖃᐅᔨᒪᒍᓐᓀᕋᑕᕐᓱᓂ ᑕᒪᓐᓇ ᑭᑦᓴᕈᓯᐅᒐᓗᐊᕐᒪᖔᑦ ᐃᓱᒫᓗᒍᑎᖃᕐᓱᓂᓗ ᐃᓚᒥᓂᒃ. ᒥᐊᔨ ᐊᕐᓱᕈᒻᒥᑎᓗᒍᓕ ᐃᕐᓂᖏᓪᓗ ᕿᐊᑐᐃᓐᓇᓕᕐᑐᑦ. ᐸᓂᖏᑦ ᐊᖓᔪᑦᓰᑦ ᓲᕐᓗ ᐃᑉᐱᓂᐊᕐᖃᔦᕐᑐᑦ. ᐃᓕᓴᐱᓗ ᒥᑭᕐᖑᖓ ᓯᑕᒪᐅᔪᕐᑐᓂᒃ ᐅᑭᐅᓕᒃ, ᑌᒪᖓᑦ ᐊᐱᕐᓱᑐᖅ ᓇᓃᒻᒪᖔᑦ ᕌᐳᑦ ᖃᖓᓗ ᐅᑎᓛᕐᒪᖔᑦ. 

“ᐋᓐᓂᓇᓗᐊᕐᑐᖅ”, ᐅᖃᕐᑐᖅ ᓇᐃᑦᔪᓪ ᐋᑕᒥ, 26-ᓂᒃ ᐅᑭᐅᓕᒃ, ᑭᑦᓴᒍᑎᖃᕐᓱᓂ ᓄᑲᖓᑕ ᐃᓅᒍᓐᓀᓂᕕᓂᖓᓂᒃ. “ᐃᓚᖓᓂ ᓂᖕᖓᐅᒪᓕᑐᐊᕋᒪ ᑐᐸᓚᕿᓲᒍᔪᖓ ᐅᓐᓄᐊᑐᐃᓐᓇᒥ ᑌᒪ ᐊᓂᓂᐊᓕᕋᒪ ᓄᒃᑭᓴᕆᐊᕐᑐᓱᖓ. ᓴᐃᒪᖕᖏᓂᕋ ᐋᓐᓂᐊᓂᕋᓗ ᐊᕝᕓᑎᒐᓱᐊᕐᓱᒋᒃ ᐃᒥᐊᓗᒻᒨᖏᑦᑐᖅ ᐋᖓᔮᓐᓇᑐᕐᑐᓂᐅᖕᖏᑐᒃᑯᓗ” (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ).

ᓄᕐᕋᓕᐅᒥ (ᒣᒥ), ᐴᓂ ᐋᑕᒥ ᐋᓐᓂᐊᕕᓕᐊᓚᐅᔪᖅ ᐃᓱᒪᓕᕆᔨᒻᒪᕆᒻᒧᑦ ᑕᑯᔭᐅᕕᑦᓴᓕᐅᕆᐊᕐᑐᓱᓂ ᐃᓚᒌᓕᒫᒍᓗᑎᒃ.  ᓱᓇᐅᕝᕙᒎᖅ ᐃᓱᒪᓕᕆᔨᒻᒪᕆᒃ ᑎᑭᒐᔭᕐᑎᓗᒍ ᔫᓓ ᕿᑎᖓᓂ ᑭᓯᐊᓂ. ᑕᕐᕐᑮᒃ ᒪᕐᕉᒃ ᐊᓂᒍᕐᐸᓃᒃ ᑭᓯᐊᓂ. (ᑭᐅᔭᐅᒍᑎᒋᓯᒪᔭᖓ ᐅᑭᐅᕐᑕᑐᒥ ᑕᑯᓐᓇᑑᑉ ᑐᑭᓯᒐᓱᐊᖃᑦᑕᑎᓪᓗᒍ ᓯᑉᑎᒻᐱᕆᒥᓂᑦ, ᓄᓇᕕᒻᒥ ᐃᓗᓯᓕᕆᔨᒃᑯᑦ ᖃᐅᔨᒐᓱᐊᕐᐸᑲᓗᐊᕐᓱᑎᒎᖅ ᖃᖓ ᐃᓱᒪᓕᕆᔨᒻᒪᕆᒃ ᑐᑭᑦᑐᓴᒫᒍᒻᒪᖔᑦ ᑲᖏᕐᓱᔪᐊᒧᑦ ᑭᓯᐊᓂ ᑖᒃᑯᐊ ᑐᓴᕋᑦᓴᓕᐊᒍᓯᒪᔪᑦ ᓄᐃᑐᐃᓐᓇᕋᑕᕐᑎᓗᒋᑦ ᑭᐅᔭᐅᕋᑕᕐᓂᖏᑦᑐᑦ.)  

ᐋᑕᒥ ᐊᐅᓚᔨᔪᖅ ᖃᕆᑕᐅᔭᒧᑦ ᓴᖑᑐᐃᓐᓇᕋᑕᕐᓱᓂ, ᕿᓂᕋᓱᐊᓯᑦᓱᓂ ᓴᐳᑦᔨᓯᒪᓲᓂᒃ ᐃᓄᐊᕐᑕᐅᓯᒪᔨᐊᓕᓐᓂᒃ ᕿᑐᕐᖓᒥᓂᒃ.  ᓄᓇᕕᒻᒥ ᓇᕝᕚᖏᓐᓇᒥ ᕿᓂᓯᓕᕐᓂᒥᔪᖅ ᐊᓯᖏᓐᓂ ᐃᓄᐃᑦ ᓄᓇᖏᓐᓂ ᑲᓇᑕᒥ ᓄᓇᕗᑦ ᓄᓇᓕᖁᑎᖏᓐᓂ.  ᑌᑲᓂ Facebook-ᑯᑦ ᐊᑖᑕᒋᔭᐅᔪᑦ ᕿᑐᕐᙰᓯᒪᓂᕐᒧᑦ ᑭᑦᓴᑐᑦ ᐅᖄᕕᑦᓴᖓᓂᒃ ᑕᑯᑦᓴᓚᐅᕈᓂᓪᓗᓃᑦ ᐊᑭᑐᑦᓴᓱᓂ, ᐃᑲᔪᕐᓯᒐᔭᕐᒪᑦ.  

ᑭᓯᐊᓂ ᓇᕝᕚᖏᑦᑐᖅ.

ᑯᒻᒪᓱᓕᕋᒥ, ᐅᖄᕕᖃᓯᓐᓂᒥᔪᖅ ᑲᓇᑕᓕᒫᒥ ᖃᐅᔨᒐᓱᐊᕐᑎᓂᒃ ᐊᓯᐅᒋᓐᓇᓯᒪᔪᓂᒃ ᐃᓄᐊᕐᑕᐅᓯᒪᔪᓂᓪᓗ ᓄᓇᖃᕐᕐᑳᓯᒪᔪᓂᒃ ᐊᕐᓇᓂᒃ – ᑎᒥᐅᑦᓱᓂ ᐃᓂᓪᓚᑕᕕᓂᖅ 2016-ᒥ ᕿᒥᕐᕈᓂᐊᕐᑎᓗᒍ ᐳᕐᑐᓂᖏᓐᓂᒃ ᐱᓗᑲᑦᑕᐅᖃᑦᑕᑐᑦ ᐃᓄᐃᑦ, ᐊᓪᓓᑦ ᐊᓪᓚᖓᔪᐃᓪᓗ ᐊᕐᓀᑦ ᐸᓂᐊᐲᓪᓗ – ᐃᑲᔪᕐᑕᐅᒍᒪᑦᓱᓂ ᐃᑲᔪᕐᑕᐅᒍᑎᑦᓴᓂᓗ ᕿᓂᕐᓱᓂ.  ᑭᓯᐊᓂ ᑎᓕᔭᐅᒍᑎᒋᓯᒪᔭᖏᑦ ᒪᓕᑦᓱᒋᑦ, ᐃᑲᔪᕈᓐᓇᓗᐊᕐᓂᔭᖏᒻᒥᔪᑦ, ᐋᑕᒥ ᐅᖃᕐᑐᖅ, ᑕᑯᑎᑦᓯᓱᓂ ᖃᕆᑕᐅᔭᒃᑯᑦ ᐊᓪᓚᑕᕕᓂᕐᒥᓂᒃ ᑌᒃᑯᓄᖓ, ᐊᓪᓚᑕᕕᓂᖏᑦᑕ ᐃᓚᖓ ᐊᒥᓱᒻᒪᕆᓐᓄᑦ ᓄᓇᕐᖄᓯᒪᔪᑦ ᑎᒥᖁᑎᖏᓐᓄᑦ ᑲᕙᒪᑐᖃᒃᑯᑦ ᑯᐯᒃᑯᓗ ᐱᓂᐊᕐᓂᓕᕆᔨᖏᓐᓄᑦ ᐃᓄᓐᓄᓗ ᓯᕗᓕᕐᑎᓄᑦ ᐊᓪᓚᖃᑦᑕᓯᒪᓕᕐᓱᓂ ᐃᑲᔪᕐᑕᐅᒍᒪᑦᓱᓂ.   

ᐋᑕᒥ ᐅᖃᕐᓯᒪᔪᖅ ᑌᑲᓂ ᓲᕐᓗ ᐃᑲᔪᕐᑎᓴᓕᒫᑦ ᓄᖑᓯᒪᔪᑦ.

ᓯᕗᓪᓕᒥ ᓯᖁᒥᓯᒪᔪᑎᑦᑐᑦ ᐃᑉᐱᓂᐊᓚᐅᔫᖅ, ᐅᖃᕐᑐᖅ ᐋᑕᒥ ᑭᓯᐊᓂ ᓂᖕᖓᐅᒪᓂᕐᑖᓕᓚᐅᔪᒻᒥᔪᖅ.

“ᐃᓄᐊᕐᑕᐅᓯᒪᔪᒥᒃ ᐃᕐᓂᖃᕐᓱᓂ ᐱᖃᑎᒃᑲᓗ ᓄᓇᓕᒻᒥ ᐃᒻᒥᓂᒃ ᕿᒥᖃᑦᑕᑐᑦ, ᓲᕐᓗ ᓇᒧᑦ ᕿᕕᐊᕆᐊᑕᒫᑦ, ᕿᑐᕐᖓᒪᓗ ᐱᖃᓐᓈᖏᑦ ᐃᒻᒥᓂᒃ ᕿᒥᖃᑦᑕᑐᑦ ᓇᒧᑦ ᕿᕕᐊᕆᐊᑕᒫᑦ ᐱᓂᐊᕐᓂᓕᕆᔩᑦ ᓱᓇᐅᑦᔭᖏᑦᑐᓂᒃ ᐹᒍᑎᖃᑐᐃᓐᓇᑎᓪᓗᒋᑦ” ᐅᖃᕐᑐᖅ ᐋᑕᒥ.  

“ᐃᑲᔪᕐᑕᐅᒍᒪᒐᓗᐊᕐᓱᑕ ᑭᓯᐊᓂ ᐃᑲᔪᕈᒪᔪᖃᕐᑑᔮᖕᖏᑐᖅ. ᓇᐅᒥᓪᓗᓃᑦ, ᐱᓂᐊᕐᓂᓕᕆᔩᓪᓗᓃᑦ ᐃᓄᑐᐃᓐᓀᑦ.  ᐱᓂᕐᓗᕕᐅᖃᑦᑕᑐᓂᒃ ᐃᓚᖏᓐᓂᓗ ᐃᒻᒥᓂᕿᐅᑦᔨᑎᑦᓯᑐᐃᓐᓇᑐᑦ ᐋᓐᓂᐊᕈᑎᒋᔭᖏᓐᓂᒃ.  ᓲᕐᓗ ᑕᐅᑐᖕᖏᑐᖅ ᑕᓯᐅᕐᑐᖅ ᑕᐅᑐᖕᖏᑐᒥᒃ ᑐᓵᖕᖏᑐᕐᓗ ᑕᓯᐅᕐᑐᖅ ᑐᓵᖕᖏᑐᒥᒃ. 

ᒪᒥᖃᑎᒌᒐᓱᐊᕋᓗᐊᕐᑐᒍᑦ ᖃᔭᑦᔭᒐᑕ ᐃᓘᓐᓇᑕ ᐋᓐᓂᐊᔪᐃᓐᓇᐅᒐᑦᑕ ᑕᒫᓂ ᑭᓇᒥᓪᓗᓃᑦ ᐃᑲᔪᕐᑎᓴᖃᑦᔭᒐᑕ. 


ᒥᐊᔨ ᐱᓗᕐᑑᑦ, ᑲᖏᕐᓱᔪᐊᑉ ᖃᓄᐃᖕᖏᓯᐊᕐᓂᓕᕆᓂᕐᒧᑦ ᑲᑎᒪᔨᖏᑦᑕ ᐊᖓᔪᕐᖄᖓᑦ ᓯᕗᓕᕐᑎᐅᓯᒪᑦᓱᓂᓗ ᓄᓇᓕᒻᒥ (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᓄᓇᓕᖓ

ᑲᖏᕐᓱᔪᐊᖅ ᐃᓄᓕᒃ 750-ᓂᒃ ᑯᐯᒃ ᐅᑭᐅᕐᑕᑐᖓᓂ ᑎᒻᒥᔫᒃᑯᑦ ᑭᓯᐊᓂ ᑎᑭᑕᐅᒍᓐᓇᓱᓂ, 350 km ᓇᐹᕐᑐᓕᐅᑉ ᖁᓛᓂ.

ᑲᖏᕐᓱᔪᐊᖅ ᐃᓂᖃᕐᑐᖅ ᐃᑭᕋᓴᕐᔪᐊᒥ ᐊᕐᕐᑯᑎᓪᓚᕆᐅᑦᓱᓂᓗ ᐱᖑᐊᓗᐃᑦ ᒥᕐᖑᐃᓯᕐᕕᖓᓄᑦ, ᓄᓇ ᐅᖑᒪᔭᐅᔪᖅ ᐅᑭᐅᕐᑕᑐᒥᐅᔭᐅᑦᓱᓂ ᐆᒪᔪᖃᕐᓱᓂᓗ ᑲᑕᕝᕕᐅᓚᐅᕐᑐᕕᓂᐅᑦᓱᓂ ᐅᔭᕌᓗᒻᒧᑦ ᑕᓯᕈᕐᓯᒪᔪᖅ ᑲᑭᐊᑦᑐᒥᒃ ᑐᖑᔪᕐᑕᒥᒃ ᐃᒪᖃᕐᓱᓂ ᑕᑯᔭᕐᑐᑕᐅᕙᓐᓂᐊᑎᓪᓗᒍ ᐱᕙᓪᓕᐊᑎᑕᐅᔪᖅ. 

ᑕᒪᓐᓇ ᐃᓄᑦᑕᖃᖃᑦᑕᓯᒪᔪᖅ ᐊᒥᓱᐃᓂᒃ ᑭᖑᕚᕇᓂᒃ ᓄᑦᑎᑕᕐᑐᓂᒃ.  ᓄᑦᑎᑲᑦᑕᖃᑦᑕᓯᒪᔪᑦ ᓯᑯᕙᓪᓕᐊᓂᖅ ᓯᑯᐃᖁᕐᐸᓕᐊᓂᕐᓗ ᒪᓕᑦᓱᒍ ᑎᒻᒥᐊᓗ ᑎᑭᒍᓯᖏᑦ ᐅᑎᕈᓯᖏᓪᓗ ᒪᓕᑦᓱᒋᑦ ᑕᕆᐅᕐᒥᐅᑕᕐᑐᔫᒍᓂᕐᓗ ᐱᑦᔪᑎᒋᑦᓱᒍ.  ᑭᓯᐊᓂ ᑲᕙᒪᑐᖃᒃᑯᓄᑦ ᓄᑦᑎᑕᐅᓯᒪᔪᑦ ᐅᓪᓗᒥ ᑲᖏᕐᓱᔪᐊᖅ ᓚᔭᐅᓕᕐᑐᒧᑦ 1900 ᕿᑎᖏᓐᓂ ᐱᒋᐊᕐᓱᑎᒃ.  

ᐱᓇᓱᒐᓕᒫᑲᓵᑦ 9-ᒥᑦ 5-ᒧᑦ ᐱᓇᓱᒐᕆᔭᐅᔪᑦ ᐃᓄᓐᓄᑦ ᑲᕙᒪᓄᐊᖓᕙᓪᓗᑐᑦ, ᓄᓇᓕᐅᑉ ᑲᕙᒫᐱᖓᓂ ᐱᓇᓱᒉᑦ ᐅᕝᕙᓘᓐᓃᑦ ᓇᓪᓕᑐᐃᓐᓇᖓᓂ ᓄᓇᕕᒻᒥ ᐊᐅᓚᑦᓯᓂᐅᑉ ᑎᒥᖁᑎᖏᓐᓂ.  ᐃᓚᖏᑦ ᓈᒻᒪᓯᑦᑕᕈᑦᔭᐅᓱᑎᒃ ᑎᒻᒥᔫᒃᑯᑦ ᐱᓇᓱᒋᐊᕐᑐᓲᑦ ᐅᔭᕋᓐᓂᐊᕕᒻᒧᑦ, 100 km-ᓂᒃ ᐅᖓᓯᓐᓂᖃᕐᑐᒧᑦ ᓄᓇᓕᒻᒥᒃ. 

ᑭᓯᐊᓂ ᐊᒥᓱᓄᑦ ᐃᓚᒌᓄᑦ ᓄᓇᓕᒻᒥ ᐃᓅᖃᑎᒌᓐᓂᖅ ᒪᖃᐃᓐᓂᒨᓕᖓᓂᕐᓴᖅ ᐅᒪᔪᕐᓂᐊᓂᒃᑯᑦ ᓂᕿᑦᓴᓯᐅᕐᓱᑎᒃ. ᐆᑦᑑᑎᒋᓗᒍ ᖁᐊᕐᑕᒥᐅᑦ 138 km-ᓄᑦ ᓯᕿᓂᕐᓯᒦᑦᑐᑦ ᐅᐱᕐᖓᓴᖅ ᕿᓚᓗᒐᕐᓄᑦ ᐊᕐᕐᑯᓵᕐᑕᕕᓂᐅᓂᕋᕐᒪᑕ ᑲᖏᕐᓱᔪᐊᑉ ᒥᑦᓵᓄᑦ ᐃᖏᕐᕋᓂᕃᑦᓱᑎᒃ, ᓄᓇᓕᐅᑉ Facebook-ᖓ ᕿᑲᑦᔭᒍᓐᓀᓚᐅᔫᖅ ᓄᓇᓕᒻᒥᓗ ᐊᖑᓇᓱᑦᑏᑦ ᑕᑯᑦᓴᐅᓕᕐᓱᑎᒃ ᖃᔭᕆᐊᒥᓂᒃ ᐊᑐᐃᓐᓇᕈᕐᑎᕆᔪᑦ. 

ᑲᖏᕐᓱᔪᐊᖅ, ᑯᐯᒃᒥ (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᓯᓚᑖᓂᑦ ᑕᑯᑦᓱᒍ, ᑲᖏᕐᓱᔪᐊᖅ ᓱᓇᓕᒫᓕᐅᔮᕐᑐᖅ. ᑭᓯᐊᓂ ᓄᓇᓕᓐᓂᑦ ᑖᒃᑯᓂᖓᑦᓭᓇᖅ ᐃᓅᓯᐅᑉ ᐱᓀᓗᑕᖏᓐᓂᒃ ᐹᖃᑎᖃᕐᑑᔮᑐᐃᓐᓇᒥᑦᓱᓂ ᐊᓯᖏᑦᑕᐅᖅ ᓄᓇᕕᐅᑉ ᓄᓇᓕᖁᑎᖏᑦ ᑌᒣᒻᒥᒪᑕ. – ᐃᒻᒥᓂᐊᕐᓂᖅ ᐳᕐᑐᓂᕐᓴᖅ ᖁᓕᕕᓪᓗᐊᑑᑉ ᐅᖓᑖᓄᑦ ᑲᓇᑕᒥᐅᑦ ᐊᓯᖏᑦ ᑕᑯᔭᐅᒍᑎᒃ, ᐃᒥᐊᓗᒃ ᐋᖓᔮᓐᓇᑐᐃᓪᓗ ᐃᓱᒣᓐᓇᖅ ᐊᑐᕐᓂᓗᑦᑕᐅᔪᑦ; ᐱᔮᕐᓲᑎᓂᖅ ᐱᒋᔭᐅᔪᓂᓪᓗ ᓱᒃᑯᐊᑎᕆᓂᖅ ᓱᓕ ᑲᓇᑕᒥᐅᑦ ᐊᓯᕗᑦ ᑕᑯᒍᑦᑎᒋ ᐳᕐᑐᓂᕐᐸᐅᖃᑕᐅᔪᖅ; ᐃᓕᓐᓂᐊᕈᓐᓇᕕᖃᑦᓯᐊᖏᑦᑐᑦ ᐱᓇᓱᒐᖃᖕᖏᑐᓪᓗ 23.7 ᐳᓴᒦᑦᓱᓂ ᑭᖑᓪᓕᐹᖅ ᑭᓯᑦᓯᓂᐅᓚᐅᔪᖅ ᑕᑯᑦᓱᒍ, ᑯᐯᒻᒥᓗ ᑲᓇᑕᒥᓪᓗ 7 ᐳᓴᑐᐃᓐᓇᖏᑦ ᐱᓇᓱᒐᖃᖕᖏᑑᑎᓪᓗᒋᑦ. 

ᓄᓇᕕᒻᒥ ᐱᓐᓀᓗᑌᑦ ᐃᓅᓯᕐᒧᐊᖓᔪᑦ ᐱᑐᑦᓯᒪᓂᖃᕐᑐᑦ ᑲᓇᑕᐅᑉ ᐅᑭᐅᕐᑕᑐᒥᒃ ᐊᐅᓚᑦᓯᓚᕆᑦᓯᒪᓂᖓᓄᑦ – ᐃᓄᓐᓂᒃ ᓄᓇᑦᑎᓯᖃᑦᑕᓯᒪᓂᖓ ᑲᕙᒪᑐᖃᒃᑯᑦ, ᐃᓕᓐᓂᐊᕆᐊᕐᑎᑕᐅᓯᒪᓂᖏᑦ ᐊᓂᕐᕋᒥᓂᒃ ᕿᒣᑎᑕᐅᑦᓱᑎᒃ ᓄᓇᖃᕐᖄᓯᒪᔪᓂᒃ ᐊᓯᐅᒋᓐᓇᑎᑦᓯᒐᓱᐊᕐᓱᑎᒃ ᖃᓪᓗᓈᖕᖑᑎᒐᓱᐊᕐᓱᒋᑦ, ᕿᒻᒦᔭᕐᑕᐅᓯᒪᓂᖅ ᐳᑭᕐᑕᓕᓐᓄᑦ 1950-ᓂᒃ 1960-ᓂᓪᓗ ᒪᙯᑦᑏᑦ ᐳᓖᓯᑕᐅᒪᔪᕐᑎᑐᑦ ᐊᓂᕐᕋᓯᒣᓐᓇᓚᕿᑎᓪᓗᒋᑦ, ᓯᖁᒥᑦᓱᒋᑦ ᐊᒥᓱᑦ ᐃᓄᐃᑦ ᐃᓚᒌᑦ ᐱᐅᓯᑐᖃᕐᒥᒍᑦ ᐃᓅᒐᓱᐊᕈᓯᖏᑦ. 

ᑕᒪᒃᑯᐊ ᐊᓪᓚᑕᐅᓯᒪᒐᓗᐊᕐᓱᑎᒃ ᐃᓕᑕᕆᔭᐅᒐᓗᐊᕐᓱᑎᒃ ᐱᑦᔪᑕᐅᓯᒪᓪᓚᕆᑦᑐᑦ, ᓄᓇᕕᒃ ᓱᓕ ᐱᓇᓱᐊᕈᑎᑦᓴᖃᖕᖏᑐᖅ ᐃᑲᔪᕋᓱᐊᕈᑎᑦᓴᓂᒃ ᐃᓄᖁᑎᖏᑦᑕ ᓵᖕᖓᒋᐊᖃᖃᑦᑕᑕᖏᓐᓂᒃ ᐱᑦᔪᑎᐅᔪᓂᒃ ᐃᓄᖃᓕᕐᓱᓂ 13,000 ᒐᓛᓂᒃ.  ᓄᓇᕕᐅᑉ ᓄᓇᓕᖁᑎᖏᑦ ᐃᓄᒋᐊᑭᓐᓂᓭᑦ ᐆᑦᑑᑎᒋᑦᓱᒍ ᑲᖏᕐᓱᔪᐊᖅ ᐋᓐᓂᐊᓯᐅᑎᑐᐃᓐᓇᓄᑦ ᐃᖏᕐᕋᑎᑕᐅᔪᑦ.  ᐱᓇᓱᑦᑎᖃᕐᓱᑎᒃ ᖃᓪᓗᓈᓂᑦ ᐱᓯᒪᕙᓪᓗᑐᓂᒃ, ᓄᕐᕐᑫᓇᕐᑕᓂᖏᓪᓗ ᐳᕐᑐᔪᒻᒪᕆᐅᑦᓱᓂ.  ᑖᒃᑯᐊ ᓄᓇᓕᐊᕈᐃᑦ ᐊᑌᓐᓇᑐᓂᒃ ᐋᓐᓂᐊᓯᐅᑎᒻᒪᕆᖃᑦᔭᖏᒻᒥᔪᑦ ᐃᓱᒪᓕᕆᔨᒻᒪᕆᓐᓂᓗ.  

ᓄᓇᕕᒻᒥ ᐱᓗᑲᓐᓂᖅ ᐱᔮᕐᓲᑎᓂᕐᓗ ᐳᕐᑐᔪᒻᒪᕆᐅᒐᓗᐊᕐᑎᓗᒍ;  ᓄᓇᕕᒃ ᑎᒻᒥᔫᒃᑯᑦ ᑎᑭᑦᑕᑐᓄᑦ ᐃᕐᕐᑲᑐᐃᕕᓕᕆᓂᕐᒥᒃ ᐱᒍᑦᔭᐅᓲᖅ ᖃᓪᓗᓈᑦ ᓄᓇᖓᓂᑦ ᑯᐯᒻᒥᑦ ᐱᔪᓄᑦ.  ᐅᑭᐅᕐᑕᑑᑉ ᓯᓚᖓ ᑐᑭᖃᓲᒍᒻᒥᔪᖅ ᐃᕐᕐᑲᑐᕐᑕᐅᒋᐊᓖᑦ ᑭᖑᕙᕆᕐᑕᐅᑲᑦᑕᑐᑦ ᑕᕐᕐᑭᓄᑦ ᐊᒥᓱᓄᑦ ᑭᖑᕙᕆᐊᕐᑕᐅᖃᑦᑕᓱᑎᒃ ᑕᒪᓐᓇ ᓈᒻᒪᒋᔭᐅᑲᓵᒐᔭᕐᑎᓇᒍ ᖃᓪᓗᓈᑦ ᓄᓇᖓᓂ.  ᐊᒥᓱᓪᓗ ᐱᖁᔭᓕᕆᓂᒃᑯᑦ ᐊᑐᕐᑕᐅᓲᑦ ᐆᑦᑑᑎᒋᓗᒍ ᑲᒪᑦᑌᓕᒋᐊᖃᕐᓂᖅ ᐱᓂᕐᓗᕕᕕᓂᕐᒥᓂᒃ ᐊᑑᑎᖃᑦᔭᒐᑎᒃ ᑎᒻᒥᔫᒃᑯᑦ ᑭᓯᐊᓂ ᑎᑭᑕᐅᒍᓐᓇᑐᓄᑦ ᓄᓇᓕᐊᕈᐊᐱᓐᓄᑦ.  

ᑲᖏᕐᓱᔪᐊᑉ ᑲᖏᕐᓱᖓ ᑕᑯᑦᓴᖅ ᑲᖏᕐᓱᔪᐊᒥᑦ. ᑖᓐᓇ ᓄᓇᓕᒃ ᓄᓇᕕᒻᒦᑐᖅ, ᐃᓚᒋᔭᐅᔪᖅ ᓯᑕᒪᓄᑦ ᐃᓄᑐᐃᓐᓀᑦ ᓄᓇᖏᓐᓄᑦ ᑲᓇᑕᒥ: ᐃᓚᒋᔭᐅᑎᓪᓗᒋᑦ ᐱᖓᓱᑦ ᐅᑯᐊ: ᐃᓄᕕᐊᓗᐃᑦ ᐅᑭᐅᕐᑕᑑᑉ ᐅᐊᓐᓇᖓᓂ, ᓄᓇᕗᑦ ᓄᓇᖁᑎᖓ ᐊᒻᒪᓗ ᓄᓇᑦᓯᐊᕗᑦ ᓂᐅᕙᓐᓛᒥ ᓛᐸᑐᐊᒥᓗ. ᑲᓇᑕᒥ ᑌᔭᐅᒍᓯᖃᕐᑐᑦ ᐃᓄᐃᑦ ᓄᓇᖓᑦ. (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᐴᓂ ᐋᑕᒥ ᐱᕈᕐᓴᓯᒪᔪᖅ ᓂᐅᕙᓐᓛᓗ ᓛᐸᑐᐊᓗ ᐃᓄᑐᐃᓐᓇᖃᐅᑎᖏᓐᓂ ᑭᓯᐊᓂ ᒐᓗᐊᕐᓱᓂ ᓄᓇᕕᐅᑉ ᓄᓇᑖᕐᓂᒧᑦ ᐊᖏᖃᑎᒌᒍᑎᒋᓯᒪᔭᖓᓄᑦ ᐃᓚᐅᔫᒍᑎᓕᒃ ᐊᓈᓇᖓᑕ ᐃᓚᖏᑦ ᐱᑦᔪᑎᒋᑦᓱᒋᑦ.  ᐴᓂ ᐅᖃᕐᑐᖅ ᑲᓇᑕᒥ ᐃᓄᐃᑦ ᓄᓇᖏᑦᑕ ᐱᒍᑦᔭᐅᒍᑎᖃᓪᓗᐊᖏᓐᓂᖓ ᐱᕙᓪᓕᐊᑎᑦᓯᑐᐃᓐᓇᑐᖅ ᑭᖑᕚᕇᑦ ᐊᕐᓱᕈᓐᓇᑐᒃᑰᓯᒪᓂᖓᓂᒃ ᐱᔮᕐᓲᑎᓂᕐᓗ ᐊᔪᒉᒋᔭᐅᑦᔭᒍᓐᓀᓱᓂᓗᓐᓃᑦ ᑕᒪᓐᓇᓗ ᐃᓚᖓᒍᑦ ᐸᓯᑦᓯᒍᑎᒋᑦᓱᒍ ᐃᕐᓂᖓᑕ ᑐᖁᓂᕕᓂᖓᓂᒃ.  

ᐴᓂ ᐋᑕᒥ ᐅᓂᒃᑲᐅᔨᔪᖅ ᐋᓐᓂᑎᕐᑕᐅᖃᑦᑕᓂᕕᓂᕐᒥᓂᒃ ᑎᒥᒃᑯᑦ ᐃᓱᒪᒥᒍᓪᓗ ᐱᐊᕋᐅᓂᓕᒫᒥᓂ, ᑕᒪᓐᓇᓗ ᑌᒣᓚᕿᔪᕕᓂᐅᓂᕋᕐᑕᖓ ᐊᖓᔪᕐᕐᑳᖏᑦᑕ ᖃᓄᐃᓕᐅᕐᑕᐅᓯᒪᓂᖏᓐᓄᑦ ᐃᓕᓐᓂᐊᕆᐊᕐᓯᒪᑦᓱᑎᒃ.  ᐊᓂᕐᕋᐅᑉ ᓯᓚᑖᓂ, ᐴᓂ ᐊᒥᓱᕕᑦᓱᓂ ᖁᓄᔪᕐᓂᐊᑕᐅᖃᑦᑕᓯᒪᒻᒥᔪᖅ ᐅᕕᒃᑲᓄᑦ ᐊᖑᑎᓄᓪᓗ ᓄᓇᓕᒻᒥᓂ, ᑰᔅ ᐯ-ᓚᔭᐅᖃᑦᑕᓯᒪᔪᒥ.  ᐋᑕᒥ ᐅᖃᕐᒥᔪᖅ ᑕᒪᓐᓇ ᑌᒫᒃ ᐊᔪᒉᒋᔭᐅᑦᔭᖏᒻᒪᓗᓐᓃᑦ, ᐃᓄᒻᒪᕆᒻᒧᑦ ᐅᖃᕋᓱᐊᑦᓴᕆᐊᒥᓪᓗᓃᑦ ᐃᓱᒪᒐᓱᐊᖃᑦᑕᓯᒪᑦᔭᖏᑦᑐᖓ.  

ᐋᓇ-ᒪᔨ ᑳᔾᑦᕃᑦ, ᐴᓂᐅᑉ ᓇᔭᖓ, ᒪᑭᓪ ᐃᓕᓐᓂᐊᕕᕐᔪᐊᖓᓂ ᓄᓇᕐᖄᓯᒪᔪᑎᒍᑦ ᐃᓄᓕᕆᒍᓐᓇᐅᑎᑖᕐᓯᒪᔪᖅ ᒪᓐᑐᔨᐊᓚᒥ, ᐃᓚᒌᓐᓂᑯᓗ ᐱᐊᕋᕐᓂᐊᑕᐅᖃᑦᑕᓯᒪᔪᖅ, ᐅᖃᕐᑐᖅ ᐃᑦᓯᒎᓐᓂᓗᓐᓂᖅ ᐃᓄᐃᑦ ᓄᓇᓕᖏᓐᓂ ᐅᖄᔭᐅᑦᑌᓕᓲᒍᒻᒪᑦ ᑕᒪᓐᓇ ᐊᓯᑦᔨᓯᒪᓪᓗᐊᔭᖏᑦᑐᖅ ᐊᓂᖓᓗ ᐱᐊᕋᕐᓂᐊᑕᐅᖃᑦᑕᓕᓂᐅᑎᓪᓗᒋᒃ ᐱᐊᕋᐅᑦᓱᑎᒃ. 

“ᐃᓅᒋᐊᖅ ᐅᐱᒍᓱᑉᐳᖓ”, ᐅᖃᕐᑐᖅ ᐋᓇ. “ᑭᓯᐊᓂ ᐃᓚᖓᓂ ᐃᓱᒪᓲᒍᔪᖓ ᐅᖄᖕᖏᓗᐊᓲᒍᔪᒍᑦ ᑲᑉᐱᐊᓱᓐᓂᓴᐅᒐᑦᑕ ᖃᓄᖅ ᐃᓱᒪᒋᔭᐅᓂᐊᕐᒪᖔᑦᑕ ᖃᓪᓗᓈᓄᑦ, ᓱᓕᑦᓯᐊᓂᒃᑯᑦ ᓂᑦᔮᕈᑎᖃᑦᔭᒐᑕ ᓄᓇᓕᑦᑕ ᐱᓀᓗᑖᓗᖏᓐᓂᒃ.  ᑭᓯᐊᓂ ᑕᒪᑐᒪ ᓂᑦᔮᖏᓐᓂᐅᑉ ᐊᑭᖓ ᐊᖏᔪᒻᒪᕆᐊᓗᒃ.”

11-ᓂᒃ ᐅᑭᐅᖃᕐᓱᓂ, ᐴᓂ ᐋᑕᒥ ᐋᖓᔮᓐᓇᑐᓄᓪᓗ ᐃᒥᐊᓗᒻᒧᓗ ᓴᖑᔪᕕᓂᖅ ᓴᖒᒪᒐᓱᐊᕈᑎᒋᓯᑦᓱᒋᒃ. ᐊᓱᐃᓛ ᐋᓐᓂᐊᓂᖓᓂᒃ ᐃᑉᐱᓂᐊᖕᖏᑫᓐᓇᖃᑦᑕᓕᕐᑐᕕᓂᖅ ᑭᓯᐊᓂᓗ ᒪᑐᐃᕐᓯᖃᑦᑕᒥᑦᓱᑎᒃ ᓂᖕᖓᐅᒪᓂᐊᓗᖓᓂᒃ ᖁᓄᔪᕐᓂᐊᑕᐅᖃᑦᑕᓯᒪᓂᕐᒧᑦ.  ᐱᔮᕐᓱᑎᖕᖑᐸᓪᓕᐊᑐᐃᓐᓇᓕᕐᓱᓂ. 

1980-ᒥ, 17-ᓂᒃ ᐅᑭᐅᖃᓕᕐᓱᓂ, ᐋᑕᒥ ᐅᓇᑕᕐᑎᓄᑦ ᐃᓚᐅᓯᓕᕐᓂᒥᔪᖅ ᑭᖑᓪᓕᐹᒥ ᓴᒃᑯᐃᒐᓱᐊᕈᑎᒋᓯᑦᓱᒍ ᓂᖕᖓᐅᒪᓲᒍᓂᕐᒥᓂᒃ, ᑭᓯᐊᓂ ᓄᕐᕐᑲᑎᑕᐅᒋᐊᖃᕐᓂᒥᔪᖅ 1981-ᒥ ᐃᒥᐊᓗᕐᕈᐊᑐᕕᓂᐅᑦᓱᓂ ᐱᒋᐊᖃᑦᑕᓂᓕᕐᓂᕋᒥ ᐅᓇᑕᕐᑎᐅᖃᑎᒥᓂᒃ.  

ᐴᓂ ᐋᑕᒥ ᐱᔭᕇᕈᑎᑖᕐᓱᓂ ᐃᓕᓐᓂᐊᑐᕕᓂᐅᑦᓱᓂ ᑲᓇᑕᐅᑉ ᐅᓇᑕᕐᑎᖁᑎᖏᓐᓂ ᓅᕚ ᓯᑰᓯᐊᒥ. ᐅᓇᑕᕐᑎᓂ ᐱᓇᓱᒐᖃᑦᓯᐊᓗᖓ ᑌᒣᒍᒪᓯᒪᔪᖓ ᑭᓯᐊᓂ ᐅᐃᕆᒪᓂᕐᒧᑦ ᓵᓚᐅᓚᐅᕐᑐᖓ,” ᐅᖃᕐᑐᖅ ᐋᑕᒥ (ᐊᕙᔨᖑᐊᖅ ᐴᓂ ᐋᑕᒥᒦᓂᑕᖅ)

1985-ᒍᓕᕐᑎᓗᒍ ᐃᓅᓯᕐᒥᓂᒃ ᐊᐅᒡᒉᖃᔭᐃᓕᓚᐅᕐᑐᖅ. ᐊᒥᓱᕕᑦᓱᓂ ᑎᒍᔭᐅᒪᕕᒻᒦᖃᑦᑕᓕᕐᓱᓂ, ᓂᐅᕙᐅᓐᓛᓐᑦᒥ ᓛᐸᑐᐊᒥᓗ, ᐋᓐᑎᐊᕆᐅᒥᓗ, ᐊᑦᔨᒌᖕᖏᑐᓂᒃ ᐱᑦᔪᑎᖃᕐᓱᓂ ᐊᖁᖃᑦᑕᓱᓂ ᐋᖓᔮᕐᓱᓂ ᐊᒻᒪᓗ ᐱᒋᐊᕐᓂᖃᑦᑕᓱᓂᓗ. 1985-ᒥ ᐃᕐᖃᑐᐃᕕᒻᒦᓕᕇᕐᓂᒥᔪᖅ, Cornwall-ᒥ ᐋᓐᑎᐊᕆᐅᒥ, ᐋᖓᔮᑦᓱᓂ ᐹᓐᓂᔪᕕᓂᖅ ᐊᖑᑎᒥᒃ ᐋᓐᓂᐊᕕᓕᐊᕈᑦᔭᐅᓚᕿᑦᓱᒍ. ᐃᕐᖃᑐᐃᔨ ᓇᓪᓕᑳᕐᑎᓯᔪᕕᓂᖅ, ᓴᓗᐊᕐᓯᕕᓕᐊᕐᓗᓂᓗᓐᓃᑦ ᑎᒍᔭᐅᓗᓂᓗᓐᓃᑦ.  ᐋᑕᒥ ᐋᖓᔮᓐᓇᑐᓂᒃ ᐃᒥᐊᓗᒻᒥᓗ ᓄᕐᕐᑲᕋᓱᐊᕐᑐᓄᑦ ᐅᐸᑦᑕᐅᓲᒧᑦ Our House-ᒥᒃ ᑌᔭᐅᔪᒧᑦ ᐁᓕᕐᑐᕕᓂᖅ.  

“ᓯᕗᓪᓕᒥ ᑎᒍᔭᐅᒋᐊᓪᓚᕈᒪᓯᒪᖕᖏᑐᖓ, ᐅᓂᒃᑳᑐᖅ ᐴᓂ. ᑭᓯᐊᓂ ᐊᐅᓚᔨᔪᖓ ᐃᑦᓯᕙᖃᑎᒃᑲ ᐊᒻᒪᓗᑭᑕᐅᓕᖓᔪᒥ ᖃᓪᓗᓈᓪᓗ ᐅᐃᒍᐃᓪᓗ ᐊᐅᖃᖃᑎᒌᑦᓴᔭᐅᖕᖏᑐᑦ, ᐊᖑᑏᑦ ᐊᕐᓀᓗ.  ᓱᔪᕕᓂᐅᒐᓗᐊᕈᑦᑕ ᐃᓘᓐᓇᑕ ᐃᔨᕐᓯᓯᒪᒐᓱᐊᕐᑐᒍᑦ ᐋᓐᓂᐊᒍᑎᑦᑎᓂᒃ ᐅᐃᕆᒪᓂᕐᒧᑦ ᐅᕙᖓᓗ ᐃᓄᒍᓗᑐᐃᓐᓇᐅᒋᐊᒥᒃ ᐅᐃᕆᓯᒪᔪᒍᓘᒋᐊᒥᒃ ᐃᑉᐱᓂᐊᖕᖏᒋᐅᓕᕐᓱᖓ.” 

ᐃᓱᐊᕐᓭᔨᒥᒃ ᑕᑯᖃᑦᑕᓕᕐᑐᕕᓂᖅ ᐃᓚᐅᖃᑦᑕᓕᕐᓱᓂᓗ ᐃᒥᐊᓗᒻᒥᒃ ᐅᐃᕆᒥᒪᔪᑦ ᑲᑎᑦᑕᓂᖓᓄᑦ. ᐊᕐᕌᒍᐃᑦ ᐊᒥᓱᑦ ᓈᑎᓪᓗᒋᑦ ᐃᓐᓂᐊᓯᒪᑦᓱᓂ ᓴᓪᓗᓂ ᓄᓇᕕᒻᒥ, ᑲᑎᓯᓕᕐᑐᕕᓂᖅ ᒥᐊᔨ ᐊᓄᒑᒥᒃ ᐱᐊᕐᕐᑭᐅᖃᑎᒋᓯᑦᓱᒍᓗ.  ᒪᓂᕋᑦᑐᑐᐃᓐᓇᐅᓚᐅᖕᖏᑑᒐᓗᐊᖅ ᐃᓅᓯᖓ ᑭᓯᐊᓂ ᓇᓗᓀᕐᓯᓲᒍᖏᓐᓈᑐᖅ ᐃᒥᐊᓗᒻᒥᒃ ᓄᕐᕐᑲᕕᕕᓂᕐᒥᓂᒃ ᔪᓓ 1, 1985. 

“ᐊᕐᓱᕈᕐᓇᑐᐊᓗᒃᑰᓯᒪᔪᖓ ᐊᒥᓱᑦ ᐃᓄᐃᑦ ᑳᓇᑕᒥᐅᑦ ᓲᒍᒍᓇᐅᒻᒪᑕ ᑭᓯᐊᓂᓕ ᐃᑲᔪᕐᑕᐅᓯᒪᔪᖓ –  ᐃᕐᖃᑐᐃᔨ ᐱᒋᐊᓪᓚᕕᖃᕐᑎᑕᐅᓇᖓ ᑌᒣᓯᒪᒐᓗᐊᕐᓱᖓ”, ᐅᖃᕐᑐᖅ ᐴᓂ ᐋᑕᒥ.  “ᑭᓯᐊᓂ ᐱᒋᐊᓪᓚᕖᕈᓐᒦᓕᕐᓱᖓ, ᖃᓪᓗᓈᑦ ᓄᓇᖓᓃᓪᓗᑯᑦᓯᒪᔪᖓ ᐃᑲᔪᕐᑕᐅᕕᑦᓴᑕᓕᒻᒥ.  ᐃᓱᐊᕐᓭᔩᑦ, ᐅᐃᕆᓯᒪᔪᓄᑦ ᑲᑎᑦᑕᕖᑦ.  ᑭᓯᐊᓂ ᐱᒋᐊᓪᓚᕖᕈᑦᑎᓗᖓ ᑕᒫᓂ ᑕᕐᕋᒥ, ᑕᒐᓖ ᖃᓄᖅ?” 

ᐃᓱᐊᕐᓯᕕᒃ ᒪᒥᓴᕐᕕᖓ ᑰᑦᔪᐊᒥ ᐱᒍᑦᔨᒥᔫᒐᓗᐊᖅ ᐋᖓᔮᓐᓇᑐᓂᒃ ᐊᑐᕐᓂᓗᑦᑐᓄᑦ ᐃᑲᔪᕋᓱᐊᕐᕕᐅᓱᓂ ᓄᓇᕕᒻᒥ, ᑭᓯᐊᓂ ᑭᖕᖒᒪᓇᕐᓂᖓ ᐱᒍᑦᔭᐅᔭᕆᐊᓕᓐᓄᑦ ᒥᑭᓗᐊᑐᐃᓐᓇᒥᔪᖅ.  ᐊᖏᓂᕐᓴᒥᒃ ᓴᓇᔪᖃᕈᒫᕐᓂᐊᓕᕐᑑᒐᓗᐊᖅ 2019-ᒥ, ᑭᓯᐊᓂ ᐋᑕᒥ ᐅᖃᕐᑐᖅ ᓱᓕ ᓈᒻᒪᖏᓐᓂᕃᑦᓱᓂ, ᓴᐳᑦᔭᐅᓯᒪᒋᐊᓪᓚᕆᐊᖃᕐᒪᑕᓗ ᓄᓇᕕᐅᑉ ᓄᓇᓕᐊᕈᖏᓐᓂ ᒪᒥᓴᕐᕕᒦᑦᑐᕕᓂᕐᓄᑦ. 

“ᐊᕐᕌᒍᐃᑦ ᐊᒥᓱᑦ ᐊᓂᒍᕐᓯᒪᓕᕐᑎᓗᒋᑦ ᐃᓅᓯᑦᑎᓂᓪᓗ ᐱᓀᓗᑕᕗᑦ ᐊᖏᔫᓕᕐᑎᓗᒋᑦ.  ᑐᑭᓯᒍᒪᕗᖓ ᖃᓄᖅ ᑕᒪᓐᓇ ᑌᒣᓕᙰᓐᓈᒪᖔᑦ.

 

“ᑕᒪᓐᓇ ᓄᕐᕐᑲᕆᐊᓕᒃ”

ᐃᕐᓂᖓ ᐃᓅᒍᓐᓀᓚᐅᕐᓂᒪᑦ, ᐴᓂ ᐋᑕᒥ ᐊᓪᓚᖃᑦᑕᓯᒪᓕᕐᑐᖅ ᑖᓐᓇᑑᒐᓗᐊᕐᓱᓂ ᑐᓴᕐᕙᓚᑦᑕᐅᒍᒪᑦᓱᓂ ᐱᓂᐊᕐᓂᓕᕆᔨᓄᑦ ᓄᓇᓕᒻᒥᓂ, ᑯᐯᒃᒥ ᐊᒻᒪᓗ ᑳᓇᑕᓕᒫᒥ, ᐃᓄᑐᐃᓐᓀᓗ ᑎᒥᖁᑎᖏᓐᓄᑦ ᓯᕗᓕᕐᑎᖏᓐᓄᓗ, ᐱᓂᕐᓗᕋᕐᓂᐅᑉ ᐱᔮᕐᓲᑎᓂᐅᓪᓗ ᑲᔪᓯᑐᐃᓐᓇᓂᖏᑦ ᓄᓇᕕᒻᒥ ᐱᑦᔪᑎᒋᑦᓱᒋᑦ. (Jean-François Villeneuve/Radio-Canada)

ᑕᕐᖀᒃ ᒪᕐᕉᒃ ᓈᕋᑕᕐᑎᓐᓇᒋᒃ ᕌᐳᑦ ᐃᓅᒍᓐᓀᑐᕕᓂᐅᑎᓪᓗᒍ, ᐊᖑᑎᓗ 30-ᓂᒃ ᐅᑭᐅᓕᒃ ᐃᒻᒥᓂᐊᕐᑐᕕᓂᐅᑎᓪᓗᒍ, ᑲᖏᕐᓱᔪᐊᖅ ᐊᑦᑐᑕᐅᓕᕇᓚᐅᔪᒋᕗᖅ ᖁᐊᕐᓵᓇᕐᑐᐊᓗᓐᓄᑦ : ᐊᕐᓇᖅ ᐅᕕᒃᑳᐱᒃ ᐃᒻᒥᓂᐊᕐᑐᖅ ᔫᓂ 8-ᒥ ᑌᒣᓕᔪᕕᓂᐅᓂᕋᕐᑕᖅ ᐃᓄᓐᓄᑦ, ᓯᑕᒪᓕᒻᒧᓗ ᓱᒃᑯᐊᕿᔪᖃᓕᕐᒥᓱᓂ ᐊᑕᐅᓯᖅ ᑐᖁᓚᕿᑎᓪᓗᒍ ᐊᓯᐊ ᐊᕐᖁᓇᒻᒪᕆᒻᒥᑎᓪᓗᒍ, ᐃᓄᒻᒪᕆᒻᒥᓗ ᓇᓪᓕᒋᔭᐅᒻᒪᕆᑦᑐᒥᒃ ᔫᓂ 11-ᒍᑎᓪᓗᒍ. ᐃᓅᒍᓐᓀᑐᖃᓕᕐᒥᓱᓂ.  ᖃᕆᑕᐅᔭᒃᑯᓗ Facebook-ᑯᑦ ᐊᓪᓚᑲᑦᑕᑐᑦ ᐃᒻᒥᓂᐊᔨᐊᓖᑦ ᓄᓇᓖᑦ ᐊᓯᖏᓐᓂ, ᐅᐃᒪᓇᕐᑐᑰᓕᕐᑐᖅ ᓄᓇᕕᒃ ᑲᓇᑕᒥ ᑐᓴᕐᓴᐅᓴᕋᑕᕐᓂᐊᓱᓂᒃ ᐅᒃᑑᐱᕆᒥ. 

“ᐃᓱᒪᒧᑦ ᐊᕐᓱᕈᓐᓇᑐᖅ. ᓄᑳᐱᒻᒪ ᐃᓄᐊᕐᑕᐅᓯᒪᓂᖓ ᓱᓇᓕᒫᓪᓗ ᐊᑑᑎᒋᐊᖃᕐᐸᑕᕗᑦ ᓄᓇᓕᑦᑎᓂ,”

ᐅᖃᕐᑐᖅ ᓀᔪᓪ ᐋᑕᒥ ᕌᐳᑦ ᐊᖓᔪᖓ ᐊᖓᔪᑦᓯᐹᖅ, ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᐱᓇᓱᑦᑎ ᑲᖏᕐᓱᔪᐊᒥ. “ᑕᒪᒃᑯᓂᖓ ᖁᐊᕐᓵᓇᕐᑐᓂᒃ ᖃᐅᑕᒫᑦ ᐊᑑᑎᔪᒍᑦ. ᑕᒪᓐᓇ ᐊᑑᑎᓐᓂᐸᑦ ᑲᓇᑕᒥ ᓇᓂᑐᐃᓐᓇᖅ, ᖃᐅᔨᒪᑦᓯᖓ ᐱᓂᐊᕐᓂᓕᕆᔩᑦ ᑲᒪᓯᒪᓕᕋᔭᕐᑐᑦ.  ᑯᐯᒃᑯᑦ ᑲᓇᑕᓗ ᑕᒪᐅᙰᓐᓈᑎᑦᓯᓕᕐᑐᑦ ᐃᓄᑐᐃᓐᓇᓂᒃ ᑕᒪᓐᓇᓗ ᐅᖃᐅᓯᕆᕙᕋ ᐋᓐᓂᓇᕋᓗᐊᕐᑎᓗᒍ”. 

ᐹᓂ ᐋᑕᒥ ᐅᖃᕐᑐᖅ ᐃᕐᓂᖓ ᐃᓅᒍᓐᓀᓚᐅᔪᑎᓪᓗᒍ ᐊᔪᐃᓐᓇᓂᕐᓴᐅᓕᕐᑐᖅ ᐃᓅᓯᕐᒥ ᐱᓐᓀᓗᑌᑦ ᐋᕐᕐᑭᒋᐊᕈᑎᑦᓴᖏᓐᓂᒃ ᖃᓄᐃᓘᕋᓱᐊᕈᑎᖃᕐᓂᓴᐅᑦᓱᓂ ᖃᐅᔨᒪᒐᓗᐊᕐᓱᓂ ᐃᓄᓄᑦ ᐸᕝᕕᒋᔭᐅᖃᑦᑕᕆᐊᒥᒃ. 

ᓇᐅᓘᓐᓃᑦ ᐱᓂᐊᕐᓂᓕᕆᔨ, ᐃᓄᐃᑦ ᑎᒥᖁᑎᖓ, ᑐᓴᕋᑦᓴᓂᐊᕐᑎᓗᓐᓃᑦ ᓄᓇᕕᒻᒥ ᐊᓪᓚᕕᐅᒻᒣᑑᒍᓇᐅᑦᔭᒍᓐᓀᑐᖅ ᖃᕆᑕᐅᔭᒃᑯᑦ ᐴᓂ ᐋᑕᒥᒧᑦ ᓈᒻᒪᓴᖕᖏᑐᒧᑦ ᑌᒣᓕᖓᐅᑦᔨᑐᐃᓐᓇᓂᖏᓐᓂᒃ, ᐊᐅᓚᑦᔭᕆᐊᓚᐅᕐᓯᒪᖕᖏᓂᖏᓐᓂᒃ ᓄᐃᑕᑎᑦᓯᖏᓗᐊᕐᓂᖏᓐᓂᓗ ᓄᓇᕕᒻᒥ ᐱᓂᕐᓗᕋᕐᓂᒥᒃ ᐃᓅᓯᒃᑯᓗ ᐱᓀᓗᑕᖃᕐᓂᒥᒃ.  

“ᐅᕙᒍᑦ ᐃᓅᔪᒍᑦ ᐅᖄᖃᑦᑕᕆᐊᖃᑦᔭᖏᑦᑐᒍᑦ ᓱᓇᑐᐃᓐᓇᓂᒃ ᐱᐅᖕᖏᑐᓂᒃ ᓄᓇᓕᑦᑎᓂ.” ᐅᖃᕐᑐᖅ ᐋᑕᒥ, “ᑐᐊᕋᑦᑕ ᓱᓇᐅᖕᖏᓕᕐᑎᑕᐅᓲᒍᔪᒍᑦ. ᓲᕐᓗ ᓂᑦᔮᒐᓱᐊᕐᑐᖅ ᐱᓀᓗᑕᐅᖔᕐᑐᖅ, ᐃᒥᐊᓗᓐᓂᒃ ᓂᐅᕐᕈᓯᕐᑐᑦ, ᐋᖓᔮᓐᓇᑐᑦ, ᐅᕙᓗᓐᓃᑦ ᐃᑲᔪᕐᑕᐅᕕᑦᓴᖃᖕᖏᓗᐊᕐᓂᖅ ᓄᓇᕕᒻᒥ ᐱᓀᓗᑕᐅᑦᔭᑎᓐᓇᒋᑦ. 

“ᐃᓘᓐᓇᑕ ᑲᑉᐱᐊᓱᑦᑐᒍᑦ. ᓈᒻᒪᒋᒍᓐᓀᓗᒋᑦ ᐅᖄᒍᑎᒋᑐᐊᕈᑦᑎᒋᑦ ᑲᕙᒪᒃᑯᑦ ᑯᐯᒻᒥ ᑳᓇᑕᓕᒫᒥᓗ, ᖃᓪᓗᓈᑦ ᓄᓇᖓᓃᑦᑐᑦ ᑮᓇᐅᔭᕈᓐᓂᕃᓯᑐᐃᓐᓇᕋᔭᕐᑐᑦ ᐳᐃᒍᑐᐃᓐᓇᖁᔨᓗᑎᓪᓗ.  ᓈᒻᒪᓴᒍᓐᓀᓗᑕ ᐃᓄᓐᓂᒃ ᐱᓂᐊᕐᓂᓕᕆᔨᓂᒃ ᑎᒥᐅᔪᓂᓪᓗᓃᑦ ᐅᖃᕈᑦᑕ ᐅᕙᒍᑦ ᐃᓚᕗᓪᓗᓃᑦ ᐱᓇᓱᒉᕐᓯᑐᐃᓐᓇᕆᐊᖃᕐᑐᒍᑦ, ᐅᕙᓗᓐᓃᑦ ᐃᓅᖃᑎᑦᑎᓄᑦ ᖃᓪᓗᓈᒍᒐᓱᐊᕐᓂᕋᕐᑕᐅᓗᑕ.”  

“ᑭᓯᐊᓂ ᖃᐅᔨᒪᕕᓰ? ᐃᕐᓂᕋ ᐃᓄᐊᕐᑕᐅᓯᒪᔪᖅ.  ᑭᓇᒧᓪᓗᓃᑦ ᖃᓄᐃᓕᔭᐅᒐᓗᐊᕈᒪ ᐅᖃᐅᑎᔭᐅᒐᓗᐊᕈᒪᓗᓐᓃᑦ -ᐃᓅᒐᓗᐊᒧᑦ ᖃᓪᓗᓈᒍᒐᓗᐊᒧᑦ- ᐊᓯᐊᓂᒃ ᐋᓐᓂᓇᕐᓂᓴᖃᓚᖓᑦᔭᖏᑦᑐᖅ ᑌᒣᒻᒪᑦ ᐅᕙᓐᓄᑦ ᓱᓕᔪᓂᒃ ᓂᑦᔮᕈᑎᖃᖃᑦᑕᓚᖓᔪᖓ. ᓇᐅᓕᒫᓂᒃ ᖃᐅᔨᒪᖁᔨᕗᖓ ᓱᓇᓂᒃ ᐃᓄᐃᑦ ᐊᑑᑎᒋᐊᖃᓲᒍᒻᒪᖔᑕ ᑲᓇᑕᒥ ᖃᒻᒥᓂᑕᔭᕐᓂᒃ ᐊᑑᑎᔪᒥ ᖃᓪᓗᓈᑦ ᐃᓱᒪᒋᒐᓱᐊᕆᐊᖃᓲᒍᖕᖏᑕᖏᓐᓂᓘᓐᓃᑦ.


ᑎᒦᑦ ᑐᖁᖓᔪᑦ ᐃᓂᖓ ᑲᖏᕐᓱᔪᐊᖅ, ᑯᐯᓐᒥ (ᐊᐃᓕᔅ ᑯᐃᓐ/ᐅᑭᐅᕐᑕᑐᒥ ᑕᑯᓐᓈᑐᖅ)

ᑐᖁᖓᔪᒥᒃ ᖃᐅᔨᓴᕐᑎ

 

ᖃᐅᔨᓵᕆᒍᑎᒃ : ᑖᒃᑯᐊ ᐊᑖᓃᑦᑐᑦ ᐊᑦᑕᓇᑐᐃᓐᓇᕆᐊᓕᓐᓂᒃ ᐃᓗᓕᓖᑦ ᐃᓚᖏᓐᓄᑦ ᐊᑐᐊᕐᓯᔪᓄᑦ ᓱᕐᕋᑕᐅᒍᑎᐅᒍᓐᓇᑐᓂᒃ

 

ᒫᑦᔨᐅᓕᕐᑎᓗᒍ ᖃᖓᑦᓯᐊᑭᐊᖅ ᐴᓂ ᐋᑕᒥ ᓯᕙᓂᕐᑕᐅᔪᕕᓂᖅ ᑐᖁᖓᔪᓂᒃ ᖃᐅᔨᓴᕐᑎᐅᑉ ᐊᓪᓚᕕᖓᓂᑦ ᒪᓐᑐᔨᐊᓪᒥᑦ. ᐊᑎᖓᓂᒃ ᐊᐅᓚᔨᖕᖏᑐᖅ, ᑭᓯᐊᓂ ᐱᖁᔭᓕᕆᔨᐅᓂᕋᕐᑐᖅ.

ᑖᓐᓇ ᐅᖃᕐᑐᕕᓂᖅ ᖃᐅᔨᓴᕐᑕᐅᒌᕐᓯᒪᓕᕐᒪᒎᖅ ᐃᕐᓂᖓᑕ ᑎᒥᖓ ᑎᒻᒥᔫᒃᑯᓗ ᐅᑎᕐᑎᑕᐅᑐᐃᓐᓇᕆᐊᖃᓕᕐᓱᓂ.  ᕌᐳᑦ ᑎᒥᐊ ᐊᓐᓄᕃᑦᑑᓂᐊᕐᑐᖅ ᑐᖁᖓᔪᑦ ᐴᑦᓴᔭᖓᓂ ᐴᖃᕐᓗᓂ. 

(ᑐᖁᖓᔪᓂᑦ ᖃᐅᔨᓴᕐᑎᐅᑉ ᐊᓪᓚᕕᖓ ᑯᐯᒃᒥ ᑭᐅᕐᖃᔭᖕᖏᓂᕋᓚᐅᕐᑐᖅ ᑐᓴᕋᑦᓴᓂᐊᕐᑎᓂᒃ ᐅᑭᐅᕐᑕᑐᒥᒃ ᑕᑯᓐᓇᑐᒃᑯᓂᒃ ᐊᐱᕆᔭᐅᓚᐅᕐᓱᑎᒃ ᖃᖓ ᐅᖄᓐᓂᒪᖔᑕ ᑭᓇᓗᓐᓃᑦ ᓯᕙᓂᕐᓂᒪᖔᑦ ᓱᓇᒥᓪᓗ ᐱᓇᓱᒐᖃᕐᒪᖔᑦ ᐅᖄᓚᔪᕕᓂᖅ, ᖃᖓᓗᓐᓃᑦ ᕌᐳᑦ ᑎᒥᖓ ᐅᑎᕐᑎᑕᐅᓐᓂᒪᖔᑦ ᑲᖏᕐᓱᔪᐊᒧᑦ, ᑐᑦᓯᕋᕆᐊᖃᕐᓂᕃᑦᓱᑎᒃ ᑐᑭᓯᒍᒪᓂᐊᑐᐊᕈᑎᒃ.  ᐅᑭᐅᕐᑕᑐᒥᒃ ᑕᑯᓐᓇᑐᖅ ᓱᓕ ᑭᐅᔭᐅᕋᑕᕐᓂᖏᑦᑐᖅ ᑖᒃᑯᐊ ᑐᓴᕋᑦᓭᑦ ᓄᐃᑐᐃᓐᓇᕋᑕᕐᑎᓗᒋᑦ.) 

ᐴᓂ ᐅᖃᓚᐅᕐᑐᖅ ᐊᑐᐃᓐᓇᕈᕐᑎᑕᐅᖕᖏᓗᐊᕐᓂᕕᓂᕐᒥᓂᒃ ᖃᓄᐃᑦᑐᓯᐊᒍᓂᐊᕐᒪᖔᑦ ᐃᕐᓂᖓᑕ ᑎᒥᖓ ᑎᑭᓕᕈᓂ ᓄᓇᓕᒻᒧᑦ.  ᐴᕆᓚᐅᕐᑕᖓᓂᓗ ᑎᒥᕕᓂᖃᐅᑎᒥᒃ ᓴᓂᖃᐅᑎᑦᓴᔭᕐᑎᑐᑦ ᐱᐅᓯᓕᕕᓂᐅᓂᕃᑦᓱᓂ. 

***

ᓄᓇᕕᒃ ᑐᖁᖓᔪᓂᒃ ᖃᐅᔨᓴᕐᑎᖃᖕᖏᑐᖅ, ᑐᖁᖓᔪᒥᒃ ᐃᓗᕕᕐᑕᐅᓂᑦᓴᒧᑦ ᐊᑐᐃᓐᓇᕈᕐᑎᕆᔨᖃᖕᖏᑐᖅ ᐃᓗᕕᕐᓯᓂᓕᕆᔨᖃᑦᔭᒐᓂᓗ.  ᓄᓇᓖᑦ ᐃᒻᒥᓂᕿᑦᓱᑎᒃ ᐃᓅᖃᑎᒥᓂᒃ ᑐᖁᖓᔪᓕᕆᒋᐊᖃᓲᑦ. 

ᑲᖏᕐᓱᔪᐊᒥ, ᓯᕗᓕᕐᑎᐅᑉ ᑐᖓᓕᖓ ᐅᐃᒪᓇᕐᑐᓕᕆᔩᓪᓗ ᐃᓚᖓ ᐃᒻᒥᓂᒃ ᑐᓂᑦᓱᑎᒃ ᓴᓗᒻᒪᓭᓚᐅᕐᑑᒃ ᕌᐳᑦ ᑎᒥᖓᓂᒃ ᐊᑐᐃᓐᓇᕈᕐᑎᓱᒍᓗ ᐃᓗᕕᕐᑕᐅᓂᑦᓴᒧᑦ, ᐅᖃᕐᑐᖅ ᐴᓂ. 

ᑭᓯᐊᓂ ᑖᒃᑯᐊ ᐅᓐᓂᓗᑦᑑᒃ ᑭᓗᕐᓗᓂᕃᑦᓱᑎᒃ ᒥᕐᓱᑕᐅᓯᒪᓂᖓᓂᒃ ᑎᒥᖓᓂᓗ ᓴᓗᒣᑦᑑᓂᕃᑦᓱᑎᒃ. ᑎᒥᖓᒎᖅ ᕿᕋᑕᔪᒻᒪᕆᐊᓘᑦᓱᓂ ᓇᓴᓕᐅᑉ ᐁᖏᓐᓂᒃ ᐊᑎᑎᒐᓱᐊᕋᑦᓴᐅᔭᒐᓂ Eminem ᖑᐊᒥᒃ ᕌᐳᑦ ᐱᐅᒋᓕᕐᐹᖓᓂᒃ ᐃᓚᒥᓄᑦ ᐊᑐᖁᔭᕕᓂᐅᒐᓗᐊᕐᓱᓂ ᐃᓗᕕᕐᑕᐅᒐᓱᐊᓕᕈᓂ.  

(ᑲᖏᕐᓱᔪᐊᑉ ᓯᕗᓕᕐᑎᖓᑕ ᑐᖓᓕᖓ ᐅᐃᒪᓇᕐᑐᓕᕆᔩᓪᓗ ᐃᓚᖓ ᖃᒪᖃᑕᐅᔪᕕᓃᒃ ᑭᐅᓚᐅᖕᖏᑑᒃ ᐅᑭᐅᕐᑕᑐᒥᒃ ᑕᑯᓐᓇᑐᒃᑯᓂᒃ ᐊᐱᕐᓱᕈᒪᔪᕕᓂᐅᒐᓗᐊᕐᑎᓗᒋᑦ ᑲᖏᕐᓱᔪᐊᒦᓐᓂᒥᓂ, ᑭᖑᓂᐊᒍᓪᓗ ᖃᐅᔨᒐᓱᐊᖃᑦᑕᑎᓪᓗᒋᑦ ᐅᖄᒍᑎᒃᑯᑦ ᖃᕆᑕᐅᔭᒃᑯᓗ.) 

ᐴᓂ ᐋᑕᒥ ᐊᐅᓚᔨᔪᖅ ᓰᑦᑕᑐᐃᑦᔮᓂᑦᓱᓂ ᑎᒥᕕᓂᖃᐅᑎᒥᒃ ᐴᕐᒥᒃ ᑕᑯᒍᓐᓇᓯᑦᓱᓂ ᑭᓗᖏᓐᓂᒃ ᕌᐳᑦ ᑕᓪᓗᖓᓂ ᑐᑭᑖᕐᓱᓂᓗ ᑕᑯᒋᐊᓪᓚᖃᔭᖕᖏᓂᕐᒥᓂᒃ. 

ᓰᑦᑕᑐᕆᐊᓪᓚᑐᐃᓐᓇᑕᖓ. ᑖᓐᓇ ᑯᐯᒃ ᑲᕙᒪᒃᑯᖏᓪᓂᑦ ᐱᒻᒪᑦ, ᐋᑕᒥ ᐱᖁᔭᑎᒋᑦ ᐃᓗᕕᕐᓯᒋᐊᖃᕐᑐᕆᓚᐅᕐᑐᖅ ᐃᕐᓂᒥᓂᒃ ᐴᕐᒦᖏᓐᓈᑎᓪᓗᒍ, 

ᓱᓇᐅᕝᕙ ᑌᒣᑦᔭᑎᓐᓇᒍ, ᑭᓯᐊᓂ ᑭᓇᒧᓪᓘᓃᑦ ᐅᖃᐅᑎᔭᐅᓚᐅᖕᖏᑐᖅ

“ᐊᑖᑕᐅᑦᓯᐊᖏᑦᑑᔪᕆᓚᐅᕐᑐᖓ ᐃᕐᓂᕋᓂᒃ ᐃᓗᕕᕐᑕᐅᑎᑦᓯᒋᐊᒥᒃ ᑌᒣᓕᖓᑎᓪᓗᒍ, ᐅᖃᕐᑐᖅ ᐋᑕᒥ ᐊᓪᓚᑎᕆᑦᓱᓂ ᖁᕕᓘᒃᑳᒥᓂᒃ.  

“ᐃᓄᐃᑦ ᑕᕝᕙᓂ ᓄᓇᓕᒻᒥ ᐱᒍᓐᓇᕕᓕᒫᒥᓄᑦ ᐃᕐᓂᕋᓂᒃ ᑲᒪᓚᐅᕐᑐᑦ – ᐆᒥᒋᑦᔭᖏᑦᑕᑲ – ᐅᐱᒍᓱᑦᑐᖓ ᖃᓄᓕᒫᖅ ᐃᕐᓂᕋᓂᒃ ᑲᒪᑦᓯᐊᓚᐅᕐᒪᑕ.  ᑭᓯᐊᓂ ᑌᒣᑦᑑᕗᒍᑦ ᑕᒫᓂ ᓄᓇᑦᑎᓂ.  ᐃᓗᕕᕐᓯᓂᕐᒥᒃ ᐱᔪᓐᓇᐅᑎᖃᕐᕕᒋᓗᒍ ᑲᒪᔨᐅᑦᔭᖏᑦᑐᒍᑦ.  ᑐᖁᖓᔪᒥᒃ ᐃᓗᕕᕐᑕᐅᓂᑦᓴᒧᑦ ᐊᑐᐃᓐᓇᕈᑦᑎᕆᔨᐅᑦᔭᖏᑦᑐᒍᑦ. ᐊᒥᓱᑦ ᐃᒻᒥᓂᐊᕐᐸᑎᓪᓗᒋᑦ ᐱᔮᕐᓲᑎᓂᕐᓗ ᐳᕐᑐᔫᑎᓪᓗᒍ ᓄᓇᕕᒻᒥ, ᓱᒧᑦ ᐱᑕᖃᖕᖏᓚᒍᑦ ᑕᒪᒃᑯᓂᖓ? 

“ᖃᐅᑕᒫᑦ, ᑕᑯᓐᓇᖑᐊᖃᑦᑕᓕᕐᑐᖓ ᓲᕐᓗ ᖃᕆᑕᕋᓄᑦ ᓂᐱᖕᖓᒪᑦ ᕌᐳᑦ; ᐊᕐᕐᑯᓈᕐᑎᓂᕕᓂᖏᑦ, ᐊᒡᒐᖏᑦ ᓄᐃᑕᔪᑦ ᑕᓯᔪᐊᑉ ᐊᑖᒍᑦ ᓇᓴᓕᐅᑉ ᐁᒋᓐᓂᒃ ᐊᑎᑎᑕᐅᕐᕐᑲᔭᕐᓂᖏᓐᓇᒥ ᕿᕋᑕᓗᐊᒧᑦ; ᐃᓗᕕᕐᑕᐅᒐᓱᐊᕐᓱᓂᓗ ᑐᖁᖓᔪᖃᐅᑎᒥ ᐴᕐᒥ ᓴᓂᖃᐅᑎᑦᓴᔮᓘᔮᕐᑐᒥ; ᑌᒣᓕᖓᓗᓂᓗ ᐃᓗᕕᕐᓯᒪᓂᐊᓕᕐᓱᓂ ᐊᕗᖓᓕᒫᖅ, ᖃᐅᔨᒪᓐᓂᔭᖏᓐᓇᒪ ᐊᓯᐊᓂᒃ. 

“ᖃᐅᑕᒫᑦ ᐊᕐᓱᕈᑉᐸᐳᖓ ᑐᑭᓯᒍᒪᑦᓱᖓ ᖃᓄᖅ ᐃᒻᒥᓂᒃ ᐃᓱᒪᒋᔪᓐᓀᕕᖃᕐᓂᐊᕆᐊᒥᒃ ᑕᒪᑐᒥᖔᓗᒃ ᐊᑑᑎᑎᑦᓯᓯᒪᒐᒪ ᐃᕐᓂᕋᓂ”.

ᐴᓂ ᐋᑕᒥ ᐊᑦᔨᓕᐊᕕᓂᖅ ᑲᖏᕐᓱᔪᐊᖅ ᑯᐯᒻᒥ ᐅᖃᕐᑐᖅ ᑕᑕᒥᓯᒣᓐᓈᕆᐊᒥᒃ ᐃᕐᓂᖓᑕ ᑎᒥᖓ ᖃᓄᐃᓕᖓᓐᓂᒪᖔᑦ ᐅᑎᕐᑎᑕᐅᒐᒥ ᒪᓐᑐᔨᐊᓚᒥᑦ. (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᓄᓇᕕᒻᒥ ᐊᑯᓂ ᐃᓱᒫᓗᒋᔭᐅᓯᒪᓕᕐᑐᖅ ᑐᖁᖓᔪᓕᕆᔨᒧᑦ ᑲᒪᒋᔭᐅᒋᐊᕐᑐᑐᕕᓂᐅᑦᓱᑎᒃ ᖃᓄᐃᓕᖓᕙᒻᒪᖔᑕ ᑎᒦᑦ ᐅᑎᕐᑎᑕᐅᒐᒥᒃ. 

ᐃᓄᒃᔪᐊᒥ, ᐃᓄᓕᒃ 1300-ᓂᒃ, ᑕᓯᐅᔭᕐᔪᐊᒥ, ᓄᓇᓕᐅᑉ ᑲᒪᔨᒻᒪᕆᖓ ᓴᐅᒥᒃ ᐃᓄᒃᐸᖅ ᓯᕗᓕᕐᑎᓗ ᐸᐅᓗᓯ ᖃᓴᓪᓗᐊᖅ ᓂᕈᐊᓚᐅᕐᑎᓇᒋᑦ ᑲᑎᒪᔨᑦᓴᓂᒃ ᓅᕕᒻᐱᕆ 2018-ᒥ, ᐅᖃᕐᓯᒪᔫᒃ ᐃᓗᕕᕐᓯᒐᓱᐊᕐᓂᒧᑦ ᐱᒍᑦᔨᒍᑎᓂᒃ ᐱᒍᓐᓇᑐᖃᑦᓯᐊᑎᓐᓇᒍ ᐊᕐᓱᕋᓐᓇᖃᑦᑕᓂᖓᓗ ᐃᓚᒌᓄᑦ ᐃᓚᖕᖏᓯᒪᔪᓄᑦ ᓄᓇᕕᒻᒥ ᑕᑯᑦᓴᐅᒐᓗᐊᕐᓱᓂ ᓲᕐᓗ ᐃᔨᕐᑐᐊᖅ. 

“ᓄᓇᓕᑦᑎᓂ ᐃᓅᒍᓐᓀᔨᐊᕆᓯᒪᔭᕗᑦ ᐅᑎᓲᑦ ᐴᕐᓯᒪᑦᓱᑎᒃ ᓴᓂᒃᑯᕕᑦᓴᔭᐅᔮᕐᑐᓂᒃ, ᐊᓐᓄᕃᑦᑑᓲᑎᒃ” ᐃᓄᒃᐸᖅ ᐅᖃᕐᑐᖅ. “ᑕᑯᒐᓱᐊᕐᑕᐅᓕᕋᒥᒃ ᒥᕐᓱᑕᐅᓂᕕᓂᖏᑦ ᑭᓗᕐᓗᑐᑦ ᖃᐅᔨᓴᕐᑕᕕᓂᐅᑦᓱᑎᒃ ᑎᒥᖏᑦ. ᖃᓂᑦᑑᑎᓪᓗᒋᑦ ᑕᑯᑦᓱᒋᑦ ᑕᑯᒥᓇᖕᖏᑐᒻᒪᕇᑦ. 

ᐸᐅᓚᓯ ᖃᓴᓪᓗᐊᖅ ᐅᖃᕐᑐᖅ ᑕᒪᒃᑯᐊ ᑐᖁᖓᔪᑦ ᖃᐅᔨᓴᕐᑕᐅᒋᐊᕐᑐᐸᓐᓂᖏᑦ 1500 km-ᒥ ᐅᖓᓯᓐᓂᓕᒻᒨᑕᐅᓲᑦ ᐊᓯᐊᓂᒃ ᐱᐅᓯᓕᓐᓄᑦ ᐅᖁᒣᑦᑐᒪᕆᐅᒌᓲᑦ ᐃᓄᓐᓄᑦ, ᑭᓯᐊᓂ ᑐᑭᓯᒪᒐᓗᐊᕐᒥᓱᑎᒃ ᑌᒣᓪᓗᓂ ᑭᓯᐊᓂᐊᓂᖓᓂᒃ ᖃᓄᖅ ᑐᖁᓐᓂᒪᖔᑦ ᖃᐅᔨᔭᐅᒋᐊᖃᕋᒥᒃ.  ᑭᓯᐊᓂ ᐃᓄᓐᓄᑦ ᐊᕐᓱᕈᓐᓇᓗᐊᖕᖑᐊᓲᖅ, ᑲᒪᒋᔭᐅᑦᓯᐊᖃᑦᑕᖏᓐᓂᖏᑦ ᑎᒦᑦ ᐅᑎᕐᑎᑕᐅᓕᕋᒥᒃ ᐅᖃᕐᑐᖅ ᐸᐅᓗᓯ, ᑕᒪᓐᓇ ᐃᓛᓃᕈᑕᐅᖕᖏᑲᓗᐊᕐᒥᑎᓪᓗᒍ ᑐᖁᖓᔪᓕᕆᔨᒧᑦ.  

“ᐃᒻᒪᖄ ᑖᕙᓂ ᖃᓪᓗᓈᑦ ᓄᓇᖓᓂ ᐊᑦᔨᐅᔭᖏᑦᑐᖅ ᑭᓯᐊᓂᓕ ᓄᓇᕕᒻᒥ ᓄᓇᓕᑦᑎᓂ ᓲᓱᑦᓴᓲᒍᔪᒍᑦ ᑐᖁᖓᔫᒐᓗᐊᓂᒃ” ᐅᖃᕐᑐᖅ ᐸᐅᓗᓯ. “ᑐᖁᖓᔪᓪᓗ ᑎᒥᖏᑦ ᐅᑎᕐᑎᑕᐅᓕᕋᒥᒃ ᑐᖁᖓᔪᓂᒃ ᖃᐅᔨᓴᕐᑎᒥᑦ ᐱᑦᓱᑎᒃ ᐃᓗᕐᕈᓯᑦᑎᓄᑦ ᓈᒻᒪᓈᑦᔭᖏᑦᑐᑦ ᐃᓅᑦᓱᑕ ᑐᖁᖓᔨᐊᑦᑎᓂᒃ ᑲᒪᑦᓯᐊᕈᒪᓲᒍᒐᑦᑕ.” 

ᑲᕙᒪᒃᑯᑦ ᐃᓄᓐᓂᑦ ᓄᓇᓕᒻᒧᑦ ᑲᑎᐅᕐᕐᑲᑎᑦᓯᓯᒪᓂᖓᑕ ᑭᖑᓂᐊᓂ, ᐊᔪᕿᕐᑐᐃᔩᓪᓗ ᑐᒃᓯᐊᕕᓐᓂᒃ ᓇᑉᐸᐅᙯᓯᒪᓕᕐᑎᓗᒋᑦ ᐅᑭᐅᕐᑕᑐᒥ, ᐃᓄᐃᑦ ᓄᓇᓕᖏᑦ ᐊᕐᓀᑦ ᐃᑲᔪᕐᑎᐅᖃᑕᐅᔪᓄᑦ ᐱᒍᑦᔭᐅᖃᑦᑕᓯᒪᔪᑦ ᐃᕐᒥᓂᖃᑦᑕᑎᓪᓗᒋᑦ ᑐᖁᔫᑉ ᑎᒥᖓᓂᒃ ᐊᑐᐃᓐᓇᕈᕐᑎᓱᒍᓗ ᐃᓗᕕᕐᑕᐅᓂᕐᒧᑦ. 

ᐅᓪᓗᒥᒧᑦ, ᐃᑲᔪᕈᒪᑐᐃᓐᓇᑐᑦ ᑭᓯᐊᓂ ᐃᑲᔪᕐᑎᓗᒋᑦ ᐃᓗᕕᕐᓯᓂᖃᓲᖅ: ᐊᕐᓀᑦ ᐃᑲᔪᕐᑎᐅᖃᑕᐅᔪᑦ ᐃᕐᒥᓂᔪᑦ ᑎᒥᒻᒥᒃ, ᐃᒻᒪᖄ ᓄᓇᒥᒃ ᑎᒍᒥᐊᕐᑎᑯᑦ ᐃᕐᓯᕕᓕᐊᒍᓂᐊᕐᑐᓂᒃ ᕿᔪᓐᓂᒃ ᐁᑦᑐᐃᔪᑦ, ᓄᓇᓕᒻᒥ ᐃᒻᒥᓂᒃ ᑐᓂᒪᔪᑦ ᐃᕐᓯᕕᑦᓴᓕᐅᕐᑐᑦ ᐳᐊᕐᕆᔭᕐᓱᑎᓪᓗ ᐃᓗᕕᕐᕕᓴᒥᒃ. ᐊᒥᓱᕕᑦᓱᓂᓗ ᐱᓀᓗᑕᐅᓲᒍᒻᒥᔪᖅ ᐃᓚᒌᑦ ᑮᓇᐅᔭᖃᖕᖏᑐᐊᕋᒥᒃ ᐅᑎᕐᑎᓯᒍᓐᓇᓲᒍᑦᔭᖏᑦᑐᑦ ᓄᓇᓕᒻᒧᑦ ᓇᓪᓕᒋᔭᖓ ᑐᖁᑐᐊᕐᒪᑦ ᖃᓪᓗᓈᑦ ᓄᓇᖓᓂ, ᑌᒣᓕᑐᐊᕐᒪᓗ ᓄᓇᓖᑦ ᑲᕙᒫᐱᖏᑦ ᐊᑭᓖᒐᓱᐊᕆᐊᖃᓯᓲᑦ, ᑕᒪᓐᓇ ᓄᓇᕕᒻᒥ ᓯᕗᓕᕐᑏᑦ ᐅᖃᐅᓯᕆᓯᒪᔭᖓ ᐅᑭᐅᕐᑕᑐᒥᒃ ᑕᑯᓐᓇᑐᒃᑯᓄᑦ ᐊᑭᖃᕐᓂᕋᕐᓱᒍ $9000.00-ᓗ $14,000-ᓗ ᐊᑯᓐᓂᖓᓂ. 

ᑭᓯᐊᓂ ᐊᒥᓲᓕᕙᓪᓕᐊᒪᑕ ᐃᓄᐃᑦ. ᑲᕙᒫᐱᒃᑯᓗ ᑮᓇᐅᔭᖁᑎᖏᑦ ᓈᒻᒪᖃᑦᑕᕈᓐᓀᑎᓪᓗᒋᑦ, ᐅᕕᒐᕐᓂᓴᐅᓕᕐᑐᓗ ᐃᓇᖐᕙᓪᓕᐊᑎᓐᓇᒋᑦ ᐅᑭᐅᕆᑦᓯᔪᓂᒃ ᐃᑲᔪᕐᑎᐅᖃᑦᑕᓯᒪᔪᓂᒃ, ᑕᒪᓐᓇ ᑌᒣᓕᖓᑐᐃᓐᓇᖃᔭᕐᓂᐊᖏᑦᑐᖅ ᐊᕗᖓᓕᒫᖅ, ᐅᖃᕐᑐᖅ ᐸᐅᓗᓯ. 

“ᑭᖕᖒᒪᑦᓯᕗᒍᑦ ᓄᓇᕕᒻᒧᐊᖓᔪᒥᒃ ᓄᑖᒥᒃ ᒪᓕᒐᕐᒥᒃ ᑲᒪᓂᐊᕐᑐᒥᒃ ᓱᓇᓕᒫᓂᒃ ᐃᓗᕕᕐᓯᒐᓱᐊᕐᓂᒧᐊᖓᔪᓂᒃ ᑐᖁᖓᔨᐊᑦᑕᓗ ᐅᑎᐅᑦᔭᐅᖃᑦᑕᓂᖓᓄᑦ ᓄᓇᓕᒻᒧᑦ ᑐᖁᖓᔪᓕᕆᔨᒥᑦ,” ᐅᖃᕐᑐᖅ ᐸᐅᓗᓯ, “ᐅᖄᖃᑎᒌᒍᑎᒋᒋᐊᖃᕐᕐᑰᑕᕗᑦ ᐅᓪᓗᒥ ᐊᖏᓕᓗᐊᖕᖏᓂᖓᓂ ᐱᓀᓗᑕᖅ, ᓄᓇᓕᕗᓪᓗᓃᑦ ᑲᒪᕐᕐᑲᔦᖕᖏᓂᖏᓐᓂ.” 

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᑦᑕ ᐊᓪᓚᑎᒻᒪᕆᖓᑕ ᐃᑲᔪᕐᑎᖓ Fabien Pernet ᖃᐅᔨᒪᑦᓯᐊᓂᕋᕐᑐᖅ ᑕᒪᑐᒥᖓ ᐱᓀᓗᑕᕆᔭᐅᔪᒥᒃ 2017-ᒥᓗ ᑐᖁᖓᔪᓂᒃ ᖃᐅᔨᓴᕐᑎᐅᑉ ᐊᓪᓚᕕᖓᓂᑦ ᐱᓯᒪᔪᓂᒃ ᑲᑎᓯᔪᕕᓂᐅᑦᓱᓂ ᑕᒪᒃᑯᐊ ᐅᖃᐅᓯᖃᕆᐊᕐᑐᓱᓂ. 

“ᑐᑭᓯᑎᒐᓱᐊᓚᐅᔪᔭᕗᑦ ᐃᓱᐃᒋᔭᐅᔪᓂᒃ ᓄᓇᕕᒻᒥᐅᓄᑦ” Pernet ᐅᖃᕐᑐᖅ, ᑭᓯᐊᓂ ᑭᐅᑐᐃᓐᓇᓚᐅᕐᑐᑦ ᖃᓄᐃᓕᒋᐊᓪᓚᕕᖃᖕᖏᓂᕋᕐᓱᑎᒃ ᑕᒪᒃᑯᐊᒎᖅ ᑎᒦᑦ ᓲᕐᓗ ᓱᒃᑯᓇᕐᑐᑎᑐᑦ ᐱᐅᓯᖃᕐᕕᐅᓲᒍᒻᒪᑕ. 

ᑭᓯᐊᓂ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐊᔪᐃᓐᓇᖏᓐᓇᑐᑦ ᑕᒪᒃᑯᓂᖓ, ᐅᖃᕐᑐᖅ Fabien. ᐊᐅᒍᓯᐅᓚᐅᕐᑐᒥᓗ  ᐊᓪᓚᓚᐅᕐᓱᑎᒃ Viens ᖃᐅᔨᓴᕐᑎᓄᑦ ᑐᕌᕐᑐᓂᒃ ᐋᕐᕐᑭᒋᐊᕈᑎᑦᓴᐅᒐᔭᕐᑐᓂᒃ ᑐᖁᖓᔪᓂᒃ ᖃᐅᔨᓴᕐᑎᐅᑉ ᐊᓪᓚᕕᖓᓄᑦ. 

Viens ᖃᐅᔨᓴᕐᑎᖏᓐᓄᑦ ᐅᖃᒻᒪᕆᐅᑎᒥᓂᒃ ᐊᓪᓚᓱᑎᒃ ᓄᓇᕕᒻᒥ ᐃᓗᓯᓕᕆᔨᒃᑯᑦ ᐅᖃᓚᐅᕐᐳᑦ ᑐᓴᐅᒪᑎᑦᓯᓯᐊᖃᑦᑕᖏᓐᓂᖓ ᑐᖃᖓᔪᓂᒃ ᖃᐅᔨᓴᕐᑎᑯᑦ ᐊᓪᓚᕕᖓᑕ ᑎᒦᓪᓗ ᖃᐅᔨᓴᕐᑕᕕᓂᐅᑦᓱᑎᒃ ᐅᑎᕐᑎᑕᐅᓕᕋᒥᒃ ᓄᓇᕕᒻᒧᑦ ᐱᑦᓯᐊᓯᒪᖃᑦᑕᖏᓐᓂᖏᑦ ᐊᖏᔪᒻᒪᕆᐊᓗᒻᒥᒃ ᓱᕐᕃᖃᑦᑕᓂᕋᕐᓱᒋᑦ ᐃᓚᒋᔭᐅᔪᓂᒃ. (Marie-Claude Simard/Radio Canada International).

ᖃᐅᔨᓴᕐᑏᑦ ᑐᖁᖓᔪᓂᒃ ᓲᓱᒋᔭᖃᑦᓯᐊᕆᐊᖃᕋᓗᐊᕐᓱᑎᒃ ᑐᖁᖓᔪᒥᒃ ᐱᓇᓱᐊᕐᑕᒥᓂᒃ, ᐱᓇᓱᐊᒐᖃᕐᐳᑦ ᑐᖁᒍᑕᐅᔪᕕᓂᕐᒥᒃ ᖃᐅᔨᒐᓱᐊᕆᐊᖃᕐᓂᒥᒃ.  ᐱᒋᐅᓴᓯᒪᑦᔭᖏᑦᑐᑦ ᑎᓕᔭᐅᒪᒐᑎᓪᓗ ᐊᑐᐃᓐᓇᕈᕐᑎᕆᖃᑦᑕᓂᐊᕐᑎᓗᒋᑦ ᑐᖁᖓᕘᔫᑉ ᑎᒥᖓᓂᒃ.  ᖃᓪᓗᓈᑦ ᓄᓇᖓᓂ, ᐃᓚᒌᑦ ᑎᓕᔨᓲᑦ ᑐᖁᖓᔪᖃᐅᑎᒃ ᐱᓇᓱᑦᑎᓂᒃ ᖃᓄᐃᓘᖃᑎᖃᕐᓂᐊᑎᓪᓗᒋᑦ ᑐᖁᖓᔪᓂᒃ ᖃᐅᔨᓴᕐᑎᒥᒃ ᖃᐅᔨᓴᕐᑕᐅᒌᑐᐊᕐᐸᑦ, ᓴᓗᒻᒪᓴᕐᓗᒍᓗ ᐱᐅᓴᕐᓗᒍᓗ ᐃᓚᒌᑦ ᖁᔨᑉᐸᑕ, ᑕᑯᔭᐅᒍᒫᕐᓂᐊᑐᐊᕐᐸᑦ ᑕᑯᒍᒪᔪᓄᑦ. 

ᑭᓯᐊᓂ ᑕᒪᒃᑯᓂᖓ ᐱᔨᑦᓯᐅᑎᖃᖕᖏᑐᖅ ᐅᑭᐅᕐᑕᑐᒥ ᑯᐯᒃᒥ.

ᑐᖁᖓᔪᓂᒃ ᖃᐅᔨᓴᕐᑎᖏᑦᑕ ᐊᓪᓚᕕᖓ ᐊᕐᕌᒍᑕᒫᑦ 15-ᒥᑦ 20-ᓗᑳᒧᑦ ᖃᐅᔨᓴᕆᐊᖃᓲᖅ ᑐᖁᖓᔪᓂᒃ ᓄᓇᕕᒻᒥᑦ ᐱᓯᒪᔪᓂᒃ. 

ᑯᐯᒻᒥ ᑐᖁᖓᔪᓂᒃ ᖃᐅᔨᓴᕐᑎᖏᑦᑕ ᐊᓪᓚᕕᒻᒪᕆᖓ ᐊᖏᓚᐅᖕᖏᑐᖅ ᐊᐱᕐᓱᑕᐅᒍᒪᑦᓱᓂ ᐅᑭᐅᕐᑕᑐᒥ ᑕᑯᓐᓇᑐᒃᑯᓄᑦ ᓄᓇᕕᐅᑉ ᐃᓱᒫᓗᒋᔭᖏᑦᑕ ᒥᑦᓵᓄᑦ ᐊᓪᓚᓯᒪᔪᓂᒃ ᓄᐃᑦᓯᒐᓗᐊᕐᓱᑎᒃ ᒪᓕᑦᑕᐅᒋᐊᓕᓐᓂᒃ ᒪᓕᑦᑐᕕᓂᐅᓂᕋᕐᓱᑎᒃ “ᒪᓕᑦᓯᐊᒪᕆᑦᓱᑎ” ᑲᒪᒋᔭᖃᕐᓂᒧᑦ ᐋᑕᒥᒃᑯᓂᒃ ᐃᓚᒌᓂᒃ. 

“ᖃᐅᔨᓴᕐᑏᑦ ᑐᖁᖓᔪᓂᒃ ᑕᒪᑐᒧᖓ ᓱᕐᕋᑕᐅᓯᒪᒐᓗᐊᕐᒥᓱᑎᒃ ᐃᑉᐱᒍᓱᑦᓯᐊᖁᔨᓲᒍᒐᓗᐊᕐᓱᑎᓪᓗ ᑎᒥᓂᒃ ᖃᐅᔨᓴᕐᑎᓂᒃ ᑐᖁᒐᔫᑉ ᑕᑯᒥᓇᕐᑎᑕᐅᒐᓱᐊᕆᐊᖃᕐᓂᖓᓄᑦ, ᐱᐅᓴᕐᑕᐅᓯᒪᖕᖏᑐᖅ ᑕᑯᒥᓀᑦᑑᒍᓐᓇᒪᑦ ᑎᑭᒍᓂ ᐊᐅᓚᑕᕕᓂᐅᓗᓂ ᑎᒻᒥᔫᒃᑯᑦ,” ᐅᖃᕐᑐᖅ Joanne Lambert-Roy, ᑐᓴᐅᒪᑎᑦᓯᓂᕐᒧᑦ ᑐᓴᕋᑦᓴᓕᕆᔨᓂᓪᓗ ᖃᓄᐃᓘᖃᑎᖃᕐᓂᒧᑦ ᑲᒪᔨᒻᒪᕆᒃ ᑯᐯᒻᒥ ᑐᖁᖓᔪᓂᒃ ᖃᐅᔨᓴᕐᕕᖓᑕ ᐊᓪᓚᕕᖓᓂᑦ ᐱᓯᒪᑦᓱᓂ.  ᑖᓐᓇ ᐴᑦᓴᔭᖅ ᐊᑐᕐᑕᐅᓗᓂ ᑭᓯᐊᓂᐅᒋᐊᓕᒃ ᓱᔪᙰᑦᑐᓯᐊᒍᒋᐊᖃᕐᒪᑦ (ᖃᓂᒪᓇᕐᑐᑕᖃᕐᑌᓕᓗᓂ)”.

ᐅᖃᕐᒥᔫᒐᓗᐊᖅ ᐊᓪᓚᕕᖓ ᕿᒥᕐᕈᒋᐊᓪᓚᒍᓐᓇᑐᖅ ᑕᒪᑐᒥᖓ ᐱᑦᔪᑎᐅᔪᒥᒃ. 

“ᑐᖁᖓᔪᓂᑦ ᖃᐅᔨᓴᕐᑎᖏᑦᑕ ᐊᓪᓚᕕᒻᒪᕆᖓ  ᐃᓱᒫᓗᒋᔭᐅᔪᓂᒃ ᖃᐅᔨᒪᑦᓯᐊᑐᖅ ᓄᓇᖃᕐᕐᑳᓯᒪᔪᑦ ᓄᓇᖏᓐᓂ ᐅᖃᓚᐅᕐᑐᖅ Joanne ᖃᕆᑕᐅᔭᒃᑯᑦ ᐊᓪᓚᓱᓂ.  ᖃᒻᒥᐅᓚᐅᕐᑐᖅ Viens ᖃᐅᔨᓴᕐᓂᖃᕐᑎᓗᒍ, ᐊᓪᓚᕕᖓ ᕿᒥᕐᕈᑐᑦᓴᓂᒃ ᓯᕗᕐᖐᓯᒪᒐᓱᐊᕐᓂᒧᓗ ᑲᑎᒪᔨᓂᒃ ᓄᐃᑦᓯᓚᖓᓂᕋᕐᓯᒪᔪᖅ ᓄᓇᖃᕐᖄᓯᒪᔪᑦ ᐃᓅᒍᓐᓀᖃᑦᑕᓂᖏᓐᓄᑦ.  ᓄᓇᓖᑦ ᐃᓱᒫᓗᒋᔭᖃᕐᐸᑕ ᐊᐅᓚᑕᐅᖃᑦᑕᓂᖏᓐᓄᑦ ᑐᖁᖓᔪᑦ, ᑖᒃᑯᐊᑕᒐ ᑲᑎᒪᔨᐅᔪᑦ ᕿᒥᕐᕈᒍᓐᓇᓯᐊᕋᔭᕐᑐᑦ ᐱᑦᔪᑕᐅᔪᒥᒃ ᐋᕐᕐᑭᒍᑎᑦᓴᖓᓂᓪᓗ ᐅᖃᖃᑦᑕᓗᑎᒃ. 

“ᑲᑎᒪᔩᑦ?” ᐊᐱᕆᔪᖅ ᐴᓂ ᐋᑕᒥ ᑐᓴᕐᑎᑕᐅᒐᒥ ᑐᖁᖓᔪᓂᒃ ᖃᐅᔨᓴᕐᑏᑦ ᐊᓪᓚᕕᖓᑕ ᑭᐅᒍᑎᕕᓂᖏᓐᓂᒃ. “ᖃᓄᐃᑦᓴᖏᑦᑐᖓ ᑲᑎᒪᔨᖃᕋᓗᐊᕐᐸᑦ, ᑭᓯᐊᓂ ᑲᑎᒪᔨᐅᓚᖓᔪᑦ ᐃᓚᖕᖓᓯᒪᔪᑦ ᕿᑐᕐᖓᓖᑦ ᐃᓚᒋᔭᐅᔪᓪᓗ ᑌᒃᑰᒋᐊᖃᕋᔭᕐᕐᑳᑦ? ᑐᖁᖓᔪᓂᒃ ᖃᐅᔨᓴᕐᑎ ᐃᑦᓯᕙᖃᑕᐅᒐᔭᕐᕐᑲ ᓈᓚᓪᓗᓂ ᑭᑦᓴᓂᑦᑎᓂᒃ, ᐋᓐᓂᐊᓂᑦᑎᓂᓪᓗ? ᓈᓚᖃᑦᑕᓚᖓᕚᑦ ᐃᓅᓂᑦᑎᓂ ᐃᕐᖃᐅᒪᑐᐃᓐᓇᓚᖓᓕᕐᓂᑎᓐᓂᒃ ᑕᑯᔭᕕᓂᕗᑦ ᐱᑦᔪᑎᒋᓗᒋᑦ?” 


ᐃᙯᓕᓴᕐᕕᒃ ᖃᒡᒋᖅ ᑲᖏᕐᓱᔪᐊᖅ ᑯᐯᒻᒥ, ᐃᕐᕐᑲᑐᐃᓂᖃᓚᖓᑎᓪᓗᒍ ᔫᓂ 20, 2018 (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᐃᕐᖃᑐᐃᓂᖅ

ᒪᓐᓂᓕᐅᑦ (ᔫᓂ) ᕿᑎᖓᓂ 2018-ᒥ, ᐴᓂ ᐋᑕᒥ ᓄᓪᓚᖓᕐᕐᑲᔭᖕᖏᑐᖅ ᑎᑭᑦᑕᑐᑦ ᐃᕐᕐᑲᑐᐃᔩᑦ ᑎᑭᓐᓂᐅᔭᕿᓕᕐᒪᑕ ᑲᖏᕐᓱᔪᐊᒧᑦ ᑌᒪᖕᖓᓂᑦ ᕌᐳᑦ ᐃᓄᐊᕐᑕᕕᓂᐅᑎᓪᓗᒍ.

ᐅᖃᐅᑎᔭᐅᓯᒪᔪᖅ ᒪᑦᑎᐅᓯ ᖃᒧᒑᓗᒃ, ᐸᓯᔭᐅᒍᑎᖃᕐᓯᒪᔪᖅ ᕌᐳᑦᒥᒃ ᐃᓄᐊᕐᑐᕕᓂᐅᓂᕋᕐᑕᐅᓱᓂ ᐃᕐᖃᑐᕐᑕᐅᔪᑦᓴᒫᒍᓂᖓᓂᒃ. 

ᐅᖃᐅᑎᔭᕕᓂᐅᒐᓗᐊᕐᓱᓂ ᐱᓂᕐᓗᕕᐅᓯᒪᔪᑦ ᓱᕐᕋᑕᐅᒪᓂᕐᒧᑦ ᐅᖃᕈᑎᖓᓂᒃ ᒪᓂᔨᒍᓐᓇᓂᕋᕐᑕᐅᓱᓂ ᐃᕐᕐᑲᑐᐃᕕᒻᒧᑦ ᑭᓯᐊᓂ ᐊᐅᓚᔨᖕᖏᑐᖅ ᑭᓇᐅᓐᓂᒪᖔᑦ.  ᐃᒻᒪᖄ ᐃᓄᐊᕐᑕᕕᓂᕐᓂᒃ ᖃᐅᔨᓴᓲᑦ ᐃᓚᒋᑐᐃᓐᓇᕆᐊᓕᖓ ᐁᒪᔅᒥᑦ.  ᐃᒻᒪᖄᓗᓐᓃᑦ ᐃᑲᔪᕐᑎᒧᑦ ᐃᕐᖃᑐᐃᕕᓕᕆᓂᕐᒥ ᓯᕙᓂᕐᑕᐅᔪᕕᓂᖅ ᑰᑦᔪᐊᒥᑦ. ᖃᐅᔨᒪᓂᕋᖕᖏᑐᖅ ᐊᑐᐊᕐᓯᒋᐊᖃᕐᒪᖔᕐᒥ, ᐱᖁᔭᓕᕆᔨᒨᕐᓯᒋᐊᖃᕐᒪᖔᕐᒥ ᐃᕐᕐᑲᑐᐃᔨᒨᕐᓯᒋᐊᖃᕐᒪᖔᕐᒥᓗᓐᓃᑦ.  ᖃᐅᔨᒪᑦᔭᖏᑦᑐᖅ ᓇᒧᖕᖓᓗᓂ ᑐᑭᓯᑎᑕᐅᒐᔭᕐᒪᖔᕐᒥ ᓇᒧᓪᓗᓃᑦ ᓯᕙᓂᕆᐊᖃᕐᒪᖔᕐᒥ ᖃᐅᔨᒐᓱᐊᕐᓗᓂ. 

ᑳᓇᑕᒥ, ᐱᓂᕐᓗᑕᐅᒪᓂᒧᑦ ᓱᕐᕋᑕᐅᒪᔪᑦ ᐅᖃᕈᑎᖏᑦ ᑐᓂᔭᐅᓲᑦ ᐃᕐᕐᑲᑐᐃᕕᒻᒧᑦ ᖃᓄᐃᓕᔭᐅᓚᖓᓂᖓ ᐱᓂᕐᓗᕕᖃᕐᑐᕕᓂᖅ ᑐᑭᑖᕐᑕᐅᒐᓱᐊᓕᕐᑎᓗᒍ, ᑐᑭᑖᕐᑕᐅᒌᑐᐊᕐᒪᑦ ᐸᓯᔭᑦᓴᐅᒪᖔᕐ ᖏᒻᒪᖔᓪᓗᓃᑦ. ᖃᒧᒑᓘᑉ ᑭᓪᓕᓯᓂᐊᕐᑕᐅᕕᑦᓴᖓᑕ ᐅᓪᓗᖓ ᐋᕐᕐᑭᑕᐅᕋᑕᖕᖏᑐᕐᓗᓃᑦ. (ᑖᒃᑯᐊ ᐅᓂᒃᑳᑦ ᓄᐃᑐᐃᓐᓇᕋᑕᕐᑎᓗᒋᑦ ᓱᓕ ᐅᓪᓗᖁᑎᖃᕐᑎᑕᐅᕋᑕᖕᖏᑐᖅ).  ᑭᓯᐊᓂ ᐴᓂ ᐅᖃᕐᓯᒪᔪᖅ ᑭᓇᒧᓪᓘᓃᑦ ᑕᒪᒃᑯᓂᖓ ᐅᖃᐅᑎᔭᐅᓚᕐᓯᒪᖕᖏᑐᖅ ᐊᑐᐃᓐᓇᐅᒍᒪᒐᓗᐊᕐᑎᓗᒍ ᓱᓇᐅᓂᐊᕋᓗᐊᕐᐸᑦ ᓂᕆᐅᒋᔭᑦᓴᖅ. ᐅᖃᕐᑐᖅ ᐋᑕᒥ ᐅᖃᕈᑎᒥᓂᒃ ᑭᓇᑐᐃᓐᓇᐅᑉ ᓵᖓᓅᕐᓯᒍᒪᑦᓱᓂ, ᑭᓇᒍᓗᑐᐃᓐᓇᓯᐊᑉ ᓱᑲᓐᓂᐸᐅᒍᓐᓇᕕᓕᒫᖓᓄᑦ. 

ᐅᐃᒪᓇᕐᓂᕋᕐᑕᖓ. ᔫᓂ ᐱᒋᐊᕐᕐᑲᒥᐅᓂᖓᓂᑦ ᑕᑯᓐᓇᖃᑦᑕᓚᐅᕋᒥ ᑰᑦᔪᐊᒥ ᑐᖁᔪᕕᓂᐅᑎᓪᓗᒍ Chloe Labrie, 28-ᓂᒃ ᐅᑭᐅᓕᒃ ᖃᐅᔨᓴᕐᕕᒥ ᐱᓪᓗᑯᒋᐊᓕᓕᕆᔨ ᖃᓪᓗᓈᓂᑦ ᐱᓯᒪᔪᖅ, ᑎᒍᔭᐅᓂᕕᓂᖓᓂᓪᓗ ᑰᑦᔪᐊᒥᐅᑉ Chloe-ᒥᒃ ᐃᓄᐊᕐᑐᕕᓂᐅᓂᕋᕐᑕᐅᓱᓂ, ᑐᓴᕋᑦᓴᑎᒎᕈᑕᐅᒻᒪᕆᖃᑦᑕᓱᓂᓗ ᑲᓇᑕᓕᒫᒥ ᐅᖄᔭᒻᒪᕆᐊᓘᑦᓱᓂᓗ ᓄᓇᕕᒻᒥᐅᑦ ᑐᓴᕋᑦᓴᖏᑎᒍᑦ, ᐃᕐᓂᖓᑕ ᐃᓄᐊᕐᑕᐅᓂᕕᓂᖓ ᐅᖄᔭᐅᒐᓛᑦᑎᓇᒍ ᐃᒻᒪᖄ 85-ᓂᒃ ᐅᖃᐅᓯᕐᑕᓕᒻᒥᒃ ᓂᓪᓕᕈᑕᐅᕌᐱᒐᓗᐊᕐᓱᓂ ᓄᓇᕕᒻᒥ ᑐᓴᕋᑦᓴᑎᒍᑦ ᖃᒧᒑᓘᑉ ᑎᒍᔭᐅᓂᕕᓂᖓᓂᒃ ᐅᖃᕐᓱᑎᒃ. 

“ᖃᓪᓗᓈᑦ ᓄᓇᖓᓃᑦᑐᓄᑦ, ᐅᐃᒍᐃᓄᑦ ᐃᕐᕐᑲᑐᐃᔨᓄᑦ ᐱᖁᔭᓕᕆᔨᓄᓪᓗ, ᐃᕐᕐᑲᑐᐃᕕᓕᕆᓂᕐᒧᑦ, ᑐᓴᕋᑦᓴᓕᕆᔨᓄᑦ, ᐃᕐᓂᕋ ᑕᑯᓐᓇᑕᐅᒍᑎᖃᕐᑐᓴᐅᔪᖅ ᐃᓄᒍᓗᑐᐃᓐᓇᐅᒥᔪᖅ ᑐᖁᖓᓕᕐᒥᔪᖅ. ᐅᖃᕐᑐᖅ ᐋᑕᒥ. “ᑭᓯᐊᓂ ᐊᑖᑕᒋᔭᐅᒐᒪ ᑌᒣᓘᕐᑕᐅᑎᓚᖓᑦᔭᖏᑦᑕᕋ. 

ᐊᓱᐃᓛ ᑕᑕᕐᓭᓕᕐᑐᕕᓂᖅ ᐱᓂᕐᓗᑕᐅᒪᔪᑦ ᓱᕐᕋᑕᐅᓯᒪᓂᕐᒧᑦ ᐅᖃᕈᑎᖓᓂᒃ ᐊᓪᓚᖃᓕᐅᑦᔨᓱᓂ ᕌᐳᑦ ᓱᖃᑦᓯᒍᑎᒋᒋᐊᒥᒃ ᐊᓕᐊᒋᔭᖏᓐᓂᒃ, ᓯᕗᓂᑦᓴᕆᒍᒪᔭᕕᓂᖏᓐᓂᒃ ᐊᓪᓚᓱᓂᓗ ᓇᓪᓕᒋᔨᒋᓯᒪᔭᓕᒫᖏᓐᓂᒃ. 

ᐋᑕᒥ ᐅᖃᕐᑐᖅ ᓈᒻᒪᑐᒥᒃ ᐱᓂᐊᕐᓂᖃᕐᑐᕕᓂᐅᑦᓴᓚᐅᕈᓂ. 

ᕌᐳᑦ ᑕᑯᒃᑫᔪᖅ ᑖᑑᕐᑖᐅᒋᐊᖕᖓᕈᑎᒥᓂᒃ Forum-ᒦᑦᓱᓂ ᒪᓐᑐᔨᐊᓪᒥ 2017-ᒥ. ᐊᖓᔪᖏᑦ ᓄᑲᖏᓪᓗ, ᓇᔭᖏᓪᓗ ᓲᓴᓐ, ᕕᐅᓇ, ᔨᓂᐊᕗ, Zoe ᐊᒻᒪᓗ ᒫᒃ, ᐅᓂᒃᑳᑐᑦ rap-ᒥᒃ ᑐᓴᕐᓂᒍᓱᑦᓯᒪᓐᓂᕃᑦᓱᑎᒃ, ᒥᓐᓂᒐᓚᐅᑎᖃᑎᖃᓲᒍᑦᓱᓂᓗ ᐅᖄᒍᑎᐊᐱᐅᑉ ᑎᒍᒥᐊᒐᐅᑉ ᐃᑯᒪᓕᐅᕈᑎᖓᓂᒃ. (ᐊᑦᔨᖑᐊᑦ ᐴᓂ ᐋᑕᒥᒦᓐᓂᑕᖅ).

ᐴᓂᐅᑉ ᑐᑭᓯᒪᖕᖏᓂᖓ ᑯᐯᒻᒥ ᐃᕐᕐᑲᑐᐃᕕᓕᕆᓂᕐᒥᒃ ᓄᓇᕕᒻᒥ ᐊᔪᒉᑦᑑᔭᖏᑦᑐᖅ. 

ᐱᓇᓱᐊᕈᓯᖓ  ᐃᕐᖃᑐᐃᕕᓕᕆᓂᐅᑉ ᐊᑦᔨᒋᔭᐅᑦᔭᖏᒻᒪᑦ ᑯᐯᓕᒫᒥ ᐃᕐᕐᑲᑐᐃᕕᓕᕆᓂᕐᒧᑦ.  

ᐃᕐᖃᑐᐃᔨᖃᖕᖏᑐᖅ ᓄᓇᓕᒻᒥᐅᓂᒃ ᓄᓇᕕᒻᒥ. 14 ᓄᓇᓖᑦ ᐃᕐᖃᑐᐃᔨᓐᓂᓗ ᐱᓇᓱᑦᑎᖏᓐᓂᓗ ᐊᐅᓚᓲᓂᒃ ᑭᓯᐊᓂ ᐃᕐᖃᑐᐃᔨᓖᑦ ᒪᕐᓱᕕᑦᓱᑎᒃ ᐅᕝᕙᓘᓐᓃᑦ ᓯᑕᒪᕕᑦᓱᑎᒃ ᑎᑭᓲᓂᒃ ᐊᕐᕌᒍᑕᒫᑦ, ᓯᓚ ᐱᖁᔨᑉᐸᑦ ᑭᓯᐊᓂ.

ᐃᕐᕐᑲᑐᐃᕕᒃ ᐱᒋᐊᓯᒻᒪᑦ, ᐃᕐᕐᑲᑐᐃᔩᑦ ᒪᓕᒐᓕᕆᔩᓪᓗ ᑎᑭᑎᑕᐅᓲᑦ ᖃᓪᓗᓈᑦ ᓄᓇᖓᓂᑦ ᐱᔪᑦ ᐱᓂᕐᓗᕈᑎᕕᓂᕐᓂᒃ ᓈᓚᓚᖓᓕᕐᑎᓗᒋᑦ.

ᑰᑦᔪᐊᒦᑐᐊᕋᒥᒃ ᐅᖓᕙᒥ, ᐳᕕᕐᓂᑐᒥᓪᓘᓃᑦ ᑕᓯᐅᔭᕐᔪᐊᒥ ᓄᓇᕕᒻᒥ, ᐱᓂᕐᓗᕈᑕᐅᔪᕕᓃᑦ ᑐᓵᔭᐅᖃᑦᑕᑐᑦ ᒥᑭᔪᒥ ᐃᕐᕐᑲᑐᐃᕕᐊᐱᒻᒥ.  ᑭᓯᐊᓂ ᐊᓯᖏᓐᓂ ᓄᓇᓕᓐᓂ ᐃᓂᖃᒍᓗᑐᐃᓐᓇᑐᒥ ᐃᓪᓗᒥ ᐊᑑᑎᖃᑦᑕᑐᑦ ᐆᑦᑐᕋᐅᑎᒋᓗᒍ ᓄᓇᓕᐅᑉ ᐃᙯᓕᓴᕐᕕᖓᓂ. 

ᓯᓚᕐᓂᓗᒻᒧᑦ ᓄᕐᖄᑎᑕᐅᕙᓪᓚᓲᑦ. ᐃᕐᖃᑐᐃᔩᓪᓗ ᐱᖁᔭᓕᕆᔩᓪᓗ ᐱᓇᓱᒐᕐᒥᓄᑦ ᖃᓪᓗᓈᑦ ᓄᓇᖓᓄᑦ ᐅᑎᕆᐊᖃᕐᒪᑕ, ᐃᕐᕐᑲᑐᐃᓂᖅ ᑲᔪᓯᒋᐊᓪᓚᕕᖃᓲᒍᑦᔭᖏᑦᑐᖅ ᖃᐅᑐᐊᕐᐸᑦ ᓯᓚ ᐱᐅᓯᐅᒥᑉᐸᑦ.  ᐃᕐᕐᑲᑐᐃᓂᑦᓴᖅ ᐅᓪᓗᓕᐅᕐᑕᐅᒋᐊᓪᓚᕆᐊᖃᓯᒐᒥ ᑕᕐᕐᑭᓄᑦ ᐊᒥᓱᓄᑦ ᑭᖑᕙᕈᓐᓇᑐᖅ. 

ᐊᕐᕌᒍᐃᑦ 20-ᐅᓕᕐᑐᑦ ᐃᓗᐊᓂ ᐊᒥᓱᑦ ᐊᓪᓚᑕᐅᓯᒪᓕᕐᑐᑦ ᐃᕐᖃᑐᓕᕆᓂᐅᑉ ᐃᓂᓪᓚᖓᓂᖓ ᓈᒻᒪᓈᕐᓯᒪᖕᖏᓂᕋᕐᑕᐅᓱᓂ ᐃᓄᓐᓄᑦ ᑯᐯᒃᒥ : 1993-ᒥ ᓄᐃᑕᐅᓚᐅᕐᓯᒪᔪᖅ ᐊᕐᕐᑯᓯᐅᕐᓂᖅ ᓯᕗᓂᑦᓴᓯᐊᒍᓂᕐᓴᒧᑦ ᐃᓄᐃᑦ ᐃᕐᕐᑲᑐᐃᓂᓕᕆᓂᕐᒥᒃ ᖃᐅᔨᓴᕈᑎᕕᓂᖓ, 2014-ᒥᓗ ᐸᕐᓇᓯᒪᐅᑎᒃ ᓄᐃᑕᐅᓯᒪᒻᒥᓱᓂ ᐃᓄᐃᑦ ᑯᐯᒻᒥ ᑎᒥᒻᒪᕆᖁᑎᖏᓐᓄᑦ, 2015-ᒥᓗ ᑐᓴᕐᑎᓯᐅᑎᓕᐅᕐᓂᒥᔪᑦᑯ Quebec Bar Association ᓄᐃᑦᓯᓯᐊᕐᓱᓂ ᖃᓄᖅ ᐃᕐᕐᑲᑐᐃᕕᓕᕆᓂᖅ ᐱᒍᑦᔨᓯᐊᖕᖏᑑᒻᒪᖔᑦ ᓄᓇᕕᐅᑉ ᐃᓄᖏᓐᓂᒃ, 2016-ᒥᓗ ᑯᐯᒻᒥ ᐅᓐᓂᓗᒐᕐᕕᒃ ᕿᒥᕐᕈᓯᒪᒻᒥᔪᖅ ᑎᒍᔭᐅᒪᕖᑦ ᓱᒃᑰᓂᖏᓐᓂᒃ, ᐃᕐᕐᑲᑐᐃᕕᓕᕆᓂᐅᑉ ᐊᐅᓚᑕᐅᑦᓯᐊᖏᓐᓂᖓᓂᒃ ᐱᓂᕐᓗᑌᓕᑦᓯᓂᖃᖕᖏᓂᖓᓂᓗ ᓄᓇᕕᒻᒥ ᓄᐃᑦᓯᓯᐊᕐᓱᓂ ᖃᓄᐃᓕᒋᐊᕈᑕᐅᓚᐅᕐᓯᒪᖕᖏᓂᖏᓐᓂᒃ ᑯᐯᒻᒥ ᐃᓄᐃᑦ ᐊᑑᑎᒋᐊᖃᕐᐸᑕᖏᑦᑕ, ᑐᓴᕐᑎᓯᒍᑎᒥᑕ ᐃᓱᐊᓂ ᐅᖃᕐᓱᓂ ᐃᒫᒃ: ‘ᑲᒪᔪᑦᓭᑦ ᖃᐅᔨᒪᔪᑦ ᐅᑭᐅᓂ ᐊᒥᓱᐊᓗᓐᓂ ᑕᒪᑐᒥᖓ, ᑲᕙᓗᖂᒥᓇᕐᑐᖅ 2016 ᒍᓕᕐᑎᓗᒍ ᑲᒪᒋᐊᓖᑦ ᓱᓕ ᐊᐅᓚᑦᔭᕆᐊᕐᓯᒪᖕᖏᒪᑕ ᐱᐅᓯᐅᒥᑎᑦᓯᒋᐊᕐᓂᒧᑦ ᑕᒪᑐᒥᖓ’.

2018-ᒥ ᓴᐳᓐᓂᐊᑏᒃ ᐱᖁᔭᓕᕆᔨᐅᑦᓱᑎᒃ Victor Chauvelot ᐊᒻᒪᓗ Louis-Nicholas Coupal  ᐱᓇᓱᖃᑎᒌᓚᐅᕐᑑᒃ ᑮᓇᐅᔭᕐᑖᑎᑕᐅᖁᔨᑦᓱᑎᑦ ᑎᒍᔭᐅᒪᔪᓂᒃ ᓄᓇᕕᒻᒥᐅᓂᒃ ᐃᕐᕐᑲᑐᕐᑕᐅᒋᐊᖃᕐᓂᖏᑦ ᐅᓗᐃᑦ ᐱᖓᓱᑦ ᓈᓚᐅᕐᑎᓇᒋᑦ ᑎᒍᔭᕕᓂᐅᓗᑎᒃ ᖄᖏᓐᓈᑕᐅᓯᒪᓐᓂᒪᑕ ᑕᒪᓐᓇ ᑲᓇᑕᒥ ᐱᐅᓯᐅᒋᐊᖃᑦᔭᑎᓐᓇᒍ.

ᑯᐯᒃᒥ ᖃᐅᔨᓴᕐᓂᐅᓯᒪᔪᖅ Viens ᑕᑯᓐᓇᑕᖃᓗᐊᖕᖑᐊᓯᒪᒻᒥᔪᖅ ᐃᕐᕐᑲᑐᐃᓂᓕᕆᓂᕐᒥᒃ, 2016-ᒥ ᓄᐃᑕᐅᓯᒪᔪᖅ ᕿᒥᕐᕈᓂᐊᕐᑎᓗᒍ ᖃᓄᐃᓕᖓᐅᑎᓂᖏᓐᓂᒃ ᓄᓇᖃᕐᖄᓯᒪᔪᑦ ᑯᐯᒻᒥᓗ ᓇᐅᓕᒫᓂᒃ ᐱᑦᔪᔨᕖᑦ, ᐃᓄᐃᑦ ᓄᐃᑦᓯᖃᑦᑕᓚᐅᔫᑦ ᐊᑦᔨᒌᖕᖏᑐᓂᒃ ᐅᖁᒣᒋᓲᒥᓂᒃ ᐃᕐᕐᑲᑐᐃᓂᓕᕆᓂᐅᑉ ᐃᓗᐊᒎᓕᕋᒥᒃ ᐃᓚᐅᑎᓪᓗᒍ ᑐᑭᓯᒪᐅᑎᑦᓯᐊᖏᓐᓂᖅ ᑐᑭᓯᓂᕐᓗᖃᑦᑕᓂᕐᓗ ᐊᓂᓚᕿᓂᐊᕈᑎᒃ ᖃᓄᐃᓕᖓᔪᑦᓴᐅᒪᖔᕐᒥᒃ ᒪᓕᒐᑎᒍᑦ ᐱᓀᓗᑦᓯᕈᑎᐅᒍᓐᓇᑎᓪᓗᒋᑦ ᑕᒪᒃᑯᐊ.  (ᐃᓄᐃᑦ ᓄᓇᕕᒻᒥ ᐊᒥᓲᓂᕐᓴᒪᕆᐊᓗᐃᑦ ᐃᓄᑦᑎᑑᓲᑦ ᐅᖃᐅᓯᕐᖄᕆᒐᒥᐅᒃ, ᑯᐯᒻᒥ ᐅᖃᐅᓯᓪᓚᕆᐅᓂᕋᕐᑕᐅᑎᓪᓗᒍ ᐅᐃᒍᐃᑎᑐᑦ ᐃᕐᕐᑲᑐᐃᓂᖃᓕᕐᒪᓗ ᖃᓗᓈᑎᑐᑦ ᑭᓯᐊᓂ ᐃᕐᕐᑲᑐᐃᓂᖃᓲᒍᒻᒥᓱᓂ.  

“ᑌᒣᓕᑐᐃᓐᓇᓂᖕᖏᑐᖅ ᐅᓐᓄᐊᖏᓐᓇᖅ‘ ᐅᖃᕐᑐᖅ ᐅᐃᓕᐊ ᑕᒎᓇ, ᐊᖓᔪᕐᖄᖅ ᑐᓴᖃᑦᑕᐅᑎᓕᕆᓂᕐᒥ ᒪᑭᕕᒃᑯᓂ, ᑎᒥᖁᑎᒋᔭᐅᔪᖅ ᑭᒡᒐᑐᕐᓱᓂ ᐃᓄᓐᓂᒃ ᓄᓇᕕᒻᒥ ᑯᐯᒃᒥ. “ᒥᑭᔫᓈᕐᑎᑐᖅ, ᐊᕐᕌᒎᓈᕐᑎᑐᖅ, ᑲᒪᒋᔭᐅᖕᖏᓂᕐᒧᑦ ᑲᕙᒪᒃᑯᓄᑦ ᑕᒫᓃᓚᕿᔪᒍᑦ”.

ᓵᓕ ᒍᐊᑦ ᒪᑭᕕᐅᑉ ᐊᖓᔪᕐᖄᒪᕆᖓᑦ ᐅᖃᕐᑐᖅ ᐊᕐᕌᒍᓂ ᐊᒥᓱᓂ ᐋᕐᕐᑭᒋᐊᕈᑎᑦᓭᑦ ᓄᐃᑕᐅᖃᑦᑕᓯᒪᒐᓗᐊᕐᑎᓗᒋᑦ ᑮᑖᐱᒃ ᐊᐅᓚᑦᔭᕆᐊᕈᑕᐅᕙᑦᑎᓗᒋᑦ ᐊᐅᓚᑦᔭᕆᐊᕈᑕᐅᒐᑎᓪᓗᓃᑦ ᑕᒪᒃᑯᐊ ᐋᕐᕐᑭᒍᑎᐅᒐᔭᕐᑐᑦ ᑯᐯᒃ ᐃᓄᖏᓐᓂᑦ ᐱᒋᐊᖃᓕᕐᑐᑦ ᑯᐯᒃ ᑲᕙᒪᖃᕐᕕᖓᓂᐅᖕᖏᑐᖅ.

“ᐊᕐᕌᒍᐃᑦ 20 ᐅᖓᑖᓄᓪᓗᓃᑦ ᐊᓂᒍᓕᕐᒥᔪᑦ ᐱᓇᓱᑦᑎᓯᓚᐅᕐᓯᒪᑎᓪᓗᑕ ᐃᓄᐃᑦ ᐃᕐᕐᑲᑐᐃᕕᓕᕆᓂᕐᒥᒃ ᕿᒥᕐᕈᑎᑦᓱᒋᑦ ᒥᓕᐊᓂᒃ ᐊᒥᓱᐃᓂᒃ ᑮᓇᐅᔭᕐᑐᓱᑕ ᐊᓪᓚᓯᒪᖁᔨᒧᑦ ᐃᕐᕐᑲᐃᓂᓕᕆᓂᖃᑦᓯᐊᖏᒻᒧᑦ ᐱᓂᕐᓗᑕᐅᖃᑦᑕᓂᑦᑎᓂᒃ ᓄᓇᕕᒻᒥ ᐋᕐᕐᑭᒋᐊᕈᑎᑦᓭᑦ ᓄᐃᑕᐅᓯᒪᑦᓯᐊᑐᑦ, ᐅᖃᕐᑐᖅ ᓵᓕ ᒍᐊᑦ ᖃᕆᑕᐅᔭᒃᑯᑦ ᑭᐅᑦᓱᓂ ᐅᑭᐅᕐᑕᑐᒥᒃ ᑕᑯᓐᓇᑐᒃᑯᓂᒃ, ᓚᒍᑎᖃᕐᓱᓂ ᑐᓴᕐᑎᓯᐅᑎᓕᐊᕕᓂᕐᒥᒃ ᓄᐃᑦᓯᓯᐊᕐᓱᓂ ᐱᓂᕐᓗᑐᕕᓃᑦ, ᐸᓯᔭᐅᓯᒪᔪᑦ ᐱᓂᕐᓗᑕᕕᓃᓪᓗ ᑲᒪᒋᔭᐅᑦᓯᐊᖃᑦᑕᖏᓐᓂᖏᓐᓂᒃ ᓄᓇᕕᒻᒥ.” 

***

ᐃᙯᓕᓴᕐᕕᒃ ᖃᒡᒋᖅ ᑲᖏᕐᓱᔪᐊᒥ ᐊᑐᐃᓐᓇᕈᕐᑎᑕᐅᒪᔪᖅ ᓄᓇᕕᒻᒥ ᐃᕐᕐᑲᑐᐃᔨᓄᑦ ᑎᑭᓚᖓᔪᓄᑦ ᔫᓂ 20, 2018-ᒥ. ᐸᑦᑕᒥᒃ ᑐᕐᕐᑯᐃᒋᐊᕐᕕᒃ ᐅᖓᑖᓂ ᓄᐃᑕᔪᖅ ᕌᐳᑦ ᐋᑕᒥᐅᑉ ᐃᑲᐅᕐᓂᓂ ᐊᒥᓱᓂ ᐊᑐᖃᑦᑕᓯᒪᔭᖓ. (ᐃᐊᓚᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᓪ)

ᖃᐅᑐᐊᕐᐸᑦ ᔫᓂ 20, 2018-ᒥ ᐃᕐᖃᑐᐃᔩᑦ ᑎᑭᒋᐊᖃᓛᓕᕐᑎᓗᒋᑦ, ᐴᓂ ᐊᔪᑉᐸᑐᖅ ᑲᑕᒌᒃᑯᑎᓄᑦ ᖁᓛᓂ ᖃᒡᒋᖅ ᐃᙯᓕᓴᕐᕕᒥ.  ᑌᑲᓂ ᑲᒪᔨᒻᒪᕆᒋᔭᐅᔪᖅ ᐊᕐᕌᒍᓂ ᖁᓕᓂ.  ᐅᓪᓗᒥ ᑕᑯᓐᓇᑐᖅ ᐴᓂᐅᑉ ᐃᑲᐅᕐᓂᓂ ᐊᒥᓱᓂ ᓇᔪᖃᑦᑕᓚᐅᕐᑕᖓᓂᒃ ᐸᑦᑕᖑᐊᕐᕕᒋᑦᓱᒍ ᐃᑦᔭᓯᒐᓱᐊᕐᓱᓂ LeBron James-ᒥᒃ.  ᖃᓂᑦᑐᐊᐱᒃ ᐴᓂᐅᑉ ᐊᓪᓚᕕᖓᓄᑦ.  ᐃᕐᕐᑲᐅᒪᔪᖅ ᐅᐱᒪᖃᑦᑕᓂᕕᓂᕐᒥᓂᒃ ᕿᕕᐊᕋᒥ ᑕᐅᓄᖓ ᑕᑯᖃᑦᑕᓱᓂ ᐃᕐᓂᒥᓂᒃ ᐸᑦᑕᓂᒃ ᑐᕐᕐᑯᐃᑲᑦᑕᑐᒥᒃ ᐱᒋᐅᕐᓴᖃᑎᖃᕐᓱᓂᓗᓐᓃᑦ ᐱᖃᓐᓈᒥᓂᒃ.

ᑭᓯᐊᓂ ᐴᓂ ᐃᕐᕐᑲᐅᒪᐅᒐᑐᐃᓐᓇᖃᔭᖕᖏᒋᐊᒥᒃ ᖃᐅᔨᒪᔪᖅ. 

ᑲᖏᕐᓱᔪᐊᖅ ᓄᓇᓕᑭᑦᑐᖅ ᐃᕐᖃᑐᐃᕕᖃᕋᓂ. ᑕᒐ ᐴᓂ ᑲᒪᔨᒻᒪᕆᐅᒐᒥ ᐊᑐᐃᓐᓇᕈᕐᑎᕆᒋᐊᓕᒃ ᑌᑲᓂᑦᓭᓇᖅ ᐃᕐᓂᒥᓂᒃ ᑕᑯᓐᓇᕕᒋᖃᑦᑕᓚᐅᕐᑕᒥᓂ ᐊᓕᐊᓐᓂᐸᐅᑎᓪᓗᒍ.  

ᐅᓪᓗᖅ ᐃᖏᕐᕋᒪᑦ ᐴᓂ ᐋᑕᒥ ᑯᑮᖓᓕᕐᐸᓕᐊᑐᐃᓐᓇᑐᖅ:  ᐳᓖᓯᒃᑯᓄᓗᓐᓃᑦ ᑎᒍᔭᐅᑎᑦᓯᒐᓱᐊᕐᑎᒧᓪᓗᓃᑦ ᐅᖄᕕᐅᓚᐅᕋᓴᑦᔭᒐᓂ ᓇᓃᓐᓂᒪᖔᑦ ᐸᓯᔭᐅᔪᖅ ᓱᓂᐊᕐᒪᖔᑕᓗᓐᓃᑦ ᐃᕐᕐᑲᑐᐃᕕᐅᑉ ᐃᓗᐊᓂ.

ᓄᓇᕕᒻᒥ ᐃᑲᔪᕐᑎᐅᓲᑦ ᐱᓂᕐᓗᑕᐅᔪᕕᓂᕐᓂᑦ ᓴᐳᒻᒥᔩᑦ ᓄᐃᑕᐅᓯᒪᔪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᓐᓄᑦ 2004-ᒥ, ᐃᓄᓐᓂᒃ ᐱᓇᓱᑦᑎᓖᑦ ᒪᓕᓲᒍᑦᓱᑎᓪᓗ ᐱᓂᕐᓗᕕᐅᔪᕕᓂᕐᓂᒃ ᐃᓚᖏᓐᓂᓗ ᐃᕐᕐᑲᑐᐃᓂᖃᕐᓂᖓᓂ ᑐᑦᑕᕕᐅᒍᓐᓇᓱᑎᓪᓗ ᐳᓖᓰᑦ ᐱᖁᔭᓕᕆᔩᓪᓗ ᐊᑯᓐᓂᖓᓂ. 

ᑭᒡᒐᑐᕐᑎ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐅᖃᕐᑐᖅ ᒪᓕᒋᐊᖃᕋᒥᒃ ᐅᖃᔭᕆᐊᖃᖕᖏᓂᕐᒥᒃ ᐅᖃᕆᐊᓪᓚᕕᖃᖕᖏᓂᕋᕐᓱᓂ ᐋᑕᒥᒃᑯᑦ ᐃᓚᒌᑦ ᐊᑑᑎᖃᑦᑕᓚᐅᕐᑕᖏᓐᓂᒃ ᖃᓄᓪᓗᐊᑎᒋᓪᓗ ᐅᖄᕕᐅᖃᑦᑕᓂᕐᒪᖔᑕ ᓴᐳᒻᒥᔨᓄᑦ. 

ᑭᒡᒐᑐᕐᑎ ᑎᒍᔭᐅᑎᑦᓯᒐᓱᐊᕐᑎᐅᑉ ᐊᓪᓚᕕᖓᓂᑦ ᐱᓯᒪᔪᖅ ᑯᐯᒃ ᓯᑎᒥ ᑭᒡᒐᑐᕐᑎᓗ ᑯᐯᒃᑯᑦ ᐳᓖᓯᖏᓐᓄᑦ ᐅᖃᕐᓯᒪᒻᒥᔫᒃ ᖃᖓᓕᒫᖅ ᐁᕕᐅᒍᒪᒍᑎᒃ ᐅᒃᑯᐃᖔᑦᓯᐊᑐᕕᓂᐅᓂᕋᕐᓱᑎᒃ ᐃᓚᒌᑦ ᐱᓂᕐᓗᑕᐅᒪᔪᓄᑦ ᖃᓄᑐᐃᓐᓇᖅ ᐊᐱᕐᓲᑎᑦᓴᖃᕐᐸᑕ.  

ᐴᓂ ᐊᐅᓚᔨᔪᖅ ᐁᑦᑐᑕᐅᑦᓱᓂ ᓯᑯᑦᓴᔮᐱᒻᒥᒃ ᑯᐯᒃᑯᑦ ᐳᓖᓯᖏᑦᑕ ᖃᐅᔨᓴᕐᑎᖏᑦᑕ ᐃᓚᖓᓄᑦ ᒫᑦᔨᐅᑎᓪᓗᒍ ᓯᕙᓂᕐᕕᒋᒍᓐᓇᑕᖓᓂᒃ ᖃᓄᑐᐃᓐᓇᖅ ᐊᐱᕐᓲᑎᑦᓴᖃᕐᓂᕈᓂ, ᑭᓯᐊᓂ ᐴᓂ ᐅᖄᕕᖃᖃᑦᑕᓂᖕᖏᑐᖅ ᖃᓄᐃᓘᕆᐊᖃᕐᒪᖔᕐᒥ ᖃᓄᐃᓘᕐᑐᓴᐅᒻᒪᖔᕐᒥᓗᓐᓃᑦ ᖃᐅᔨᒪᖕᖏᓇᒥ,  ᐊᐱᕐᓱᕆᐊᖃᓕᕈᓂ.

“ᑭᓇᓗᓐᓃᑦ ᐅᖃᐅᑏᓚᐅᕐᓯᒪᖕᖏᑐᖅ ᖃᓄᖅ ᐊᑖᑕᒐᓱᐊᕆᐊᖃᕐᒪᖔᑦ 19-ᓂᒃ ᐅᑭᐅᓕᒻᒥᒃ ᐃᓄᐊᕐᑕᐅᓯᒪᔨᐊᓕᒃ ᓄᓇᕕᒻᒥ” ᐅᖃᕐᑐᖅ ᐋᑕᒥ. “ᐆᑦᑑᑎᒋᓗᒍ ᑎᒥᖓᓂᒃ ᑲᒪᒐᓱᐊᕆᐊᖃᓯᑦᓱᑕ ᐅᑎᕐᒪᑦ ᑐᖁᖓᔪᓂᒃ ᖃᐅᔨᓴᕐᑎᒥᑦ, ᐅᕙᖓ ᐊᖓᔪᕐᖄᕆᔭᐅᔪᖓ ᐃᑲᔪᕐᑕᐅᔭᖏᑦᑐᖓ ᑕᒻᒪᑲᑦᑕᑎᓪᓗᖓ ᐃᓅᓯᓕᒫᕋᓂ ᐃᕐᕐᑲᐅᒪᒋᐊᖃᓚᖓᓕᕐᓱᒋᑦ ᑕᒻᒪᕈᑎᒃᑲ; ᐃᑉᐱᓂᐊᕐᓱᖓ ᓱᖕᖏᓗᐊᓕᕆᐊᒥᒃ ᐃᕐᓂᕋ ᑐᖁᖓᑎᓪᓗᒍ ᑌᒫᑦᓭᓇᖅ ᐅᖑᒪᒍᓐᓇᓚᐅᖕᖏᓇᒃᑯ ᐃᓄᐊᕐᑕᐅᒐᓱᐊᓕᕐᑎᓗᒍ.”

***

ᒪᓐᓂᓕᐅᑦ 20, 2018-ᒍᓕᕐᑎᓗᒍ ᐃᕐᕐᑲᑐᐃᔩᑦ ᑎᑭᒋᐊᖃᕐᕕᖓ ᓈᒻᒪᓕᕐᑎᓗᒍ ᐴᓂ ᐋᑕᒥ ᑐᐸᑦᑐᖅ ᓱᓇᐅᕝᕙᒎᖅ ᐃᕐᕐᑲᑐᐃᔩᑦ ᑎᑭᕐᖃᔭᓚᖓᖕᖏᑐᑦ ᐊᓄᕆᓗᐊᕐᓂᑯᖓᓄᑦ.  ᑎᒻᒥᔫᕐᑎᖏᒃ ᒥᕐᕐᑲᔭᓚᖓᔪᕆᖕᖏᑑᒃ, ᐃᕐᕐᑲᑐᐃᕕᒻᒥ ᐱᓇᓱᑦᑎ ᑰᑦᔪᐊᒥ ᐅᖃᐅᑏᔪᖅ ᐴᓂᒥᒃ, ᐆᑦᑐᕆᐊᓪᓚᓛᕐᒥᔪᐃᒎᖅ ᑕᕐᖀᒃ ᒪᕐᕉᒃ ᓈᑉᐸᓃᑦ. 

“ᐱᓇᓱᐊᕈᓯᕐᓂ ᐊᒥᓱᓂ ᐃᑉᐱᓂᐊᕐᓂᕗᑦ ᐊᑐᐃᓐᓇᕈᕐᑎᑕᕗᑦ ᐅᓪᓗᒥᐅᓚᖓᔪᒧᑦ,” ᐅᖃᕐᑐᖅ ᐴᓂ ᖁᕐᕕᓘᒃᑳᒥᓂᒃ ᐊᓪᓚᑎᕆᑦᓱᓂ ᐊᒡᒐᒥᓄᑦ. “ᑭᓯᐊᓂ ᐃᕐᕐᑲᑐᐃᔩᑦ ᑎᑭᓐᓂᓴᖓ ᓄᕐᕐᑲᑎᑕᐅᔪᖅ ᓲᕐᓗ ᐊᒥᕃᕐᑕᐅᔪᑦ ᐊᓕᑦᑐᕆᐊᓪᓚᓱᒋᑦ ᐃᑭᕗᑦ.” 

“ᐃᕐᕐᑲᑐᕐᑕᐅᔪᓂᒃ ᓈᓚᒋᐊᖃᕐᓂᖅ ᑕᕐᕐᑭᓂ ᐊᒥᓱᓂ ᑎᑭᒐᓱᐊᕈᓐᓇᑐᖅ.  ᐱᐅᖕᖏᑐᑦ ᐱᓂᕐᓗᓂᖓ ᑲᔪᓯᑐᐃᓐᓇᑎᓪᓗᒍ.  ᐅᕙᒍᓪᓕ ᐱᓂᕐᓗᕕᐅᓯᒪᔪᒍᑦ ᐃᓚᒌᑦ?  ᑭᓇᒥᓪᓗᓃᑦ ᐃᑲᔪᕐᑎᓴᖃᑦᔭᖏᑦᑐᒍᑦ.” 

ᐴᓂ ᐋᑕᒥ ᐲᔦᔪᖅ ᐃᕐᕐᑲᑐᐃᔩᑦ ᐊᑐᓚᖓᔭᕕᓂᖏᓐᓂᒃ ᖃᒡᒋᒥ ᐃᙯᓕᓴᕐᕕᒥ ᑲᖏᕐᓱᔪᐊᒥ ᒪᓐᓂᓕᐅᑦ 20, 2018-ᒥ ᐃᕐᕐᑲᑐᐃᓚᖓᓂᕕᓂᖅ ᓄᕐᕐᑲᑎᑕᐅᒻᒪᑦ ᓯᓚᕐᓂᓗᒻᒧᑦ. (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᐴᓂ ᐋᑕᒥ ᐅᖄᔪᖅ ᐃᕐᕐᑲᑐᐃᕕᐅᑉ ᑎᑭᑦᑕᑑᑉ ᐱᖁᔭᓕᕆᔨᖏᑦ ᐃᕐᕐᑲᑐᐃᔨᖏᓪᓗ ᐃᓄᑦᓯᐊᒍᓲᑦ ᐱᒍᓐᓇᕕᓕᒫᒥᒍᑦ ᐱᓇᓱᐊᕐᓱᑎᒃ, ᑭᓯᐊᓂ ᐅᖃᕐᒥᔪᖅ ᐱᓇᓱᕝᕕᓖᑦ ᑖᒃᓰᔭᕐᑕᐅᓗᐊᕐᑐᒥ ᐃᓄᓐᓄᑦ ᐃᓄᐃᑦ ᓄᓇᖓᓃᑦᑐᓄᑦ ᑲᔪᓯᑦᓯᐊᕈᓐᓇᔭᖏᑦᑐᒥ. 

ᐅᖃᕐᒥᔪᖅ ᑲᓇᑕᒥ ᐃᕐᖃᑐᐃᓂᓕᕆᓂᐅᑉ ᓅᑉᐸᓕᐊᒐᓱᐊᕐᓂᖓ ᓄᓇᓕᒻᒧᐊᖓᓂᕐᓴᒧᑦ ᐃᕐᕐᑲᑐᐃᓂᕐᒧᑦ ᓄᓇᖃᕐᖄᓯᒪᔪᑦ ᓄᓇᓕᖏᓐᓂ ᑲᓇᑕᒥᓪᓗ ᐊᑐᕐᑕᐅᕙᓕᕐᑐᖅ ᐊᓪᓚᓯᒪᔪᓕᐅᕐᓂᖅ ᓄᓇᕐᖄᓯᒪᔪᑦ ᐃᕐᕐᑲᑐᕋᑦᓭᑦ ᖃᓄᐃᑦᑐᑰᕐᓯᒪᓂᖏᓐᓂᒃ ᓄᐃᑦᓯᒐᓱᐊᕈᑕᐅᑦᓱᓂ ᐆᑦᑑᑎᒋᑦᓱᒋᑦ ᐃᓕᓐᓂᐊᕆᐊᕐᑎᑕᐅᖃᑦᑕᓯᒪᓂᖏᑦ, ᓵᓚᕐᖄᖃᕐᓯᒪᓂᖓᓗ ᑲᓇᑕᐅᑉ ᓄᓇᖃᕐᖄᓯᒪᔪᓂᒃ ᐃᓱᐊᖕᖏᑐᒧᑦ ᓱᕐᕋᑕᐅᓯᒪᓂᐅᓂᕃᑦᓱᑎᒃ, ᑕᒪᓐᓇ ᐅᑭᐅᕐᑕᑐᒥ ᐊᑐᕆᐊᓪᓚᕕᖃᑦᔭᖏᑦᑐᖅ. 

“ᐃᒻᒪᖄ ᓄᓇᖃᕐᖄᓯᒪᔪᑦ ᖃᓪᓗᓈᑦ ᓄᓇᖓᓂᒥᐅᑦ ᑭᖕᖒᒪᒋᔭᖓ ᓄᓇᖃᖄᓯᒪᔪᓪᓗ ᐱᓂᐊᕐᓂᓕᕆᔨᖏᓐᓂᑦ ᐱᓯᒪᑦᓱᓂ, ᑭᓯᐊᓂ ᐃᓄᓐᓄᑦ ᐃᓄᐃᑦ ᓄᓇᖓᓃᑦᑐᓄᑦ, ᐱᓂᕐᓗᒪᕆᑦᑐᕕᓂᐊᓗᓐᓂᒃ, ᖁᓄᔪᕐᓂᐊᑎᓂᒃ ᐱᓂᕐᓗᑐᕕᓂᕐᓂᓗ ᐃᓱᒪᒥᒍᑦ ᐃᓱᕐᕆᖏᓐᓂᒧᑦ ᐅᑎᕐᑎᑕᐅᓚᖀᑐᐃᓐᓇᐸᑦᑐᖅ ᓄᓇᓕᐊᕈᐊᐱᑦᑎᓄᑦ ᐃᑲᔪᕐᑕᐅᒍᑎᑦᓴᑕᖃᑦᔭᖏᑦᑐᒧᑦ ᐱᒍᑦᔭᐅᕕᖃᑦᔭᒐᓂᓗ,” ᐅᖃᕐᑐᖅ ᐋᑕᒥ.  

“ᐃᕐᓯᓇᕐᓵᕕᖃᓲᑦ ᓄᓇᓕᑦᑎᓂᒃ ᖃᓄᐃᓘᕆᐊᓪᓚᕕᖃᑦᔭᑎᓐᓇᑕ ᐃᓄᑐᐃᓐᓇᐅᔪᒍᑦ.  ᖃᓪᓗᓈᑦ ᓄᓇᖓᓂ ᐱᓂᐊᕐᓂᓕᕆᔩᑦ, ᓄᓇᖃᕐᖄᓯᒪᔪᑦ ᐱᓂᐊᕐᓂᓕᕆᔩᑦ, ᓈᒻᒪᓴᖕᖏᕙᓪᓛᔩᓪᓗ ᖃᓪᓗᓈᑦ ᓄᓇᖓᓃᑦᑐᑦ ᓄᓇᖃᕐᖄᓯᒪᔪᑦ ᐱᔪᓐᓇᐅᑎᒋᒻᒪᐅᒃ ᓚᐅᒐᕐᑎᓗᒋᑦ.  ᑭᓯᐊᓂᓕ ᐊᐱᕐᓱᐳᖓ ᐃᕐᓂᒪᓕ ᑐᖁᖓᔫᑉ ᐱᔪᓐᓇᐅᑎᖏᑦ?  ᓱᒧᑦ ᑭᓇᒧᓪᓗᓃᑦ ᐊᔪᐃᓐᓇᕈᑦᔭᐅᖏᑦᑐᖅ ᐊᓯᐊᓗᓐᓃᑦ ᐃᓄᒃ ᑐᖁᑕᐅᑐᐃᓐᓇᕆᐊᖃᕐᒥᔪᖅ?” 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᐊᐅᓚᑦᓯᕕᒻᒪᕆᒃ ᓄᓇᕕᒻᒥ ᑲᒪᒋᔭᖃᓲᒍᒻᒥᓱᓂ ᐃᓄᐃᑦ ᐊᑦᑕᓇᕐᑐᒦᒋᐊᖃᖕᖏᓂᖏᓐᓂᒃ ᓄᓇᕕᒻᒥ ᑭᐅᖃᑦᑕᓚᐅᖕᖏᑐᖅ ᓂᓪᓕᕈᑎᑦᓴᖃᕐᒪᖔᑕ ᐊᐱᕐᓱᑕᐅᒍᒪᑦᓱᑎᒃ ᑕᒪᒃᑯᐊ ᑎᒍᔭᐅᒪᔪᕕᓃᑦ ᐃᑉᐱᒋᔨᖃᑦᓯᐊᕋᓗᐊᕐᒪᖔᑕ ᓄᓇᓕᐊᕈᕐᓂ ᐊᓂᑎᑕᐅᑐᐊᕋᒥᒃ. 

ᐊᑦᔨᖑᐊᖓ ᒪᑦᑎᐅᓯ ᖃᒧᒑᓗᒃ, (ᒪᑦᑎᐅᓯ ᖃᒧᒑᓘᑉ Facebook-ᖓ)

ᒪᑦᑎᐅᓯ ᖃᒧᒑᓗᒃ 32-ᓂᒃ ᐅᑭᐅᓕᒃ ᑎᒍᔭᐅᔪᕕᓂᖅ ᐸᓯᔭᐅᑦᓱᓂᓗ ᐃᓄᐊᕐᓯᓯᒪᓂᕋᕐᑕᐅᓱᓂ ᕌᐳᑦ ᐋᑕᒥᒥᒃ.

ᑳᓇᑕᒥ ᑭᓇᒃᑯᓕᒫᑦ ᐸᓯᔭᐅᔪᑦ ᐱᓂᕐᓗᓂᕐᒧᑦ ᐸᓯᔭᑦᓴᐅᖏᓐᓂᕋᕐᑕᐅᓲᑦ ᐃᕐᕐᑲᑐᐃᕕᐅᑉ ᐃᓗᐊᓂ ᐸᓯᔭᑦᓴᐅᓂᖏᑦ ᓇᓗᓀᕐᑕᐅᖏᓐᓂᓕᒫᒥᓂᒃ. 

ᓯᕙᓂᐅᑎᒃᑯᑦ ᐅᖄᕕᒋᑦᓱᒍ ᖃᒧᒑᓘᑉ ᐱᖁᔭᓕᕆᔨᖓ ᓴᐳᓐᓂᐊᑎᒋᑦᓱᒍ Jacques Stuart, ᐅᖃᕈᒪᓚᐅᑦᔭᖏᑦᑐᖅ ᖃᓄᐃᑦᑐᓂᒃ ᐸᓯᔭᐅᒍᑎᖃᕐᒪᖔᑦ ᐱᒍᑦᔨᔭᖓ ᕌᐳᑦ ᐋᑕᒥᐅᑉ ᑐᖁᓂᕕᓂᖓᑕ ᒦᑦᓵᓄᑦ; (ᐃᓄᐊᕐᑐᕕᓂᖅ, ᐅᓗᕆᐊᕐᓵᕈᑎᒥᒃ ᐊᑐᓚᖓᓂᕋᕐᑐᕕᓂᖅ; ᒪᓕᒋᐊᓕᒻᒥᓂᒃ ᒪᓕᓐᓂᖏᑦᑐᖅ), ᐸᓯᔭᐅᒍᑎᑖᕐᓯᒪᓂᖓ ᓱᓕ ᐃᕐᕐᑲᑐᐃᕕᒃᑰᓂᖓᓂ.  

ᒪᑦᑎᐅᓯᐅᑉ ᐊᓈᓇᖓ ᐃᓚᖏᓪᓗ ᑭᐅᓚᐅᖕᖏᑐᑦ ᐊᐱᕐᓱᑕᐅᒍᒪᑦᓱᑎᒃ ᐅᖃᕐᕕᖃᕈᒪᒻᒪᖔᑕᓗᓐᓃᑦ ᐊᐱᕐᓱᑕᐅᑦᓱᑎᒃ Facebook-ᑯᑦ ᓄᐃᑕᕕᓂᐅᑉ ᒥᑦᓵᓄᑦ ᐊᕐᕐᑯᑎᖃᕐᓗᑎᓪᓗᓃᑦ ᑖᑦᓱᒥᖓ ᑐᓴᕋᑦᓴᒥᒃ ᐱᓇᓱᐊᓕᕐᑎᓗᑕ. 

ᖃᒧᒑᓗᒃ ᐊᓯᖏᓐᓂᒃ ᐸᓯᔭᐅᒍᑎᖃᕐᓯᒪᒻᒥᔪᖅ ᒪᓐᑐᔨᐊᒥ ᐊᓯᖏᓐᓂᓗ ᓄᓇᕕᒻᒥ ᓄᓇᓕᓐᓂ ᐊᕐᕌᒍᐃᑦ ᖁᓖᑦ ᐃᓗᐊᓂ ᑎᓪᓕᒐᕐᓂᒧᑦ, ᓱᒃᑯᐊᑎᕆᓂᕐᒧᑦ ᐃᑖᕐᓂᒧᑦ, ᐸᕝᕕᓵᕆᓂᕐᒧᑦ, ᐱᒋᐊᕐᓂᓂᕐᒧᑦ ᐃᓄᓐᓂᒃ ᐳᓖᓯᓂᓪᓗ, ᐃᑦᓯᒎᕐᓂᑯᑦ ᐱᔮᕐᓱᓂᕐᒧᑦ ᐊᕐᓇᓂᒃ ᐊᒻᒪᓗ ᐊᑕᐅᓯᕐᒥᒃ ᐱᒻᒪᕆᐅᓗᐊᖕᖏᑐᒥᒃ ᐱᓂᕐᓗᑌᓕᓂᕐᒧᑦ ᒪᓕᒐᑦᓴᑖᕆᓯᒪᔭᒥᓂᒃ ᒪᓕᖕᖏᓂᕕᓂᕐᒧᑦ ᐃᕐᕐᑲᑐᐃᕕᒃᑯᓗ ᒪᓕᒐᑦᓴᑖᕆᓯᒪᔭᒥᓂᒃ ᐋᓐᓂᐊᓯᐅᑎᓂᒃ ᐄᕐᕐᑲᓯᐊᖁᔨᒍᑎᒥᒃ ᒪᓕᖕᖏᓂᕕᓂᕐᒧᑦ. 

ᒪᑦᑎᐅᓯ ᓄᐃᒋᐊᖃᓯᒪᔪᖅ ᐃᕐᕐᑲᑐᐃᕕᒻᒥ ᑲᖏᕐᓱᔪᐊᒥ ᐊᕗᓐᓂᑎ 7, 2018-ᒥ ᐸᓯᔭᐅᒍᑎᑖᕆᐊᓪᓚᓯᒪᓐᓂᕋᒥ ᒪᕐᕉᓂᒃ ᓄᑖᓂᒃ ᐸᕝᕕᓵᕆᓂᕐᒧᑦ ᓈᒻᒪᖏᑦᑐᓂᑦ, ᑭᓯᐊᓂ ᐃᕐᖃᑐᐃᔨ ᐊᒻᒪᓗ ᐱᖁᔭᓕᕆᔩᑦ ᓄᓇᓕᒻᒧᑦ ᑎᑭᒋᐊᓪᓚᓂᖕᖏᑐᑦ.

ᐃᕐᖃᑐᐃᓚᖓᔪᕕᓃᑦ ᓄᕐᖃᑎᑕᐅᑐᐃᓐᓇᑐᕕᓃᑦ ᓯᓚᕐᓂᓗᒻᒧᑦ.

ᐱᓇᓱᐊᕈᓰᑦ ᐱᖓᓲᔪᕐᑐᑦ ᓈᓚᐅᕐᑎᓇᒋᑦ, ᕌᐳᑦ ᐋᑕᒥ ᐃᓅᒍᓐᓀᐳᖅ ᒪᑦᑎᐅᓯ ᖃᒧᒑᓗᓪᓗ ᐸᓯᔭᐅᒍᑎᑖᕐᐳᖅ ᐃᓄᐊᕐᑐᕕᓂᐅᓂᕋᕐᑕᐅᓱᓂ. 


“ᓭᒻᒪᐅᑎᓂᖅ ᑐᑭᖃᖕᖏᑐᖅ ᐅᕙᓐᓄᑦ”, ᐅᖃᕐᑐᖅ ᐴᓂ ᐋᑕᒥ, ᐊᑦᔨᖑᐊᒥ ᓄᐃᑕᔪᖅ ᐸᓂᖓᓗ ᐃᓕᓴᐱ ᑲᖏᕐᓱᔪᐊᒥ. “ᐃᒥᐊᓗᒃ ᓂᐅᕐᕈᓴᕐᑕᐅᖏᓐᓇᖁᖅ, ᐱᔮᕐᓲᑎᖏᓐᓇᖁᑦ ᓄᓇᓕᓪᓗ ᓱᓕ ᐱᓀᓗᑕᖃᕐᐳᖅ. ᐃᕐᓂᒪ ᐃᓄᐊᕐᑕᐅᓂᖓᓂᒃ ᑕᒪᒃᑯᐊ ᓄᕐᕐᑲᑎᑦᓯᓯᒪᑦᔭᖏᑦᑐᑦ. ᐃᓚᖓᓂ ᐃᓱᒪᓲᒍᕗᖓ ᐃᒻᒪᖄ ᐃᓘᓐᓈᓗᑕ ᑐᖁᖓᖁᔭᐅᔪᒍᑦ”. (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᓭᒻᒪᐅᑎᓂᖅ?

ᐋᑕᒥᒃᑯᑦ ᐃᓚᒌᑦ ᓱᓕ ᑭᑦᓴᕈᑎᖃᕐᐳᑦ ᐃᓚᖕᖓᓯᒪᓂᕐᒥᓂᒃ, ᑲᖏᕐᓱᔪᐊᒥᐅᓕᒫᑦ ᑌᒣᒻᒥᑎᓪᓗᒋᑦ.

ᓄᓇᓕᒻᒥᐅᑦ ᐅᖃᖃᑦᑕᑐᑦ ᐋᑕᒥᒃᑯᑦ ᐃᓚᒌᑦ ᖃᒧᒑᓗᒃᑯᓗ ᐃᓚᒌᑦ ᓱᓕ ᐊᕐᓱᕈᓐᓇᑐᒃᑰᑐᑦ ᐃᓚᓐᓈᖏᓪᓗ ᓇᓪᓕᒋᔭᖏᓪᓗ.  

ᐊᒥᓱᓪᓗ ᐃᒻᒥᓂᐊᕐᓯᒪᑎᓪᓗᒋᑦ ᐊᕐᕐᑯᓇᕐᓯᒪᑦᓱᑎᓪᓗ ᑕᕝᕙᓂ ᐊᕐᕌᒍᒥ ᑲᖏᕐᓱᔪᐊᒥᐅᓕᒫᑦ ᓱᕐᕋᑕᐅᓯᒪᔪᑦ ᐅᖁᒣᑦᑐᐊᓗᓐᓄᑦ ᖃᓅᒐᓗᐊᕐᐸᑦ.  

ᓵᓕ ᐊᕐᖓᒃ ᓯᕗᓕᕐᑎᐅᓯᒪᔪᖅ ᑲᖏᕐᓱᔪᐊᒥ ᓅᕕᒻᐱᕆ 2018 ᑎᑭᕋᑕᕐᓱᒍ, ᑭᐅᓚᐅᖕᖏᑐᖅ  ᐊᐱᕐᓱᑕᐅᒍᒪᑦᓱᓂ ᓱᓕᒻᒪᖔᑕᓗᓐᓃᑦ ᖃᐅᔨᓴᕈᒪᑎᓪᓗᑕ ᑖᑦᓱᒥᖓ ᐅᓂᒃᑳᓕᐅᕐᓱᑕ.  ᑭᐅᖃᑦᑕᓚᐅᖕᖏᒥᔪᖅ ᓂᓪᓕᕈᑎᖃᖁᔭᕗᓐᓂ ᓄᓇᓕᒃ ᐃᑲᔪᕐᑕᐅᒍᑎᑦᓴᖃᑦᓯᐊᕋᓗᐊᕐᒪᖔᑦ ᓵᖕᖓᓯᒐᓱᐊᕐᑎᓗᒍ ᑕᕝᕙᓂ ᐊᕐᕌᒍᒥ ᐊᕐᓱᕈᓐᓇᑐᒃᑰᕈᑎᐅᖃᑦᑕᓚᐅᕐᑐᓄᑦ.  ᓯᕗᓕᕐᑎᑖᕐᕐᑲᒥᖓ ᕿᐊᓪᓚᒃ ᖁᒫᓗᒃ ᑕᑯᔭᐅᓐᓂᖏᒻᒥᔪᖅ ᐅᖃᐅᓯᑦᓴᖃᕐᒪᖔᑦ ᐊᐱᕆᔭᐅᒍᒪᑦᓱᓂ.) 

ᒥᐊᔨ ᐱᓗᕐᑑᑦ, ᓯᕗᓕᕐᑎᐅᓯᒪᔪᖅ ᑲᖏᕐᓱᔪᐊᒥ ᐊᒻᒪᓗ ᐊᖓᔪᕐᖄᕆᔭᐅᑦᓱᓂ ᓄᓇᓕᐅᑉ ᖃᓄᐃᖕᖏᓯᐊᕐᓂᓕᕆᔨᖏᓐᓄᑦ, ᑎᒥᐅᑦᓱᓂ ᐱᑐᑦᑕᕕᖃᓲᖅ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᐱᒍᑦᔨᕕᒻᒧᑦ ᑰᑦᔪᐊᒥ, ᓇᓗᓀᕐᓯᓯᐊᓚᐅᕐᑐᖅ ᓄᓇᓕᐅᑉ ᓲᖑᔫᓂᖓᓂᒃ ᑭᓯᐊᓂᓗ ᐅᖃᕐᒥᓱᓂ ᐅᖁᒣᑦᑑᖃᑦᑕᓂᖓᓂᒃ ᓄᓇᓕᒃ ᐊᕐᓱᕈᓐᓇᑐᒃᑰᑎᓪᓗᒍ ᑕᑯᓐᓇᕆᐊᒥᒃ.  

ᒥᐊᔨ ᐅᖃᕐᑐᖅ ᐃᑲᔪᕐᑏᑦ ᐃᓅᓯᓕᕆᓂᕐᒧᑦ ᐃᓄᒃᑎᑑᕈᓐᓇᑐᑦ ᑎᑭᑎᑕᐅᖃᑦᑕᑐᑦ ᓄᓇᕕᐅᑉ ᐃᓗᓯᓕᕆᕕᖓᓂᑦ ᐱᑎᓪᓗᒋᑦ ᐊᕐᓱᕈᓐᓇᑐᒃᑰᓕᑐᐊᕐᒪᑦ ᓄᓇᓕᒃ ᐃᑲᔪᕐᓯᔪᒻᒪᕆᐊᓘᖃᑦᑕᑐᑦ ᓄᓇᓕᓐᓂᒃ, ᑭᓯᐊᓂ ᐃᑭᓗᐊᕐᑐᐊᐲᑦ ᐃᓄᓕᕆᒍᓐᓇᑐᑦ ᓄᓇᕕᒫᒧᑦ. 

ᒥᐊᔨ ᐅᖃᕐᒥᔪᖅ 80%-ᒥᑦ 85%-ᒧᑦ ᓄᓇᕕᒻᒨᑕᐅᖃᑦᑕᑐᑦ ᑮᓇᐅᔭᐃᑦ ᑯᐯᒃᑯᑦ ᑲᕙᒪᖓᓂᑦ ᐱᓯᒪᓂᕋᕐᓱᒋᑦ ᑭᓯᐊᓂᓗ ᐃᑲᔪᕐᓯᒍᑎᑦᓭᑦ ᓵᑦᓯᒍᑎᒋᓪᓚᕆᓪᓗᒋᑦ ᓄᓇᓖᑦ ᐱᓀᓗᑕᖏᓐᓂᒃ ᓯᕕᑐᔪᒧᑦ ᐱᑕᖃᑦᔭᖏᑦᑐᑦ. ᖃᓄᐃᖕᖏᓯᐊᕐᓂᓕᕆᓂᕐᒧᑦ ᑲᑎᒪᔩᑦ $25,000-ᓂ ᐊᕐᕌᒍᑕᒫᑦ ᑮᓇᐅᔭᕐᑖᓲᑦ ᖃᓄᐃᓘᕐᑎᓯᒍᑎᑦᓴᒥᓂᒃ ᐊᓯᖏᓐᓂᑦ ᑮᓇᐅᔭᕐᓯᐅᕆᐊᖃᓯᕙᑦᓱᑎᒃ ᖃᓄᐃᓘᕐᑎᓯᒍᑎᒋᒍᒪᔭᒥᓂᒃ ᓱᓇᒥᖁᔨᑐᐊᕈᑎᒃ. 

“ᑕᒪᓐᓇ ᐊᓯᑦᔨᕆᐊᓕᒃ”, ᐅᖃᕐᑐᖅ ᒥᐊᔨ. “ᐅᕙᒍᑦ ᐃᓅᑦᓱᑕ, ᐃᓕᑕᕆᔭᐅᓯᒪᔪᒍᑦ ᓂᐯᑦᑑᑎᓪᓗᑕ. ᓂᐯᑦᑐᒪᕆᐅᑎᓪᓗᑕ. ᐅᖄᒋᐊᖃᓕᕋᓗᐊᕋᑦᑕᓗ ᓂᐱᖃᑦᓯᐊᓗᑕ, ᓂᐯᑕᖔᓯᑐᐃᓐᓇᓲᒍᔪᒍᑦ.  ᓂᑦᔮᕈᑎᖃᕆᐅᕐᓴᕆᐊᖃᕐᖂᑐᒍᑦ ᐅᖄᒋᐊᓕᑦᑎᓂᒃ ᑲᔪᓯᑦᓯᐊᓗᑕ.  ᑭᓯᐊᓂ ᐃᓚᖓᓂ ᓱᓕ ᑲᑉᐱᐊᓱᕐᖂᑐᒍᑦ.” 

ᐊᒥᓱᑦ ᓄᓇᕕᒻᒥᐅᑦ ᐃᒻᒥᓂᐊᖃᑦᑕᑐᑦ ᐅᖄᔭᐅᖃᑦᑕᓯᓚᐅᔪᕗᑦ facebook-ᑯᑦ ᐅᐱᕐᖓᒪᑦ ᐅᑭᐊᑦᓴᐅᓕᕐᒪᓗ ᑐᓴᕐᕙᓚᑦᑕᐅᓴᕋᑖᓗᑦᓱᑎᒃ ᖃᓪᓗᓈᑦ ᓄᓇᖓᓂ ᑐᓴᕋᑦᓴᓂᐊᕐᑎᓄᑦ. 

ᑰᑦᔪᐊᒥ ᐅᐃᒪᓇᕐᑑᑎᑕᐅᑎᓪᓗᒍ ᑲᑎᒪᓂᖃᓕᕐᑐᕕᓂᖅ ᐅᒃᑑᐱᕆ ᓄᖕᖑᐊᓂ.

ᐴᓂ ᐋᑕᒥ ᐅᖃᕐᑐᖅ ᐅᖄᔭᐅᒐᓗᐊᕐᐸᑦ ᑐᓴᕋᑦᓴᑎᒍᑦ ᖃᓪᓗᓈᑦ ᓄᓇᖓᓂ ᑕᒪᓐᓇ ᓯᕕᑐᓂᕐᓴᒨᓕᖓᔪᒥᒃ ᐊᓯᑦᔩᓚᖓᑦᔭᖏᑦᑐᖅ, ᑌᒫᑦᓭᓇᖅ ᑐᓴᕋᑦᓴᑎᒍᑦ ᐅᖄᔭᐅᖃᑦᑕᓚᐅᔪᓂᖓ Viens-ᑯᑦ ᖃᐅᔨᓴᕐᓂᖓᑕ ᐊᐅᓚᑦᔦᓯᒪᑦᔭᖏᒻᒪᑦ ᑯᐯᒃᑯᑦ ᓇᐅᓕᒫᓂᒃ ᐱᒍᑦᔨᕕᖓᓂᒃ ᕌᐳᑦ ᑐᖁᓂᕕᓂᖓᑕ ᑭᖑᓂᐊᓂ ᐃᑲᔪᕐᓯᓂᖃᑦᔭᒐᓂᓗ ᐃᓚᒌᓂᒃ.  

“ᐅᓇᑕᕐᑎᓄᑦ ᐃᓕᒐᒪ ᐃᓕᓚᐅᕐᓯᒪᕗᖓ ᑲᓇᑕᒥᒃ ᓄᓇᒐᓂᒃ ᑐᖁᒍᑎᖃᕈᓐᓇᓕᕐᓱᖓ, ᖃᓄᑐᐃᓐᓈᕕᖃᕐᓯᒪᒐᓗᐊᕐᐸᑦ ᐃᓅᖃᑎᒃᑲᓂᒃ. ᐅᖃᕐᑐᖅ ᐋᑕᒥ. “ᑭᓯᐊᓂᓕ ᑭᕕᐊᕋᕐᓗᖓ ᓇᒧᑐᐃᓐᓇᖅ, ᓱᒐᓱᐊᕐᓗᖔ? ᓚᒍᓐᓇᓕᕐᑐᖓ” (ᐴᓂ ᐋᑕᒥᒻᒦᓐᓂᑕᖅ ᐊᑦᔨᖑᐊᖅ).

ᐴᓂ ᐋᑕᒥ ᑕᖃᒋᔭᓕᒃ ᑐᓴᕐᑎᓯᒍᑎᓕᐊᒍᓯᒪᔪᐊᓗᓐᓂᒃ, ᖃᐅᔨᓴᕐᓂᐅᓯᒪᔪᓂᒃ ᐊᐱᕐᓱᑲᑦᑕᓂᐊᓗᓐᓂᓗ ᓄᓇᖃᕐᖄᓯᒪᔪᓄᐊᖓᔪᓂᒃ 1996ᒥ ᖃᐅᔨᓴᕐᓂᖃᓚᐅᕐᓯᒪᑎᓪᓗᒍ ᓱᓕ ᑲᔪᓯᒻᒪᑕ ᖃᐅᑕᒫᑦ ᐃᓅᓯᕆᔭᖏᓐᓂᒃ ᓄᓇᓕᖓᓂ ᓱᕐᕃᕙᓪᓕᐊᔭᒐᑎᒃ. 

ᒫᓐᓇ ᑳᓇᑕᒥ ᖃᐅᔨᓴᕐᑏᑦ ᐊᕐᓀᓗ ᐸᓃᓪᓗ ᐊᓯᐅᒋᓐᓇᐸᓐᓂᖏᓐᓂᒃ ᐃᓄᐊᕐᑕᐅᕙᓐᓂᖏᓐᓂᓗ ᕿᒥᕐᕈᓱᑎᒃ ᓄᓇᖃᕐᖄᓯᒪᔪᑦ ᐊᕐᓀᑦ ᐱᔮᕐᓱᑕᐅᕙᓐᓂᖏᓐᓄᑦ ᐃᓱᓕᓛᓕᕐᒥᔪᖅ ᑎᓯᒻᐱᕆ 2018-ᒥ, ᑐᓴᕐᑎᓯᒍᑎᖏᑦ ᐊᑐᐃᓐᓇᕈᓛᕐᒥᓱᑎᒃ ᐁᕆᓕ 2019-ᒥ.  

ᑯᐯᒻᒥ Viens ᖃᐅᔨᓴᕐᓂᖓ ᐱᔭᕇᕐᐸᓕᐊᒍᓇᐅᓯᒻᒥᔪᖅ 2018 ᓄᖕᖑᐊᓂ ᕿᒥᕐᕈᓱᓂ ᖃᓄᐃᓕᖓᐅᑎᒻᒪᖔᑕ ᑯᐯᒻᒥ ᓇᐅᓕᒫᓂᒃ ᐱᒍᑦᔨᕖᓪᓗ ᓄᓇᖃᕐᖄᓯᒪᔪᐃᓪᓗ.

ᑐᓴᕐᑎᓯᒍᑎᖏᑦ ᑭᖑᓪᓕᐹᑦ ᐋᕐᕿᒋᐊᕈᑎᑦᓴᐅᖁᔭᖏᓪᓗ ᓂᕆᐅᓐᓇᑐᑦ ᓯᑉᑎᒻᐱᕆ 2019-ᒥ. 

ᐴᓂ ᐋᑕᒥ ᐅᓂᒃᑲᐅᔨᓚᐅᔪᒻᒥᔪᖅ ᑕᒣᓐᓂᒃ ᖃᐅᔨᓴᕐᓂᖃᕐᑑᓂᒃ ᑭᓯᐊᓂ ᐃᓱᒪᔪᖅ ᑖᒃᑯᐊ ᑐᓴᕋᑦᓴᐅᖃᑦᑕᑐᓪᓗ ᓭᒻᒪᐅᑎᓂᕐᒧᑦ, ᑲᓇᑕᐅᑉ ᐊᖓᔪᕐᖄᒪᕆᖓᑕ ᕿᓂᕈᑎᑐᐃᓐᓇᕆᔮᕐᒥᔭᖏᑦ ᓇᓗᓀᕐᓯᒋᐊᑦᓯᐊᓂᕐᒧᑦ ᖃᓄᐃᓕᖓᐅᑎᓂᒋᓐᓂᒃ ᑲᓇᑕᐅᑉ ᑲᕙᒪᖓᑕ ᓄᓇᕐᖄᓯᒪᔪᐃᓪᓗ ᖃᓪᓗᓈᓄᓪᓗ ᐃᓕᖓᓂᕐᓴᑐᐃᓐᓇᐅᓂᐊᕐᒥᓱᑎᒃ ᖃᐅᑕᒫᑦ ᐃᓅᓯᑦᑎᓂᒃ ᐊᓯᑦᔩᕌᐱᑦᔭᒍᓐᓀᓗᑎᒃ.  

ᒥᐊᔨ ᐱᓗᕐᑑᑦ ᑌᒫᑦᓭᓇᖅ ᐃᓱᒪᔪᖅ.

“ᐃᓛᓂᐅᖕᖏᑑᒐᓗᐊᖅ ᐅᕙᓐᓄᑦ ᓱᕙᓪᓕᖁᑎᐅᑦᔭᖏᑦᑐᑦ” ᐅᖃᕐᑐᖅ ᒥᐊᔨ. “ᖃᐅᔨᓴᕐᓃᑦ, ᓭᒻᒪᐅᑎᓂᖅ) ᐃᓱᒪᓚᕿᓐᓇᑐᑦ ᐅᖄᔭᐅᒍᓗᑐᐃᓐᓇᕆᐊᖏᑦ.  ᑭᓯᐊᓂ ᐃᒻᒥᓂᒃ ᐊᐱᕐᓱᒥᔪᖓ, ‘ᓇᐅᒃ ᐱᔭᑦᓭᑦ ᐅᖄᔭᐅᔪᑦ? ᓇᐅᒃ ᑮᓇᐅᔦᑦ ᑲᒪᒍᑎᑦᓭᑦ ᐅᖄᔭᐅᔪᑦ? ᐅᕙᑦᑎᓄᑦ ᑎᑭᖃᑦᑕᔭᖏᑦᑐᑦ. ᑕᑯᖃᑦᑕᔭᖏᑦᑕᑲ ᓄᓇᓕᑦᑎᓂ.” 

ᐃᓄᓐᓄᑦ ᑎᒥᖁᑎᒋᔭᐅᔪᖅ ᑳᓇᑕᒥ ᑌᔭᐅᔪᖅ ᐃᓄᐃᑦ ᑕᐱᕇᑦ ᑳᓇᑕᒥ, ᐃᓚᐅᑎᑦᓯᔪᖅ ᓭᒻᒪᐅᑎᓂᕐᒥᒃ ᑐᕌᒐᓪᓚᕆᐅᖃᑕᐅᑎᑦᓯᓱᓂ ᑎᒥᖁᑎᒥᑕ ᐸᕐᓇᓯᒪᔭᖏᓐᓄᑦ ᐊᐅᓚᑦᔭᕆᐊᕈᑎᑦᓴᐅᑎᓪᓗᒋᑦ 2016-2019, ᑭᓯᐊᓂ ᐅᖄᒍᒪᓚᐅᑦᔭᖏᒻᒥᔪᑦ ᑖᒃᑯᓇᓂ ᐊᓪᓚᑕᕐᑎᓂ.  

ᒥᐊᔨ ᓴᐃᒪᓐ ᑰᑦᔪᐊᒥᐅᖅ, ᑐᑭᒧᐊᑦᑎᓯᔨ ᐊᑯᓂᐅᓕᕐᑐᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐅᑭᐅᕐᑕᑐᒧᐊᖓᔪᓄᓪᓗ ᑭᒡᒐᑐᕐᑎᐅᓚᐅᔪᒻᒥᓱᓂ ᑲᓇᑕᒥᒃ ᑭᒡᒐᑐᕐᓱᓂ ᐊᑎᓕᐅᕐᕕᐅᓂᐊᕐᑐᒥᒃ ᓄᕕᒻᐱᕆᐅᑎᓪᓗᒍ ᓄᐃᑦᓯᓚᐅᔪᒻᒥᔪᖅ ᑲᓇᑕᐅᓪᓗ ᑯᐯᒃᑯᓗ ᑲᕙᒪᒋᓐᓂᒃ ᐅᐃᒪᓇᕐᓂᕃᖁᔨᑦᓱᓂ ᐃᒻᒥᓂᐊᓗᐊᓕᕐᑐᓄᑦ ᐃᓅᓯᒃᑯᓗ ᐱᓐᓀᓗᑕᖃᕐᓂᒧᑦ ᓄᓇᕕᒻᒥ. 

ᒥᐊᔨ ᓴᐃᒪᓐ ᐊᖕᖓᖓ 22-ᑐᐃᓐᓇᓂᒃ ᐅᑭᐅᓕᒃ ᐃᒻᒥᓂᐊᕐᓯᒪᒻᒥᔪᖅ ᐅᒃᑑᐱᕆᐅᑎᓪᓗᒍ Facebook-ᑯᓗ ᐊᓪᓚᓱᓂ ᒥᐊᔨ ᐅᖃᕐᓯᒪᔪᖅ ᐱᒍᑦᔭᐅᒍᑎᖃᖕᖏᓗᐊᕐᓂᒧᑦ ᑯᐯ ᐅᑭᐅᕐᑕᑐᖓᓂ ᐊᖕᖓᖓ ᐃᑲᔪᕐᓯᔭᐅᓐᓂᖏᑦᑐᖅ ᐃᑲᔪᕐᑕᐅᒋᐊᖃᓕᕐᓱᓂ. 

(ᓴᕐᕿᑕᐅᓯᒪᓕᕐᑎᓗᒍ ᑖᓐᓇ ᐊᓪᓚᑕᕗᑦ, ᐊᑎᓕᐅᕐᑎᓯᕕᒃ ᑭᖕᖒᒪᑦᓯᖏᓐᓈᓚᐅᕐᑐᖅ 943-ᓂᑦ ᐊᑎᓕᐅᕐᑐᓴᓂᒃ ᓭᓂᕐᑕᐅᒍᑎᓂᑦ ᑐᕌᖃᕐᓱᓂ 18 000-ᓂᒃ ᐊᑎᕐᓂᒃ).

ᒥᐊᔨ ᐱᓗᕐᑑᑦ ᐅᖃᕆᐊᓪᓚᑐᖅ ᓂᕆᐅᓐᓂᑖᖃᑦᑕᓂᕋᕐᓱᓂ ᐃᓄᐃᑦ ᓯᕗᓕᕐᑎᖏᑦ  ᒥᐊᔨ ᓴᐃᒪᓐ ᐆᑦᑑᑎᒋᓗᒍ ᐊᐅᓚᑦᔭᕆᐊᑐᐊᕐᒪᑕ. ᑭᓯᐊᓂ ᐊᐅᓚᑦᔭᕆᐊᕈᑎᓪᓚᕆᐊᓗᓐᓂᒃ ᓄᐃᑕᔪᖃᑦᔭᖏᑦᑐᖅ ᑳᓇᑕᒥ ᑯᐯᒻᒥᓗ ᐱᓂᐊᕐᓂᓕᐅᕐᑎᓂᑦ ᐱᔪᓂᒃ ᐊᕗᖓᓕᒫᖅ ᑲᔪᓯᑎᑦᓯᒍᓐᓇᓂᐊᓕᕐᑐᓂᒃ.

“ᓯᕗᓕᕐᑎᐅᖏᓐᓇᓱᖓ ᑎᑭᑐᐊᕐᒪᑕ ᑲᖏᕐᓱᔪᐊᒧᑦ ᓯᕗᓕᕐᑎᒪᕇᑦ ᐅᕝᕙᓘᓐᓃᑦ ᐱᓂᐊᕐᓂᓕᕆᔨ  ᐃᒻᒥᓄᑦ ᐃᓱᒪᖃᑦᑕᓯᒪᔪᖓ ᓱᓇᐅᖕᖏᑐᒧᑦ ᑕᒪᐅᖕᖓᑐᑦ. ᑎᑭᑦᑐᖃᕋᓗᐊᕐᐸᑦ ᓱᓇᑖᓚᖓᑦᔭᖏᒻᒥᔪᒍᑦ, ᑕᒪᓐᓇ ᐊᓕᐊᒋᖃᑦᑕᓯᒪᑦᔭᖏᑦᑕᕋ.

ᐋᓐᑎᕆ ᐊᓄᒑᖅ, ᕉᐳᑦ ᓄᑲᖓ, ᑲᖏᕐᓱᔪᐊᖅ, ᑯᐯᒃᒥ (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

ᒪᑭᕕᒃ, ᑎᒥᐅᔪᖅ ᑯᐯᒻᒥᐅᓂᒃ ᐃᓄᓐᓂᒃ ᑭᒡᒐᑐᕐᓱᓂ, ᐅᖃᕐᑐᖅ, ᐅᖁᒣᑦᑐᑰᕈᑎᒋᖃᑦᑕᓚᐅᕐᑕᖏᑦ ᑲᖏᕐᓱᔪᐊᒥᐅᑦ ᐊᓯᖏᑦᑕᓗ ᓄᓇᕕᒻᒥ ᓄᓇᓖᑦ ᓄᐃᑦᓯᓯᐊᕐᑐᑦ ᑌᒣᓕᖓᑦᓭᓇᑐᐃᓐᓇᓂᐊᕈᑦᑕ ᐱᕙᓪᓕᐊᓚᖓᖕᖏᑐᒍᑦ. 

“ᒪᑭᕕᒃ ᐃᓱᒫᓗᒋᔭᑐᐊᖃᖕᖏᑐᖅ ᐃᕐᕐᑲᑐᐃᕕᓕᕆᓂᕐᒥ ᐃᓱᒪᒃᑯᓗ ᐋᓐᓂᐊᔪᓕᕆᓂᕐᒧᑦ ᐱᒍᑦᔭᐅᒍᑎᖃᑦᓯᐊᖏᓐᓂᒥᒃ ᐃᓄᐃᑦ ᓄᓇᖓᓂ ᐃᓱᒫᓗᓐᓇᒥᒻᒪᑦ ᑕᒪᒃᑯᓂᖓ ᐱᒍᑦᔭᐅᒍᑎᖃᖕᖏᓂᕗᑦ ᓱᕐᕋᐃᖃᑦᑕᒥᒻᒪᑦ”, ᐅᖃᕐᑐᖅ ᒪᑭᕝᕕᑯᑦ ᐊᖓᔪᕐᖄᖓ ᓵᓕ ᒍᐊᑦ.  “ᐃᓕᕋᒃᑯᓇᕐᑐᖅ ᐊᒥᓱᐃᓂᒃ ᑭᖑᓯᒍᑎᖃᕐᓂᒥᕗᑦ ᐃᓅᖃᑎᕗᑦ ᐃᓕᐊᕐᕆᓇᕐᑐᑰᓚᕿᑎᓪᓗᒋᑦ”. 

“ᐱᓐᓀᓗᑕᕗᑦ ᐋᕐᕿᑕᐅᕐᖃᔭᖕᖏᑐᖅ ᖃᓪᓗᓈᑦ ᓄᓇᖓᓃᑦᑐᓄᑦ. ᐅᕙᒍᑦ ᐃᓅᔪᒍᑦ ᐋᕐᕐᑭᒍᑎᑦᓴᖏᓐᓂᒃ ᓇᕝᕚᕈᓐᓇᑐᒍᑦ ᐃᓅᖃᑎᕗᑦ ᐱᓪᓗᒋᑦ. 

ᓯᓪᕕ ᑕᒨᕐ, ᑐᕐᖃᑌᔨ ᑲᒪᒋᔭᖃᕐᓂᒧᑦ ᓄᓇᖃᕐᖄᓯᒪᔪᓕᕆᓂᕐᒥᒃ ᑯᐯᒻᒥ, ᐅᖃᓚᐅᕐᑐᖅ ᑲᖏᕐᓱᔪᐊᒥᐅᑉ ᐃᓱᒫᓗᒍᑎᒋᑦᓱᒋᑦ ᓄᐃᓯᒪᔭᖏᑦ ᐱᓇᓱᐊᕐᕈᑕᐅᒐᓱᐊᒻᒪᕆᑦᑐᑦ ᑲᕙᒪᒃᑯᓄᑦ.

“ᑯᐯᒃᑯᑦ ᑲᕙᒪᖓ ᐃᓱᒫᓗᓪᓚᕆᒻᒥᔪᖅ ᐃᓂᓪᓚᖓᑦᓯᐊᖏᓐᓂᖓᓂᒃ ᓄᓇᕕᒻᒥ ᐃᓅᓯᖃᕐᓂᐅᑉ,” ᐅᖃᕐᑐᖅ ᑕᒨᕐ ᖃᕆᑕᐅᔭᒃᑯᑦ ᐊᓪᓚᓱᓂ ᐅᑭᐅᕐᑕᑐᒥᒃ ᑕᑯᓐᓇᑐᒧᑦ.  “ᑲᕙᒪᒃᑯᑦ ᑎᒥᖁᑎᖏᑦ ᑯᐯᒻᒥ ᐱᕕᓕᒫᒥᒍᑦ ᐱᓇᓱᖃᑎᖃᕋᓱᓲᑦ ᐃᓄᐃᑦ ᑎᒥᖁᑎᖏᓐᓂᒃ ᐋᕐᕐᑭᕈᑎᑦᓴᓯᐅᕋᓱᐊᕐᓱᑎᒃ ᓄᓇᕕᒻᒥ ᐃᓄᓐᓄᐊᖓᔪᓂᒃ.” 

ᓯᓪᕕ ᑕᒨᕐ ᐅᖃᕐᓯᒪᒻᒥᔪᖅ ᑲᕙᒪᒃᑯᓂᒃ ᕿᒥᕐᕈᓯᐊᕋᓱᐊᓚᖓᔪᕕᓂᐅᓂᕃᑦᓱᓂ Viens ᖃᐅᔨᓴᕐᑎᖏᑦᑕ ᐃᒣᖁᔨᒍᑎᕕᓂᖏᓐᓂᒃ ᑐᓴᕐᑎᓯᓱᖓᐅᑎᖓ ᓄᐃᑕᐅᑉᐸᑦ 2019-ᒥ.  

“ᑖᑦᓱᒥᖓ ᖃᐅᔨᓴᕐᓂᒥᒃ ᓄᐃᑦᓯᓂᕐᒥᒍᑦ ᑯᐯᒃᑯᑦ ᑲᕙᒪᖓ ᐋᕐᕐᑭᒋᐊᕈᑎᑦᓴᓯᐅᕈᒪᓕᕐᑐᖅ ᐱᒍᑦᔨᒍᑎᒋᓲᒥᓂᒃ ᓄᓇᖃᕐᖄᓯᒪᔪᓂᒃ ᐃᓄᓐᓂᓗ, ᐅᑉᐱᕆᐅᑎᒍᓐᓇᓂᖓ ᐃᓄᐃᑦ ᓄᓇᓕᖏᑦᑕ ᑯᐯᒻᒥᓗ ᓇᐅᓕᒫᓂᒃ ᐱᑦᔪᔨᒍᑏᑦ ᐅᑎᕐᑎᒋᐊᕐᓗᒋᑦ, ᐱᓇᓱᖃᑎᒋᓕᕐᓗᒋᓪᓗ ᓄᓇᖃᕐᖄᓯᒪᔪᑦ ᐱᒍᑦᔨᒍᑎᐅᒋᐊᓖᑦ ᑲᔪᓯᑦᓯᐊᖃᑦᑕᖁᓗᒋᑦ ᐃᑉᐱᒍᓱᑦᓯᐊᕋᓱᐊᕐᓂᑯᑦ, ᓈᒻᒪᓈᕐᑐᑯᑦ ᓱᕐᖁᐃᓇᑦᓯᐊᑐᒃᑯᓗ.”

ᑕᒣᒐᓗᐊᕐᑎᓗᒍ,  ᑲᖏᕐᓱᔪᐊᒥ ᕌᐳᑦ ᐊᖓᔪᕐᖄᒋᒃ ᐴᓂᓗ ᒥᐊᔨᓗ ᕌᐳᑦᓗ ᐊᖓᔪᖏᑦ, ᓄᑲᖏᑦ. ᓇᔭᖏᓪᓗ, ᐃᓚᓐᓈᖏᑦ ᐃᓚᖏᓪᓗ, ᓱᓕ ᐊᕐᓱᕈᕈᑎᖃᕐᐳᑦ ᑭᑦᓴᕈᑎᖃᕐᓱᑎᒃ ᕌᐳᑦ ᐃᓅᒍᓐᓀᓯᒪᓂᖓᓂᒃ.  ᐴᓂ ᐋᑕᒥ ᐅᓐᓄᐊᑐᐃᓐᓇᒥ ᐅᐱᕐᖔᖅ ᐅᖄᓚᒋᐊᖃᖃᑦᑕᓚᐅᕐᑐᖅ ᐃᒥᐊᓗᒻᒥᒃ ᓄᕐᕐᑲᕋᓱᐊᕐᑐᓄᑦ ᐃᓚᐅᑦᓱᓂ ᐃᑲᔪᕐᑎᒋᖃᑦᑕᑕᕕᓂᕐᒥᓄᑦ ᒪᓐᑐᔨᐊᒦᑦᑐᒧᑦ, ᐃᓱᒪᓕᑐᐊᕋᒥ ᐊᑕᐅᓯᕐᒥᐅᓃᑦ ᐃᒥᐊᓗᒍᒪ ᐋᓐᓂᐊᓂᕋ ᐃᑯᓪᓚᐅᒥᒐᔭᕈᓇᑦᓴᑐᖅ, ᑭᓯᐊᓂᓗ ᐅᖃᕐᒥᓱᓂ ᓴᐱᕐᕆᐊᑐᐃᓐᓇᓚᖓᖕᖏᒋᐊᒥᒃ. 

“ᐱᕈᕐᓭᖏᓐᓇᑐᖓ ᐱᖓᓱᓂᒃ ᐱᐊᕋᕐᓂᑦ ᐊᓂᕐᕋᒥ, ᑕᑯᑎᒍᒪᔭᒃᑲ ᓂᕆᐅᓐᓂᖃᖏᓐᓇᕋᒪ ᓄᓇᓕᒻᒧᑦ ᓄᓇᕕᒻᒥᓗ.  ᓂᕆᐅᓐᓃᕈᑐᐊᕋᒪ ᐅᑎᑐᐃᓐᓇᕆᐊᖃᕋᒪ ᐱᐅᓯᕕᓂᒃᑲᓄᑦ 22-ᓂᒃ ᐅᑭᐅᖃᕐᓱᖓ; ᐋᖓᔮᑦᑎᐅᓗᖓ, ᐅᔭᕋᕐᑎᐅᓗᖓ ᐱᔮᕐᓱᑎᐅᓗᖓᓗ.” 

“ᑭᓯᐊᓂ ᓴᐱᕐᕆᐊᕆᐊᖃᖕᖏᑐᖓ ᐊᔪᐃᓐᓇᕈᑎᒋᓗᒍ ᐃᕐᓂᕋ.  ᑕᑯᓐᓇᑕᐅᒍᓯᖃᖁᖕᖏᑕᕋ ᐃᓄᒍᓗᑐᐃᓐᓇᒥᒋᐊᖓ ᓱᕈᓯᒍᓗᑐᐃᓐᓇᓗᓐᓃᑦ ᐱᔮᕐᓱᑕᐅᓂᕐᒧᑦ ᑐᖁᓚᕿᔪᖅ ᑲᓇᑕᐅᑉ, ᑯᐯᓪᓗ ᓄᓇᕕᐅᓪᓗ ᖃᓄᐃᓘᖕᖏᓗᐊᕐᓂᖏᓐᓄᑦ, ᐳᐃᒍᑐᐃᓐᓇᑕᐅᓗᓂᓗ.”  

“ᑌᒣᓘᑐᐃᓐᓇᓂᐊᖕᖏᑐᑦ. ᐋᑖᑕᒋᔭᐅᕗᖓ, ᑌᒣᓘᒍᓗᑐᐃᓐᓇᑎᓂᐊᖕᖏᑕᒃᑲ”.

ᕌᐳᑦ ᐋᑕᒥᐅᑉ ᐃᓗᕕᖓ ᑲᖏᕐᓱᔪᐊᒥ, ᑯᐯᒃᒥ. (ᐊᐃᓕᔅ ᑯᐃᓐ/ᐅᑭᐅᕐᑕᑐᒥᒃ ᑕᑯᓐᓇᑐᖅ)

 

ᖃᓄᐃᓕᖓᓕᕐᒥᒪᖔᑦ ᑐᓴᕐᑎᓯᒍᑎᒃ

ᔭᓄᐊᕆ 15, 2020-ᒥ ᒪᑦᑎᐅᓯ ᖃᒧᒑᓗᒃ ᐸᓯᔭᑦᓴᐅᓂᕋᓕᕐᓂᖁᖅ ᐃᓄᐊᕐᑐᕕᓂᐅᓂᕐᒧᑦ ᕌᐳᑦ ᐋᑕᒥᒥᒃ. ᐃᕐᕐᑲᑐᐃᕕᒻᒥ ᑐᑭᑖᕐᑕᕕᓂᖅ ᐃᓅᓯᓕᒫᖅ ᑎᒍᔭᐅᒪᓚᖓᓕᕐᑎᓗᒍ ᐊᕐᕌᒍᓂᓪᓗ ᖁᓕᓂ ᑎᒍᔭᐅᒪᓯᒪᓕᕈᓂ ᑭᓯᐊᓂ ᐊᓂᒍᓐᓇᕋᔭᕐᒪᖔᕐᒥ ᖃᐅᔨᓴᕈᓐᓇᕕᖃᕋᔭᕐᓱᓂ.

 

ᐅᑭᐅᕐᑕᑐᒥ ᐃᓅᒍᓐᓀᑐᖃᕐᑎᓗᒍ – ᓄᐃᑕᐅᒋᐊᖕᖓᓯᒪᔪᖅ ᑎᓯᒻᐱᕆ 14, 2018-ᒥ.
ᐅᑭᐅᕐᑕᑐᒥ ᐃᓅᒍᓐᓀᑐᖃᕐᑎᓗᒍ ᓯᑕᒣᒋᔭᐅᓯᒪᔪᖅ ᐃᓕᑕᕆᔭᐅᒍᑎᑖᕐᓱᓂ 2019 Dart Awards-ᒥ New York-ᒥ. ᐃᓕᑕᕆᔭᐅᓂᕐᒧᑦ ᐅᖃᕐᑕᐅᒍᑎᖃᕐᒥᓱᓂ ᑐᓴᕋᑦᓴᓂᐊᕐᓂᑯᑦ ᐱᑦᓯᐊᓯᒪᔪᒻᒪᕆᐅᒋᐊᖓ ᑐᓴᕐᑕᐅᑎᑦᓯᓂᕐᒧᑦ ᖁᐊᕐᓵᓇᕐᑐᑰᕐᓂᒥᒃ ᐱᔮᕐᓲᑎᓂᒃᑰᓂᕐᒥᓗ.


ᑎᑎᕋᕐᑎ

Eilis Quinn.

ᐊᐃᓕᔅ ᑯᐃᓐ ᑐᓴᕋᑦᓴᓕᕆᔨ ᑲᒪᔨᐅᑦᓱᓂᓗ ᕋᑎᐅ ᑲᓇᑕᒥ ᓯᓚᕐᔪᐊᓕᒫᒥ ᐅᑭᐅᕐᑕᑐᒥᒃ ᑕᑯᓐᓇᑐᒧᑦ ᑐᓴᕋᑦᓴᓂᐊᕐᓂᒥ.  ᐁᓕᔅ ᑐᓴᕋᑦᓴᓂᒃ ᑐᓴᕐᑕᐅᑎᑦᓯᖃᑦᑕᓯᒪᔪᖅ ᐅᑭᐅᕐᑕᑑᑉ ᓄᓇᖁᑎᖏᓐᓂ ᓯᑕᒪᐅᔪᕐᑐᓂ ᐊᒥᓱᓂᓪᓗ ᐊᓪᓚᓯᒪᔪᑎᒍᑦ ᑕᑯᓐᓇᕋᑦᓴᑎᒍᓪᓗ ᓄᐃᑦᓯᖃᑦᑕᓯᒪᑦᓱᓂ ᓯᓚᐅᑉ ᐊᓯᑦᔨᕙᓪᓕᐊᓂᖓᑕ ᒥᑦᓵᓄᑦ ᓄᓇᕐᖄᓯᒪᔪᓪᓗ ᐱᓐᓀᓗᑕᕆᕙᑦᑕᖏᓐᓄᑦ ᐃᓄᐃᑦ ᓄᓇᖓᓂ. 

ᖃᐅᔨᓴᕐᓱᓂᓗ ᑐᓴᕋᕐᓴᓕᐊᕕᓂᖓ “ᑐᖁᔪᖃᕐᑎᓗᒍ ᐅᑭᐅᕐᑕᑐᒥ: ᓄᓇᓕᒃ ᑭᑦᓴᓇᕐᑐᑰᕐᐳᖅ, ᐊᑖᑕᒋᔭᐅᔪᖅ ᐊᓯᑦᔨᕈᑎᑦᓴᓂᒃ ᐊᔪᐃᓇᕈᑎᖃᕐᐳᖅ,” ᐅᓂᒃᑳᓱᓂ ᐱᔮᕐᓱᑕᐅᓂᒻᒪᕆᒃᑯᑦ ᑐᖁᓂᕕᓂᖓᓂᒃ ᕌᐳᑦ ᐋᑕᒥᐅᑉ, 19-ᓂᒃ ᐅᑭᐅᓕᐅᑉ ᐃᓅᑦᓱᓂ ᐊᖑᑎᒃ ᑯᐯᒃ ᐅᑭᐅᕐᑕᑐᖓᓂᒥᐅᒍᑦᓱᓂ, ᐃᓕᑕᕆᔭᐅᒍᑎᑖᕐᓯᒪᔪᖅ ᐅᖃᕐᑕᐅᓱᓂ ᐱᑦᓯᐊᓯᒪᔪᒻᒪᕆᓐᓂᒃ ᑐᓴᕐᑎᓯᓂᕕᓂᖓᓄᑦ ᐱᔮᕐᓲᑎᓂᕐᒥᒃ ᖁᐊᕐᓵᓇᕐᑐᑰᕐᓂᒥᓪᓗ ᓄᐃᑦᓯᓱᓂ 2019 Dart Awards-ᓂᑦ New York-ᒥ. 

ᑐᓴᕋᑦᓴᓕᐊᕆᓯᒪᒻᒥᔭᖓ “Bridging the Divide” ᐃᓗᓯᓕᕆᓂᕐᒥ ᐊᕐᓱᕈᕈᑎᒋᓲᖏᓐᓄᑦ ᑳᓇᑕᐅᑉ ᐅᑭᐅᕐᑕᑐᖓᓂ ᐃᓕᑕᕆᔭᐅᒍᑎᑖᓚᖓᔪᓄᑦ ᐃᓚᒋᔭᐅᓯᒪᒻᒥᓱᓂ 2012 Webby Awards-ᓂᑦ.

ᐁᓕᔅ ᐱᓇᓱᖃᑦᑕᓯᒪᔪᖅ ᑐᓴᕋᑦᓴᓂᐊᕐᓂᐅᑉ ᑎᒥᖁᑎᖏᓐᓂ ᑲᓇᑕᒥ ᐊᒥᐊᔨᑲᓂ ᐊᒻᒪᓗ ᑕᓚᕖᓴᒃᑯᑦ ᐅᖃᕐᑎᒋᔭᐅᓯᒪᑦᓱᓂ Discovery/BBC Worldwide-ᑯᓂ “Best of China”-ᒥ. 

Twitter : @Arctic_EQ
ᖃᕆᑕᐅᔭᖓ : eilis.quinn@radio-canada.ca

One Comment

  1. Ellis Quinn.
    Once again, you amaze me.
    Your team amaze me.
    As Robert Adams father, I was giving up hope.
    I was giving up hope that my sons life and story was going to be forgotten.
    Since this story is now out in my families first language, many more Inuit will read about hardships that we all endure and overcome.
    We are a Resilient people.
    Always was.
    Always will be.
    From the core of my Heart, I Thank You and your team.
    Peace
    Bernie

Leave a Reply

Your email address will not be published. Required fields are marked *